Կրկին դատական նիստ, կրկին Եղնուկյանի ինքնազգացողությունը վատացել էր. «Փաստ»

«Փաստ» օրաթերթը գրում է.

Երեկ Երևանի Ավան և Նոր Նորք վարչական շրջանների ընդհանուր իրավասության դատարանում ընթանում էր «Սասնա ծռերի» գործը, սակայն առանց մեղադրյալ Կարո Եղնուկյանի ներկայության: Կարո Եղնուկյանի ինքնազգացողությունը երեկ կրկին վատացել էր և հնարավոր չէր նրա՝ դատարան տեղափոխումը:

Պարզվում է, Եղնուկյանի՝ խցում գտնվելու ժամանակ արյան ճնշումն էր բարձրացել, ինչի համար ՔԿՀ–ի աշխատակիցները շտապօգնություն էին կանչել: «Շտապօգնության բժիշկն արձանագրել է, որ Եղնուկյանը հրաժարվել է բուժօգնություն ստանալուց և դեղ ընդունելուց: Ըստ պետի գրության՝ նրա վիճակը թույլ չի տալիս նիստի մասնակցել, ուստի նրա՝ դատարան տեղափոխումն անհնար է»,–հայտնել էր դատավոր Արտուշ Գաբրիելյանը նիստի ընթացքում:

Նրա շահերի պաշտպան Տիգրան Հայրապետյանը միջնորդություն էր ներկայացրել Կարո Եղնուկյանի առողջական խնդիրների հետ կապված վերջինիս դատարան չտեղափոխելու խնդրով:

Եղնուկյանի ինքնազգացողությունը վատանում է արդեն երկրորդ անգամ: Նախորդ դատական նիստին նա նույնպես չէր կարողացել ներկայանալ, կրկին՝ ճնշման տատանման պատճառով: Նրա ինքնազգացողությունը փոխվում է դեպի վատը հենց դատական նիստերի օրերին, ինչը կապված է նաև նյարդերի գերլարվածության հետ: Եղնուկյանը և իր պաշտպանը բազմիցս դիմել են դատարանին` միջնորդությամբ` նրա դատական գործը ընդհանուրից առանձնացնելու պահանջով: Սակայն այդ միջնորդությունը բազմիցս մերժվել է: Չէ՞ որ մենք աննկուն դատական համակարգ ունենք: Եղնուկյանի գործը առանձին լինելու դեպքում մոտ 3–4 դատական նիստի ընթացքում քննված, ավարտին հասցված կլիներ: Իսկ այս պարագայում բավական երկար կտևի: Կալանավորումից արդեն իսկ անցել է 1 տարի, իսկ որպես այդպիսին նրա գործի հետ կապված ոչ մի, ըստ էության, որոշում չկա:

Եղնուկյանի դուստրը՝ Էլմոն Եղնուկյանը, «Փաստի» հետ զրույցում նույնպես հաստատեց, որ իր հայրիկի ինքնազգացողությունը վատացել էր դեռևս քրեակատարողական հիմնարկում, ինչի պատճառով էլ նրան դատարան չէին տարել: Հարցին, թե ո՞րն է եղել պատճառը, որ Կարո Եղնուկյանը հրաժարվել է բժշկական օգնությունից և դեղահաբի ընդունումից, նրա դուստրը պատասխանեց. «Հրաժարվելու պատճառն այն է, որ այդ դեղերը նշանակվել են, հայրս հաջորդ դատական նիստի առավոտյան խմել է և բավական չէ, որ չօգնեց, դեռ ճնշումն ավելի բարձացավ, վատացավ: Դրանից հետո քրեակատարողականի կողմից հրավիրված սրտաբանը և ՔԿՀ–ի բժիշկը առաջարկել էին չափաբաժինը կրկնապատկել, սակայն հայրիկը հրաժարվեց՝ պատճառաբանելով, որ նախորդ անգամ վատացել է ու անիմաստ է դրանց ընդունումը: Ասել էր՝ հիմա ընդունեմ այդ դեղերը, չգիտես՝ հաջորդ անգամ ինչ կլինի»,– նշեց Էլմոնը:

Մեր հարցին, թե արդյոք հայրիկը կասկածներ ունի՞ այդ դեղերի բաղադրության հետ կապված, թե պարզապես չեն օգնում, դրա համար է հրաժարվում օգտագործել, պատասխանեց՝ պատճառը չօգնելն է, հավելելով, որ հայրն ամեն դեպքում այնպիսի միտք չի արտահայտել, թե իրեն նպատակադրված վնասելու փորձեր են անում:

Եղնուկյանի դստեր խոսքով այս ամենը կփոխվի, եթե դատարանը թույլ տա առանձնացել իր հայրիկի դատական գործը. «Եթե անջատվի գործը, նա հանգիստ կլինի, կկարողանա մասնակցել, իրեն լավ կզգա, և մի քանի դատական նիստերով իր գործի քննությունը կավարտվի»,– նշեց նա:

Շարունակությունը՝ «Փաստ» օրաթերթի այսօրվա համարում