Բողոքի արդյունքը. վերանորոգման աշխատանքներ՝ Վարդգես Պետրոսյանի անվան դպրոցում. «Փաստ»

«Փաստ» օրաթերթը գրում է.

Անցած տարի Աշտարակի Վարդգես Պետրոսյանի անվան հիմնական դպրոցի ուսուցչակազմը դասադուլի միջոցով բողոք էր բարձրացրել 600 աշակերտ ունեցող դպրոցի անմխիթար վիճակի մասին: «Փաստ»–ն իր նախորդ համարներում անդրադարձել էր դպրոցի ուսուցիչների և աշակերտների պահանջին: Դասադուլից հետո պատասխանատու մարմինների և դպրոցի անձնակազմի միջև որոշակի համաձայնություն էր ձեռք բերվել: Քաղաքապետը տեղեկացրել էր, որ դպրոցի վերանորոգման վերաբերյալ Ասիական զարգացման բանկի հետ բանակցություններ են ընթանում:

Արագածոտնի մարզպետարանի աշխատակազմի կրթության, մշակույթի և սպորտի վարչության պետ Մամիկոն Աբգարյանից հետաքրքրվեցինք՝ ամիսներ անց ի՞նչ քայլեր են ձեռնարկվել դպրոցի վերանորոգման ուղղությամբ, ի՞նչ արդյունք են տվել Ասիական զարգացման բանկի հետ տարվող բանակցությունները:

Մամիկոն Աբգարյանը «Փաստ»–ի հետ զրույցում տեղեկացրեց, որ դպրոցում վերանորոգման աշխատանքներ են կատարվում:

«Մասնաշենքի տանիքը, պատուհաններն արդեն փոխել ենք, շինարարական մյուս աշխատանքները շարունակվում են»,–ասաց նա:

Ինչ վերաբերում է բանկի հետ տարվող բանակցություններին, մարզպետարանի աշխատակիցը նշեց, թե այդ առումով հստակ տեղեկություն չունի. «Որքան գիտեմ՝ բանկն իրենց տեղեկացրել է դպրոցը հիմնավերանորոգման ցուցակում ընդգրկելու մասին»:

Իսկ ինչ միջոցներով է իրականացվում ներակայիս վերանորոգումը. Մամիկոն Աբգարյանը թեև նշեց, որ այդ հարցի պատասխանը ստանալու համար պետք է տնօրենին դիմել, բայց հավելեց, որ մարզպետն ու քաղաքապետն են կազմակերպել:

Մամիկոն Աբգարյանը շեշտեց, որ իրենք թույլ չեն տվել դպրոցի վերանորոգման համար դրամահավաք կազմակերպել. «Մենք դպրոցը բարեկարգում ենք լրիվ այլ միջոցներով՝ ոչ դպրոցի հաշվին»:

Նշենք, որ դպրոցի Facebook–յան էջում դրամահավաքի վերաբերյալ հայտարարություն է արվել, որտեղ անձնակազմը, թեև երկհարկանի մասնաշենքի հիմնանորոգման վերաբերյալ իր շնորհակալությունն է հայտնել, սակայն ընդգծել է, որ դպրոցը չունի համակարգչային սենյակ, հանդիսությունների–միջոցառումների դահլիճ, ճաշարան, որի առկայության դեպքում երեխաները կստանան տաք սնունդ, մարզադահլիճ և մարզադաշտ:

Շարունակությունը՝ «Փաստ» օրաթերթի այսօրվա համարում