Մամիկոն Ասլանյան. «Վանաձորի համար պատմական ժամանակաշրջան է».«Փաստ»

«Փաստ» օրաթերթը գրում է.

Վանաձորի քաղաքապետի աղմկահարույց ընտրություններից հետո անցել է մոտ մեկ ու կես ամիս և հետաքրքիր էր իմանալ, թե այս ընթացքում ինչպիսի զարգացումներ են տեղի ունեցել: Քաղաքը շարունակում է ապրել իր բնականոն հունո՞վ, թե ներքին ինտրիգները խոչընդոտում են հանրապետության երրորդ քաղաքի բնականոն ռիթմին: Այս և այլ հարցերի շուրջ «Փաստը» զրուցել է Վանաձորի քաղաքապետ Մամիկոն Ասլանյանի հետ:
– Պարոն Ասլանյան, մոտ մեկ ու կես ամիս է ստանձնել եք քաղաքապետի պաշտոնը, և այս ընթացքում Ձեր նախընտրական խոստումների ո՞ր մասն եք կարողացել կյանքի կոչել:
– Պաշտոնը ստանձնելուց հետո, նախընտրական շրջանի ժամանակ տված իմ բոլոր խոստումների ուղղությամբ արդեն իսկ գործուն քայլեր են կատարվել: Ես մոտ 20 մլն դոլարի ներդրում իրականացնելու խոստում էի տվել և կարող եմ ասել, որ այս պահին արդեն իսկ ներդրումներն ավելին կլինեն, քան խոստացել էի: Արդեն իսկ առարկայական պայմանավորվածություններ են ձեռք բերվել աղբահանության ծրագրի շուրջ և 2017 թ.–ի սկզբում արդեն իսկ կստորագրվեն պայմանագրերը, բացի այդ, շուտով կսկսվի նաև երկու դպրոցների շինարարությունը: Նախատեսվում է նաև սկսել Թումո կենտրոնի շինարարությունը: Բացի այդ, Վանաձորի կենտրոնական այգու բարեկարգման ծրագրերն արդեն ուղարկել ենք համապատասխան ծրագրերի բաժին, որպեսզի այն ևս հնարավոր լինի իրականացնել: Վանաձորի ճոպանուղու վերագործարկման նպատակով սկսվել են նաև ճոպանուղու ինժեներական աշխատանքները: Վանաձորը ընդգրկված է նաև երկրորդային քաղաքների ենթակառուցվածքների զարգացման ծրագրերում, որի ուղղությամբ նույնպես գործուն աշխատանքներ են իրականացվում: Այդ ծրագրի շնորհիվ՝ Վանաձորի ենթակառուցվածքները զարգացնելով, մեր քաղաքը կդարձնենք տուրիստական երթուղի, որն էլ իր հերթին թույլ կտա նախաձեռնել և իրականացնել այլ ծրագրեր:
– Դուք Ձեր նախընտրական ծրագրով նաև նոր աշխատատեղեր բացելու խոստում էիք տվել: Հաջողվե՞լ է այն կյանքի կոչել:
– Կարող եմ ասել, որ 800–ից 1000 աշխատատեղ բացելու իմ նախընտրական խոստումը կարելի է կայացած համարել: Վերջերս հանդիպել եմ կարի արտադրությամբ զբաղվող գործատուի հետ և բացի աշխատատեղերից, գործատուն խոստացավ նաև Վանաձորին օգնության կարգով որևէ կենցաղային տեխնիկական միջոց տրամադրել: Մենք հիմա ուսումնասիրություն ենք կատարում, թե կոնկրետ ինչ տեխնիկայով իրենք կկարողանան մեզ օգնել:
– Գաղտնիք չէ, որ փողոցները լավ վիճակում չեն: Այս ուղղությամբ ինչ աշխատանքներ են իրականացվում:
– Բյուջեի վերջին եռամսյակում փոսալցման աշխատանքների իրականացման մասին դժվար է խոսել, մանավանդ, որ ես նոր եմ ստանձնել քաղաքապետի պաշտոնը: Բացի այդ, որպես կանոն ձմռան ընթացքում փոսալցման աշխատանքներ չեն իրականացվում, բայց հաջորդ տարվա բյուջեով պլանավորել ենք նաև այդ աշխատանքների իրականացման համար միջոցներ տրամադրել: Ծրագրեր կան, որոնց միջոցով Վանաձորում ոչ թե փոսալցման, այլ՝ հիմնանորոգման աշխատանքներ կիրականացվեն` Ամանորը հավուր պատշաճի դիմավորելու համար, որպեսզի քաղաքը ստանա տոնական տեսք:
– Քաղաքական տարաձայնությունները չե՞ն խոչընդոտում Ձեր ծրագրերի իրականացմանը:
– Ես կցանկանայի Վանաձորը տեսնել այնպիսին, ինչպիսին ես ցանկացել եմ տեսնել նախընտրական շրջանում և այդ ուղղությամբ շարունակում եմ իրականացնել իմ գործուն քայլերը, անկախ քաղաքական տարաձայնություններից:
– Իսկ հնարավո՞ր է քաղաքական տարաձայնությունները դառնան անցյալ, և շարունակեք համատեղել ջանքերն ի նպաստ Վանաձորի ապագայի:
– Կարծում եմ քաղաքական ցանկացած տարաձայնություն ունի իր հարթման մեխանիզմը: Ես այդ տարաձայնությունները հարթելու նպատակով, ինչպես միշտ, հանդուրժողականության դաշտում եմ գործունեություն ծավալել և շարունակելու եմ նույնկերպ աշխատել: Եվ չեմ էլ կասկածում, որ մեր քաղաքական թե՛ ընդդիմադիրները, թե՛ համակիրները վերջ ի վերջո հայտնվելու են միևնույն դաշտում, քանի որ բոլորիս խնդիրը Վանաձորի հանդեպ մեր ունեցած ապագա ծրագրերի իրականացումն է: Եվ օգտվելով առիթից նշեմ, որ ես մշտապես եղել եմ և կամ առողջ քննադատության և առողջ կոնսոլիդացիայի կողմնակից, ով ցանկացած նորմալ ծրագրին կողմ է լինելու, որը կնպաստի Վանաձորի զարգացմանը: Նախորդ տարիներին Վանաձորը գրեթե դուրս էր մնացել ինտեգրացիոն պրոցեսներից և ես կարծում եմ, որ ներկայում Վանաձորի համար պատմական ժամանակաշրջան է, որովհետև Վանաձորը վերջ ի վերջո ներառվելու է համապետական և միջազգային ինտեգրման նոր ծրագրերում և հեռու չէ այն օրը, երբ մենք կունենանք բարեկեցիկ ապրող վանաձորցի և ինքնաբավ Վանաձոր քաղաք:

Շարունակությունը` «Փաստ» օրաթերթի այսօրվա համարում: