Արամ Գրիգորյան. «Ուզում են շահույթը պահպանել տրանսպորտից օգտվողների հաշվին». «Փաստ»

«Փաստ» օրաթերթը գրում է.

Մի քանի երթուղիներ սպասարկող ընկերությունների վարորդներ պահանջում են կամ գազը էժանացնել, կամ էլ ուղևորավարձը թանկացնել: Ըստ գործադուլ հայտարարած վարորդների՝ գազի թանկացման հետևանքով իրենց ծախսերը ավելացել են ամսական մոտ 45 հազար դրամով, ինչի հետևանքով չեն կարողանում հոգալ իրենց ընտանիքների կարիքները:

«Գազը թանկացել է: Դա օրական 1500–2000 դրամ է կազմում, ամսական՝ 45 հազար դրամ: Ես այդ գումարով պետք է ընտանիքիս կարիքները հոգամ, կոմունալները վճարեմ: Օրական 15–16 հազար դրամ պլան ենք մուծում, հիմնարկի վրա էլ հարկեր են դրված, պլանը ո՞նց իջեցնի: Չհաշված՝ խաչմերուկի վրա կանգնում 100 դրամ ես վերցնում, տուգանք է գալիս: Անհնար է, չենք տեղավորվում այդ գումարի մեջ»,– «Փաստ»–ի հետ զրույցում ասաց թիվ 99 երթուղային տաքսու վարորդներից մեկը:

«Հասարակական պաշտպան» ՀԿ ղեկավար Արամ Գրիգորյանը միանշանակ չի կարող ասել, թե սեղմված գազի թանկացումը կարող է ազդել տրանսպորտի գնի վրա: Նրա խոսքով՝ պետք է հաշվարկներ կատարվեն:

«Եթե սեղմված գազի գինը բարձրացել է, ապա տնտեսվարողի շահույթին կպել է: Եթե գծատերն իր շահույթը քչացնի, որևէ խնդիր չի առաջանա, ինքը կսկսի աշխատել, բայց չի ուզում իր շահույթը քչացնել: Ոզում են շահույթը պահպանել տրանսպորտից օգտվողների հաշվին: Սրանք խնդիրներ են, որոնց իշխանությունը պետք է անդրադառնա»,– նկատեց նա:

Արամ Գրիգորյանը վարորդների բողոքը հիմնավորված չի համարում: Աղմուկ բարձրացնելը տեղին չի համարում:

«Եթե ժամանակին կարողանային քաղաքացիներին ներկայացնել, որ այդ 100 դրամը իրենց մեծ շահույթներ չի ապահովում, այսօր խնդիրն այլ կերպ կլիներ: Մենք համոզված ենք, որ տրանսպորտի ներկայի գինն իրենց շահույթ է ապահովում: Հակառակ դեպքում իրենց քայլը ճիշտ կլիներ: Ժամանակին մասնակցել են մրցույթին, պայմաններ են եղել, իրենք հաղթել են ու սկսել են ծառայություններ մատուցել: Հիմա պայմաններ են փոխվել, կարող են նոր մրցույթներ պահանջել և հաշվարկներ անել՝ հաշվի առնելով սեղմված գազի այսօրվա գինը»,– ընդգծեց «Հասարակական պաշտպան» ՀԿ ղեկավարը:

Նա համոզված է՝ տրանսպորտի գինը չի փոխվի մինչև միասնական ցանցի ներդրումը: Այդ դեպքում, անկախ վառելիքի գներից, երթուղայինgերն ավելի թանկ կսպասարկեն բնակչությանը:

«Միասնական տրանսպորտային ցանցի ներդրման դեպքում նաև մատուցվող ծառայությունների որակն է բարձրանալու: Ներդրումներ անելու դեպքում անհնար է, որ գինը չբարձրանա: Թե ինչքանով տրանսպորտը կթանկանա, առայժմ չեմ կարող ասել»,– նշեց Գրիգորյանը:

Նա նաև շեշտեց, որ այսօր գների զսպման մեխանիզմ գոյություն չունի:

«Տնտեսությունը չի կարողանում դիմագրավել թանկացումներին: Սա մրցակցության պակասի արդյունք է: Պետությունը պետք է ազատ մրցակցային շուկա ստեղծի, ինչը չի անում: Պետությունը պետք է կարողանար տնտեսություն զարգացնել, իսկ մեր տնտեսության ցանկացած ալեկոծում իր բացասական ազդեցությունն է թողնում հանրության վրա»,– մատնանշեց ՀԿ ղեկավարը:

Արամ Գրիգորյանն ասաց, որ չկա նաև իրավունքների պաշտպանության համակարգ: Որպես սպառողների իրավունքների պաշտպան չի կարողանում դատարան դիմել՝ պաշտպանելու հասարակության շահերն ու պարզելու գնաճի պատճառները:

«10 տարի խոսեցին, որ հասարակական կազմակերպությունները, որոնք իրավունքների պաշտպանությամբ են զբաղված, իրավունք ունենան շահառուների խնդիրներով դատարան դիմել: Պետությունն ասաց, այո, նման բան կլինի, բայց չեղավ: Մենք օբյեկտիվ կառավարման թերություն ունենք»,– եզրափակեց նա:

Շարունակությունը՝ «Փաստ» օրաթերթի այսօրվա համարում