Իշխանությունը պարզապես դիտորդի դերում է. «Փաստ»

«Փաստ» օրաթերթը գրում է.

Իշխանությունը տեղյակ չէ, թե ինչու է քաղաքական դաշտը վախվորած

Ներքաղաքական զարգացումների, համագործակցության փորձերի ու տարատեսակ հայտարարությունների վերաբերյալ «Փաստը» զրուցեց ԱԺ ՀՀԿ խմբակցության ղեկավար Վահրամ Բաղդասարյանի հետ:

– Պարոն Բաղադասարյան, լայն քննարկման թեմա է դարձել «Հայկական վերածնունդ» նախկինում՝ «Օրինաց երկիր» կուսակցության առաջնորդ Արթուր Բաղդասարյանի օրերս արված այն հայտարարությունը, թե իրենք համագործակցության կգնան անգամ ՀՀԿ–ի հետ, եթե երկրում փոփոխություններ կայացնելու վրա լուրջ ազդեցություն ունենալու հնարավորություն ընձեռվի: Ինչպե՞ս եք արձագանքում այս հայտարարությանը` հաշվի առնելով այն հանգամանքը, որ տվյալ քաղաքական թիմը վերջին շրջանում թունդ ընդդիմադիր էր խաղում:

– Այդ հայտարարությունը համարում եմ պարզապես ցանկություն: Դա իրենց ցանկությունն է: Կարող եմ ասել, որ մենք նման քննարկումներ չենք ունեցել: Որևէ հիմք չկա, որ ես այդ հայտարարությունը մեկնաբանեմ: Իրենք ավելի լավ կմեկնաբանեն ընդդիմություն–իշխանություն հարաբերակցությունը:

– Արթուր Բաղդասարյանը ոչ վաղ անցյալում իշխանական թևի ներկայացուցիչ էր, հետո դարձավ ընդդիմադիր ու հիմա, կարծես, կրկին փորձում է անցնել իշխանության ճամբար: Արդյո՞ք լուրջ է այս մոտեցումը:

– Դա մեր իրականության ու քաղաքականության մեջ ծանոթ ձեռագիր է, կարծում եմ այդ հարցի մեկնաբանությունն իրենք ավելի լավ կտան:

– Եթե համագործակցության առաջարկ լինի տվյալ քաղաքական ուժի կողմից իշխանությունը պատրա՞ստ է քննարկել այն ու համագործակցել:

– Եթեներով չենք շարժվում: Մենք բազմիցս նշել ենք, որ որևէ քաղաքական կուսակցությունից մենք չենք խուսափում ու պատրաստ են բոլորի հետ համագործակցել: Քաղաքական դաշտում համագործակցությունը չի նշանակում միայն կոալիցիա ու միայն պաշտոններ, կան համագործակցության տարբեր ձևաչափեր:

– «Հայկական վերածնունդին» կեղծ ընդդիմություն համարո՞ւմ եք:

– Ես որևէ քաղաքական ուժի հասցեին նման գնահատականներ չեմ տալիս:

– Անցում կատարենք մեկ այլ քաղաքական թիմի. «Միացյալ հայեր» նախաձեռնությունը հայտարարել է, որ աջակցելու է ՀՀ նախկին պաշտպանության նախարարին անկախ խորհրդարանական ընտրություններում մասնակցություն ունենալու ձևաչափից: Վերջիններս համագործակցության հիմքում դրել են այն, որ Ս. Օհանյանը դուրս է եկել համակարգից «Մարտի 1–ի» ու «Հոկտեմբեր 27–ի» դեպքերի հետ անհամաձայնության հետ կապված: Ինչպե՞ս եք վերաբերվում այդ պատճառաբանությանը:

– Նման քննարկումներ չկան, նման իրողություններ չկան, երբ Ձեր նշած քաղաքական գործիչները կանեն իրենց վերջնական հայտարարությունները, այդ ժամանակ կմեկնաբանեմ:

– Պարոն Բաղդասարյան, ներքաղաքական կյանքն արտաքինից կարծես պարալիզացված է, քաղաքագետները նշում են, որ դա իշխանության մեղքն է, քանի որ ստեղծվել է այնպիսի վիճակ, որ անգամ ընդդիմությունն է շարժվում իշխանության նշած ուրվագծով: Ընդունո՞ւմ եք մեղադրանքները:

– Եթե մենք ունենք այնպիսի ընդդիմություն, որը պետք է շարժվի իշխանության նշած ուրվագծով, ապա ես ցավում եմ դրա համար: Մենք ընդհանուր առմամբ դիտորդի դերում ենք ու քաղաքական դաշտում ընթանում են ազատ քննարկումներ, ու մենք սպասում ենք հանգուցալուծման: Մենք միշտ կողմնակից ենք եղել, որ լինի իշխանությանը համարժեք ընդդիմություն և քաղաքական դաշտը կայանա: Մենք ունենք բաց` ընդդիմության դաշտում ու որևէ պատճառով չտեղավորվելը չի վերաբերում իշխանությանը, ես դեմ եմ նման մտածելակերպին:

– Իշխանության հետ միասնական հանդես գալու առաջարկ որևէ քաղաքական ուժից եղե՞լ է:

– Փաստացի նման քննարկումներ մենք չենք ունեցել: Ցանկություններ կարող են շատ լինել, բայց կրկնվելով նշեմ, որ որևէ քաղաքական ուժի հետ նման քննարկումներ չենք ունեցել:

Շարունակությունը` «Փաստ» օրաթերթի այսօրվա համարում: