Отказался давать комментарии. «Փաստ»

«Փաստ» օրաթերթը գրում է.

Ամեն անգամ, երբ Հայաստանում ընտրական գործընթացներ կամ այլ քաղաքական իրադարձություններ են տեղի ունենում, պարտադիր հրապարակ է նետվում ՀՀ երկրորդ նախագահ Ռոբերտ Քոչարյանի` կրկին քաղաքականություն վերադառնալու հարցը: Միամտություն կլինի մտածելը, թե դրանով ցանկություն կա միայն հասարակական տրամադրությունները ճշտել: Ավելի շուտ, դա նաև անցյալի վախերի չափը ստուգելու, երկրորդ նախագահի պաշտոնավարման տարիները ներկայի հետ համեմատելու և անցյալի հուշերը թարմացնելու համար է արվում:

Կարճ ասած՝ սովորական «մեդիազոնդաժ», որը քաղաքակիրթ լեզվով կոչվում է տրամադրությունների ճշտում:

Եվ քանի որ «Փաստ»–ն իր սովորույթի համաձայն ամեն լսածի չէ, որ արձագանքում է, բայց նախագահներին վերաբերող լուրերի հանդեպ, անկեղծ ասած, անտարբեր չի կարող լինել, առավել ևս, երբ խոսքն արտերկրի մամուլում հրապարակված ակնարկներից մեկի մասին է, ուստի որոշեցինք երկրորդ նախագահի՝ քաղաքականություն վերադառնալու մասին լուրի իսկությունը ճշտել առաջին աղբյուրից՝ Ռոբերտ Քոչարյանի գրասենյակի ղեկավար Վիկտոր Սողոմոնյանից: Նա հարցը լսելուց հետո ասաց, որ ինքը մամուլում նման տեղեկությունների չի հանդիպել, իսկ հստակ հարցին պատասխանեց, որ ինքն այդ թեմայով մեկնաբանելու ոչինչ չունի՝ «No comment»:

– «No comment», քանի որ հարցի մասին տեղեկություն չունե՞ք, թե՝ «No comment», որովհետև առայժմ այդ մասին խոսելու ժամանակը չէ: Ամեն դեպքում հնարավո՞ր է, որ Ռոբերտ Քոչարյանին կրկին քաղաքական դաշտում տեսնենք,– հարցրինք նրան:

– Եթե լրագրության գրքերը մեկ անգամ էլ վերընթերցեք, կտեսնեք, որ իմ ասածն էլ է պատասխանի ձև: Ես այդ թեմայով որևէ մեկնաբանություն չունեմ,– պատասխանեց Սողոմոնյանը:

– Մեկնաբանություն չունեք, որովհետև ասելիք չկա՞, թե մեկնաբանություն չունեք, որովհետև ինֆորմացիայի չեք տիրապետում:

– Ես Ձեր հարցի վերաբերյալ մեկնաբանություն չունեմ: Տեսել եք չէ՞, որ գրում են՝ նա հրաժարվեց մեկնաբանել, отказался давать комментарии: Հիմա ես այդ հարցերին մեկնաբանություն չունեմ:

Շարունակությունը՝ «Փաստ» օրաթերթի այսօրվա համարում