Ստեփան Դանիելյան. «ՀՀԿ–ականները մտահոգված են իրենց ճակատագրով». «Փաստ»

«Փաստ» օրաթերթը գրում է.

ՀՀ գործող նախագահ Սերժ Սարգսյանին վարչապետի պաշտոնում տեսնելու ՀՀԿ–ականների PR արշավը վերջին մի քանի օրերի ընթացքում կրկին ակտիվացել է: Այս ֆոնին հատկանշական էր Ազգային ժողովում «Ելք» խմբակցության ղեկավար Նիկոլ Փաշինյանին ի պատասխան ՀՀԿ խմբակցության ղեկավար Վահրամ Բաղդասարյանի հայտարարությունը: Ն. Փաշինյանի հարցը Ս. Սարգսյանի այն հայտարարության մասին էր, որտեղ նա չէր բացառել, որ կարող է չհավակնել վարչապետի պաշտոնին: Պատասխանելով հարցին. Վ. Բաղդասարյանը նշել էր, որ բացի ՀՀԿ–ի առաջնորդը լինելուց, Ս. Սարգսյանը շարքային կուսակցական է և պարտավոր է ենթարկվել քաղաքական ուժի որոշումներին:

Հարցին, թե սա PR արշավի հերթական դրսևորո՞ւմ է, թե, այնուամենայնիվ, այլ նյուանսներ էլ կան, քաղաքագետ Ստեփան Դանիելյանը «Փաստ»–ի հետ զրույցում նախ ընդգծեց, որ բացի տարածված հիմնական տեսակետից, թե այս ամենը Ս.Սարգսյանն է կազմակերպում, որ դառնա վարչապետ և ցույց տա, որ կուսակցությունն է դա պահանջում, այլ հանգամանք էլ կա. «Այստեղ կա նաև այն, որ թե՛ հանրապետականների, թե՛ դաշնակների համար Ս. Սարգսյանը միակ թեկնածուն է, քանի որ համակարգը կառուցված է իր անձի վրա: Եվ եթե հանկարծ Ս.Սարգսյանը փոխարինվի մեկ այլ անձով, օրինակ, ՀՅԴ–ն հնարավոր է դուրս մնա կոալիցիայից: Իսկ ՀՀԿ–ն կարող է արմատների բաժանվել, որովհետև կոնսոլիդացնող անձը չի լինի: Եվ իսկապես շատ շատերի համար դա կարող է ծանր հետևանքներ ունենալ: Ըստ իս՝ երբ շատ շատերն ասում են, որ Ս. Սարգսյանն այլընտրանք չունի, իրենք ճիշտ են ասում: Ճիշտ են ասում, իհարկե, իրենց համար: Սերժ Սարգսյանի վարչապետ չլինելն իրենցից շատ շատերի համար վտանգավոր կարող է լինել: Եվ այստեղ ինչ–որ առումով անկեղծություն կա: Անկեղծություն՝ իրենց շահերից ելնելով»:

Իսկ թե ինչ շահեր կարող են լինել, քաղաքագետը մասնավորեցրեց. «Հայաստանում սեփականությունը հանրության կողմից որպես արդար ու լեգիտիմ չի ընկալվում, որովհետև հիմնականում խոշոր սեփականությունների տակ բազմաթիվ հանցագործություններ կան, որոնց մասին մամուլն ամեն օր գրում է: Եթե Ս. Սարգսյանին հանում ենք, այդ ամենը կոնսոլիդացնող անձ, փաստորեն, չի լինում: Արդյունքում ՀՀԿ–ն մասերի է բաժանվում, և սկսում են բոլորը բոլորի դեմ պատերազմել, ինչը շատ վտանգավոր հետևանքներ կարող է ունենալ իրենց համար:

Եվ սրանով է պայմանավորված, որ շատերը շահագրգռված են այդ պաշտոնում տեսնել հենց Սերժ Սարգսյանին: Ես տեսականորեն եմ ասում՝ եթե նա հանկարծ չցանկանա վարչապետ լինել, չեմ բացառում, որ կարող է իրոք պահանջեն, որ նա լինի վարչապետ: Պահանջը կբխի այդ մարդկանց շահերից, պահանջը կլինի կայունության համար, բայց ոչ թե երկրի, այլ իրենց կայունության»:

Իսկ թե արդյոք վարչապետի պաշտոնի շուրջ ինտրիգ կա՞, թե, այնուամենայնիվ, մարել է, քաղաքագետը նկատեց. «Սա ինտրիգ չէ: Վարագույրների հետևում իսկապես քննարկումներ են գնում: Եվ իրոք, վերոնշյալ մարդիկ մտահոգված են: Յուրաքանչյուրն իր ճակատագրով է մտահոգված՝ ինչ–որ մի օր դատարանի առջև չկանգնելու և նման այլ հարցերով»: Ինչ վերաբերում է վարչապետի պաշտոնի շուրջ ամիսներ շարունակ քննարկվող Սերժ Սարգսյան–Կարեն Կարապետյան հավանական թեկնածուներին, Ստեփան Դանիելյանը նշեց. «Կ. Կարապետյանը քաղաքական գործիչ չէ, իսկ Հայաստանում վարչապետի պաշտոնը քաղաքական է: Այդ պաշտոնում միայն քաղաքական դեմք կարող է լինել: Կ.Կարապետյանը, չլինելով քաղաքական դեմք, քաղաքական պաշտոն չի կարող զբաղեցնել: Եթե ընտրությունը նրա վրա կանգնի, ապա Ս.Սարգսյանը թեկուզ ոչ «դե յուրե», այլ գոնե «դե ֆակտո» պետք է ավելի բարձր դիրքում լինի: Այս համակարգն իր օրենքներով է ապրում: Կ. Կարապետյանն այս համակարգի համար «դրսի» մարդ է, ով չի կարող կայունություն ապահովել իրենց համար»:

Հարցին, թե նման պաշտոն կա՞, երբ ամենակարևոր լիազորություններն, այնուամենայնիվ, ապագա վարչապետինն են, քաղաքագետը պատասխանեց. «Օրինակ՝ Սովետական Միության ժամանակ կուսակցության նախագահի պաշտոնն ավելի բարձր էր համարվում: Հայաստանում տեսականորեն սա հնարավոր է»:

Ընդդիմադիր որոշ արտախորհրդարանական ուժեր, ինչպես նաև խորհրդարանական «Ելք» խմբակցությունը նախատեսում են հավաքներ իրականացնել, հիմքում նաև Ս. Սարգսյանի վարչապետության հարցն է: Դիտարկմանը, թե նրանց կհաջողվի՞ քաղաքական օրակարգ ձևավորել, Ս. Դանիելյանը նշեց. «Չեմ կարող ասել՝ կհաջողվի, թե՝ ոչ: Ուղղակի վերջին մոտ 25–30 տարում ընդդիմությանը որևէ հարցում որևէ բան չի հաջողվել: Եթե հաջողվի՝ կլինի առաջինը»:

Շարունակությունը՝ «Փաստ» օրաթերթի այսօրվա համարում