Կանաչին տանում են շուկա, հետ բերում ու թափում. «Փաստ»

«Փաստ» օրաթերթը գրում է.

Սպառողական շուկայում վերջին ամիսներին շարունակ գնաճ է արձանագրվում: Չնայած թանկացումներին՝ կանաչեղենի մշակությամբ զբաղվող գյուղացիները պնդում են, որ իրենց արտադրանքը չի սպառվում:

«Կանաչու փունջը 10–20 դրամով չի ծախվում, տանում են շուկա, հետ բերում ու թափում: Կանաչիների պահով ահավոր վիճակ է: Ամենաընտիր կանաչին 30–40 դրամով նույնիսկ չի վաճառվում»,– «Փաստ» օրաթերթի թղթակցի հետ զրույցում ասաց Արմավիրի մարզի Գայ համայնքի բնակիչ Խուրշուդ Քոչարյանը:

Կանաչի շատ են մշակել և կրակն ընկել: Գյուղացու խոսքով՝ առաջարկը շատ է, պահանջարկը՝ քիչ:

«Մարդ չի մնացել այս երկրում, որ առևտուր ունի: Եղածներն էլ միայն մշակում են»,– նկատեց նա:

Միայն ռեհանը մեծ սպառում ունի՝ Ռուսաստանի Դաշնություն է արտահանվում: Այս մշակաբույսից, սակայն, քչերն են կարողանում գումար վաստակել:

«Ռեհանն էլ քիչ են մարդիկ դրել, բայց մեծ պահանջարկ ունի և լավ էլ արտահանվում է»,– տեղեկացրեց գյուղացին:

Մեկ ամսվա ընթացքում գյուղմթերքի՝ մրգի և բանջարեղենի գինը բարձրացել է: Պաշտոնական տվյալներով՝ մրգի ապրանքախմբում 2017 թ. նոյեմբերին 2016 թ. նոյեմբերի համեմատ արձանագրվել է 0,7% գնանկում, իսկ 2017 թ. հոկտեմբերի համեմատ` 13,7% գնաճ:

2017 թ. նոյեմբերին հոկտեմբերի համեմատ բանջարեղենի և մրգի ընդհանուր գնաճը կազմել է 20,7%: Խուրշուդ Քոչարյանի պնդմամբ՝ գին բարձրացնողն իրենք չեն:

««Մեհմանդարի» շուկայում կանաչին 30–40 դրամ է, վերավաճառողները գալիս են գնում և 200–250 դրամով վաճառում»,– նշեց նա:

Թեև հողագործության միջոցով գումար չեն կարողանում վաստակել, բայց շարունակում են այդ գործով զբաղվել, քանի որ այստեղ այլ եկամտի աղբյուր չկա: Գայի բնակչության մեծ մասը գործազուրկ է, կանաչեղենի վաճառքից գոյացած գումարով են տուն պահում: Բնակչության չնչին մասն է միայն արտագնա աշխատանքի մեկնում:

«Ջերմոց չմշակել չեն կարող, բա ինչո՞վ ապրեն: «Նիսյա» սերմն են առնում, մի կերպ հոսանքով տաքացնում, պարտք վերցնում ու մնացած ծախսերն անում, իսկ հետո՝ մի մասին հաջողվում է ծախել, մյուսին՝ ոչ»,– ներկայացրեց նա:

Հողագործը չբացառեց, որ Ամանորի նախաշեմին կանաչեղենի գինը ևս կարող է բարձրանալ: Այդ օրերին պահանջարկը կտրուկ ավելանում է:

«Մի 10 դրամով կավելանա՝ ոչ ավելի: Ամանորից հետո մեր վիճակն ավելի կվատանա, քանի որ պահանջարկ չի լինի»,– կանխատեսեց հողի մշակը:

Արագած համայնքի բնակիչներն էլ շունչ քաշելու ժամանակ չունեն: Ջերմատներում թարխուն են մշակում: Թարխուն մշակում են բոլորը: Քիչ չեն նաև նրանք, ովքեր այս տարի կհրաժարվեն ավանդական գործից:

«Մարդ կա՝ գումար չունի, չի կարողանում մշակել: Մոտ 10%–ը բանկի «սև» ցուցակում են հայտնվել և նոր վարկ ստանալ չեն կարողանում»,– հայտնեց գյուղացիներից Արամ Հակոբյանը:

Գյուղացին հողագործությամբ զբաղվում է միայն վարկերի միջոցով:

«Փող են վերցնում և գնում են ջերմոցի համար նախատեսված շիշ գնում: Խանութում 2000 դրամ արժե, կա նաև վարձակալություն՝ 500 դրամ: Ցելոֆոնն էլ լավ փող է նստում»,– ասաց նա:

Թարխունը տեղական շուկայում է իրացվում, մի մասն էլ՝ արտահանվում: Արագածցիների գործընկերները վրացիներն են: Նրանց առաջարկած գներից, սակայն, գյուղացին դժգոհ է:

«Սրանից մի 10 տարի առաջ փունջը 60–70 դրամով էին տանում, հիմա՝ 25–30: Նրանց մոտ էլ է մենաշնորհ, չորս ընկերներով գալիս են և տանում, ուրիշ մարդ չի գալիս, գներն իրենք են թելադրում: Գալիս են տանում, ասում՝ այնտեղ չի ծախվում: Լճացում է առաջանում, գինն ընկնում է ու վրացիները գալիս էժան տանում են»,– պատմեց հողագործը:

Արազափ համայնքում ևս հիմնականում կանաչեղենի մշակությամբ են զբաղվում: Այստեղ ևս վաճառքի ծավալներից դժգոհեցին: Պատճառը նույնն է՝ կանաչի շատ են ցանել, գնորդը՝ պակաս է:

«Ջերմոցից բացի նաև դաշտերում են տնկում, բերքը շատ է: Էս քանի ամիսներին վաճառքը «վիշի» է եղել, հիմա 10 դրամով չեն կարողանում վաճառել»,– դժգոհեցին նրանք:

Շարունակությունը՝ «Փաստ» օրաթերթի այսօրվա համարում