Կառավարությունը խնդրահարույց է համարում «Ելք»–ի նախաձեռնությունը. «Փաստ»

«Փաստ» օրաթերթը գրում է.

Կառավարության հունվարի 18–ի նիստի օրակարգում ներառված է կառավարության արձանագրային նախագիծը, որը վերաբերում է «Ելք» խմբակցության պատգամավոր Լենա Նազարյանի օրենսդրական նախաձեռնությանը: Պատգամավորն առաջարկել է փոփոխություն կատարել ՀՀ «Աշխատանքային օրենսգրքում», ըստ որի՝ նախադպրոցական ուսումնական հաստատություն (ՆՈՒՀ) հաճախող երեխա ունեցող աշխատողի պահանջով, մինչև երեխայի նախադպրոցական տարիքի ավարտը, աշխատանքային օրվա ավարտ կարող է սահմանվել ժամը 17:00–ն: Նախագծի հիմնավորման մեջ նշվել է, որ ՀՀ–ում համայնքների ենթակայության տակ գտնվող ՆՈՒՀ–ում աշխատաժամերի առկա ռեժիմը բազմաթիվ դժվարություններ է ստեղծում այնտեղ հաճախող սաների ծնողների համար: ՆՈՒՀ–երի աշխատաժամն ավարտվում է ժամը 17:30–ին, ինչի հետևանքով երեխայի ծնողներից մեկը կամ խնամակալն առկա աշխատանքային ռեժիմի պայմաններում ստիպված է լինում լրացուցիչ դժվարություններ կրել՝ ժամանակից շուտ լքել աշխատավայրը, ինչը հարուցում է ղեկավարության դժգոհությունը: Ուսումնասիրությունները ցույց են տալիս, որ ներկայում առկա տեղեկատվական տեխնոլոգիաների պայմաններում նախկինում կատարվող աշխատանքը կարելի է իրականացնել զգալի կարճ ժամանակահատվածում: Ուստի այն մտահոգությունները, թե նախադպրոցական ուսումնական հաստատություն հաճախող երեխայի ծնողներից մեկի աշխատանքային ժամերի կրճատումը մեկ ժամով կազդի նրա աշխատանքի որակի վրա, չի համապատասխանում իրականությանը:

Նախագծի վերաբերյալ կառավարությունը ներկայացրել է իր առաջարկությունը՝ ընդգծելով, որ այն խնդրահարույց է, չի ծառայում հիմնավորման մեջ նշված նպատակին: Ի թիվս այլ հիմնավորումների՝ կառավարությունն ընդգծել է, որ առաջարկվող կարգավորմամբ աշխատանքային ժամերի կրճատումը որպես գործատուի պարտավորություն սահմանելը ոչ միայն չի համապատասխանում միջազգային դրական փորձին, այլ նաև չի լուծում երեխա խնամող ծնողների աշխատանքը երեխայի խնամքին զուգահեռ կազմակերպելու խնդիրը:

«Միաժամանակ չենք կիսում նախագծի հիմնավորման մեջ նշված այն տեսակետը, որ ՆՈՒՀ հաճախող երեխայի ծնողներից մեկի աշխատանքային օրվա ժամերի կրճատումը չի կարող բացասաբար ազդել աշխատողի աշխատանքի արդյունավետության վրա: Հակառակը, մեր գնահատմամբ, նման կոշտ կարգավորում ամրագրելը կարող է բացասաբար ազդել ինչպես աշխատանքի արդյունավետության վրա, այնպես էլ կարող է հանգեցնել մի իրավիճակի, երբ գործատուները կփորձեն ազատվել նախադպրոցական տարիքի երեխա ունեցող աշխատողներից: Մյուս կողմից, հարկ է նկատել, որ Օրենսգրքի 141–րդ հոդվածով ամրագրված են միջազգային իրավունքի նորմերի պահանջներին համապատասխան ոչ լրիվ աշխատաժամանակի ռեժիմի կիրառման կարգավորումներ: Այսինքն՝ Օրենսգրքի գործող դրույթն աշխատանքային հարաբերությունների կողմերին ընձեռում է հնարավորություն փոխադարձ համաձայնության հիման վրա սահմանել ոչ լրիվ աշխատանքային օր կամ ոչ լրիվ աշխատանքային շաբաթ»,– նշված է կառավարության արձանագրային նախագծում:

Կառավարությունը խնդրահարույց է համարել նաև այն դեպքը, երբ ՆՈՒՀ–ում աշխատանքը ավարտվում է ոչ թե 17:30–ին, այլ ավելի շուտ. «Ուստի, նշված դեպքերում առաջարկվող կարգավորումը չի ծառայի իր նպատակին: Միևնույն ժամանակ, համաձայն նախագծի՝ ՆՈՒՀ հաճախող երեխա ունեցող աշխատող ծնողներից միայն մեկն իրավունք ունի օգտվել առաջարկվող՝ ոչ լրիվ աշխատանքային օր նախատեսելու իրավունքից: Այս կապակցությամբ պարզ չէ, թե ինչպես է ծնողներից մեկի գործատուն տեղեկանալու մյուս ծնողի կողմից արդեն իսկ նշված իրավունքից օգտվելու փաստի մասին»:

Ըստ կառավարության եզրակացության՝ վերոնշյալ նախագծի ընդունումը, այլ հավասար պայմաններում, կարող է հանգեցնել ՀՀ պետական բյուջեի եկամուտների նվազմանը և ՀՀ պետական բյուջեի ծախսերի փոփոխությանը, որի չափը հնարավոր չէ գնահատել համապատասխան տեղեկատվության բացակայությամբ պայմանավորված:

Շարունակությունը՝ «Փաստ» օրաթերթի այսօրվա համարում