Գյուղացիները գայլերի հարձակումներից վնասներ են կրել. «Փաստ»

«Փաստ» օրաթերթը գրում է.

Լոռու մարզի Դեբեդ համայնքում գայլերի հարձակման հերթական դեպքն է տեղի ունեցել: Փետրվարի 1–ին գայլերի հարձակումից ձի է տուժել: Անասնատեր Պարույր Մարտինյանը «Փաստ»–ի հետ զրույցում տեղեկացրեց, որ ձին գոմից ընդամենը 30 մետր հեռավորության վրա է գտնվել:

«Գյուղի վերջին տան մոտ է եղել կենդանին, գայլերն արդեն գյուղ են մտնում»,– ասաց նա:

Դեբեդի բնակիչը առաջին անգամ չէ, որ տուժում է գայլերի հարձակումից: Նախորդ տարի 5 անասուն է կորցրել:

«Վերջին 7 ամսվա ընթացքում ինձանից 5 անասուն է պակասել: Այս ձին մոտ 350000 դրամ արժեք ուներ: Հղի էր, մի ամիս հետո պետք է քուռակ ունենար»,– հայտնեց գայլերի հարձակումից տուժած գյուղացին:

Գրեթե ամեն օր գայլերի հարձակման դեպք է գրանցվում այստեղ, ինչի հետևանքով այլևս չկա մի բնակիչ, որ տուժած չլինի:

«2 օր առաջ էլ են ձիերի վրա հարձակվել»,– դժգոհեցին դեբեդցիները:

Սա այս տարվա արդեն 7–րդ նման դեպքն է: Նախորդ տարիներին ևս գայլերը բավականին վնասներ են հասցրել գյուղացիներին: Եղանակային բարենպաստ պայմանների հետևանքով անասունների մեծ մասն այս օրերին արոտավայրերում են գտնվում և հայտնվում գայլերի թիրախում:

Գայլերի հարձակումից տուժած գյուղացիները որևէ փոխհատուցում ստանալու խնդրանքով պատկան մարմիններին չեն դիմել: Նախորդ տարիներին էլ գայլերի ու բնական աղետների հետևանքով գյուղացիները զգալի ֆինանսական կորուստներ են ունեցել, սակայն,փոխհատուցում չի եղել:

«Սրա դեմն առնել է պետք, ինչքա՞ն պետք է շարունակվի այս ամենը, ամեն օր նույն պատմությունն է»,– ասացին նրանք:

Դեբեդի գյուղապետ Արարատ Քոչարյանի խոսքով, սակայն, գայլերի հարձակումը բնակավայրից բավականին հեռավորության վրա է տեղի ունենում՝ արոտավայրերում: Դեպքերը բազմաթիվ են:

Դիմել են ՀՀ ոստիկանություն, Որսորդմիություն, որպեսզի գրանցված որսորդները գայլերին ոչնչացնեն:

«Այս տարին նոր է սկսվել, ու արդեն բավականին դեպքեր կան, անասուններին շատ–շատ վնասներ են տալիս: Հիմնականում ձիերն են տուժում»,– փոխանցեց համայնքի ղեկավարը:

Շարունակությունը՝ «Փաստ» օրաթերթի այսօրվա համարում