Հայաստանում «Մաքդոնալդս» բացելու լուրը պաշտոնապես չի հաստատվում . «Փաստ»

«Փաստ» օրաթերթը գրում է.

Արդեն մի քանի տարի է՝ Հայաստանում «Մաքդոնալդս» արագ սննդի խոշորագույն ցանցի հնարավոր բացման մասին է խոսվում: Թեև լուրերը պաշտոնապես հերքվում են, ժամանակ առ ժամանակ այն կրկին շրջանառվում է: Այս առումով բացառություն չէ նաև 2018 թվականը: Հունվարից նորից շրջանառվում է արագ սննդի բացման հնարավորությունը: Իսկ օրեր առաջ վրացի գործարար Թեմուր Չկոնիան Հայաստանի հանրային ռադիոյի «Ռադիոլուր» հաղորդաշարին տեղեկացրել է, որ բացումն արդեն ծրագրված է:

Այդուհանդերձ, պաշտոնապես այս լուրը չի հաստատվում:

ՀՀ տնտեսական զարգացման և ներդրումների նախարարությունից «Փաստ»–ը փորձեց ճշտել՝ ընկերության հետ այս փուլում ի՞նչ բանակցություններ են ընթանում:

Ի պատասխան՝ նախարարության մամուլի խոսնակ Աննա Օհանյանը նշեց. «Քանի որ նախորդ տարի կրկին նման շշուկներ էին բարձրացել ԶԼՄ–ների կողմից, նախարարության ներդրումային վարչությունը կապ էր հաստատել «Մաքդոնալդս»–ի հետ: Մենք պատասխան էինք ստացել, որ առաջիկայում ՀՀ–ում արագ սննդի իրենց ցանցը բացելու ծրագրեր չունեն»:

Դիտարկմանը, թե նոր հարցում ուղարկվելո՞ւ է, թե ոչ, նա պատասխանեց. «Չեմ կարծում: Նպատակահարմար չենք գտնում, որովհետև կարծում եմ, որ իրենք առաջիկայի համար սպառիչ պատասխան էին տրամադրել»:

Նշենք, որ զուգահեռ լուրերի, մի շարք փորձագետներ «Մաքդոնալդս»–ի մուտքը սննդի անվտանգության տեսանկյունից խնդրահարույց են համարում:

Սպառողների խորհրդատվության կենտրոն ՀԿ նախագահ Կարեն Չիլինգարյանը, սակայն, չի կարծում, որ ցանցի մուտքն արգելելը ճիշտ մոտեցում կլինի:

«Քաղաքակիրթ աշխարհում նման բան չկա: Դա կարելի է անել այն դեպքում, երբ տեսնենք, որ վտանգ կա: «Մաքդոնալդս»–ն ամբողջ աշխարհում տարածված ցանց է: Բացի այդ՝ մեզ մոտ սննդի ոլորտում կան շատ կառույցներ, որոնց սպասարկումն ավելի վատ մակարդակի է: Այնպես որ՝ չեմ գտնում, որ պետք է արգելել, ուղղակի պետք է վերահսկել, որ նորմալ և անվտանգ ծառայություն մատուցվի: Առավել ևս՝ որ այդ կառույցն ամբողջ աշխարհում հայտնի է»,– «Փաստ»–ի հետ զրույցում ասաց Կարեն Չիլինգարյանը:

ՀԿ նախագահը շեշտեց. «Իհարկե, եղել են խնդիրներ, բայց երբ օգտվում ես այդ արտադրանքից, տեսնում ես, որ, համենայն դեպս, սանիտարահիգիենիկ նորմերի առումով ավելի բարձր մակարդակում են, քան Հայաստանում գործող շատ սննդի օբյեկտներ: Այլ հարց է, թե «Մաքդոնալդս»–ում ինչ մթերքներ կօգտագործվեն, որովհետև խոսակցություններ են գնացել նաև, որ ԳՄՕ (գենետիկորեն մոդիֆիկացված օրգանիզմ) է օգտագործվում: Թեև եղել են հայտարարություններ, բայց այս առումով ևս պետք է վերահսկվի: Եթե վերահսկողություն չեղավ, «Մաքդոնալդս»–ը չեղավ, ով ուզում է լինի, խնդիրներ կլինեն: KFC–ին էլ է համաշխարհային ցանց, բայց ինչպես ամբողջ աշխարհում այստեղ ևս նորմալ գործում է ցանցը»:

Իսկ «Մաքդոնալդս»–ն ի՞նչ վերահսկողություն է ենթադրում: Այսինքն՝ բոլոր ցանցերը ենթարկվում են մեկ ընդհանուր կանոնակարգի, թե այն երկրի կանոններին, որտեղ որ գործում են:

Հարցին ի պատասխան՝ Կ. Չիլինգարյանը նշեց. «Թեև հանձն է առնում իր աշխատանքն իրականացնել միջազգային ընդհանուր կանոնադրության համաձայն, բայց միևնույն է, որտեղ բացվում է, նախևառաջ պետք է ենթարկվի տեղական օրենքներին: Եթե մեզ մոտ Սննդի անվտանգության պետական ծառայությունը նորմալ վերահսկվի՝ խնդիր չի լինի: Արդեն տասը տարուց ավելի է՝ Վրաստանում գործում է «Մաքդոնալդս»–ը: Եվ սա այն դեպքում, երբ վրացական խոհանոցը բավականին ճանաչված է աշխարհում»:

Մեր զրուցակիցը շեշտեց՝ թեև հստակ օրինակներ չունի, թե որ երկրներում են արգելել «Մաքդոնալդս»–ը, բայց եթե անգամ նման օրինակներ կան, մեզ համար դա չափանիշ չպետք է լինի:

«Մենք մանրամասն պետք է ուսումնասիրենք պատճառները, համաձայն որոնց նման արգելանք է եղել: Այդ ուսումնասիրությունից ելնելով էլ նոր կարելի է մտածել, թո՞ւյլ տալ «Մաքդոնալդս»–ի մուտքը Հայաստան, թե ոչ»,– եզրափակեց մեր զրուցակիցը:

Շարունակությունը՝ «Փաստ» օրաթերթի այսօրվա համարում