Ամեն մեկը տեղից վեր է կենում, ուզում է դայակ աշխատել. «Փաստ»

«Փաստ» օրաթերթը գրում է.

Աշխատող մայրերին պետության աջակցությամբ այսուհետ դայակ վարձելու հնարավորություն կընձեռվի: Պետությունը կփոխհատուցի դայակի աշխատավարձի 50%–ը, եթե կինը, ում խնամքի տակ կա մինչև երկու տարեկան երեխա, որոշել է ընդհատել խնամքի արձակուրդը և ժամկետից շուտ վերադառնալ աշխատանքի:

Այս պարագայում ծնողի և դայակի միջև ստորագրվելու է պայմանագիր: Եթե չկա պայմանագիր, պետությունը չի փոխհատուցում գումարը:

ԱԺ ֆինանսավարկային և բյուջետային հարցերով մշտական հանձնաժողովի նիստում սոցիալական նոր ծրագրի քննարկման ժամանակ պատգամավորները մտահոգություն են հայտնել, որ այս օրենքով դայակները ևս կբերվեն հարկային դաշտ:

Դայակներին հարկելը դայակներ տրամադրող գործակալության ղեկավարը «Փաստ» օրաթերթի թղթակցի հետ զրույցում աբսուրդ որակեց: Հասկանալի պատճառներով նա չցանկացավ ներկայանալ:

«Դայակ կա՝ մեկ տարի է աշխատում, ի՞նչ է, նա դրա համար պետք է հարկային դաշտ մտնի և, օրինակ՝ 60000 դրամ վճարի: Դայակ կա նույնիսկ 3 ամիս է աշխատում: Սխալ է այդպիսի կարգ սահմանելը: Էդ մարդիկ երկու կոպեկ են աշխատում, չպետք է նրանց հարկել»,– նկատեց նա:

Նրա խոսքով՝ այսօր շատերն են ցանկանում դայակ աշխատել: Տարիքի պատճառով մեծ մասը գործազուրկ են դառնում: Պարապ չնստելու փոխարեն որոշում են երեխա խնամել: Դայակի ծառայություն մատուցում են 40 տարեկանից բարձր կանայք:

«Հայաստանում 50 տարեկաններին գործ չկա, կա՛մ կրճատում են, կա՛մ գործի չեն վերցնում, և որոշում են գնան դայակություն անեն»,– ասաց նա:

Դայակի աշխատավարձը սկսվում է 110000 դրամից, կամ էլ կախված է նրանից, թե ինչքան ունևոր է տվյալ փոքրիկի ծնողը: Գործում է նաև ժամավճար: Մեկ ժամ փոքրիկին պահելու համար առաջարկվող գինը տատանվում է 500–ից 1000 դրամի սահմաններում:

«Էդ 500 դրամն էլ է աբսուրդ: Նորմալ գներ պետք է սահմանված լինեն: Էդ գնով օգտվում են նրանք, ովքեր փորձ չունեն: Մեկ– երկու ամիս աշխատում են, փորձ են ձեռք բերում և դուրս գալիս»,– նկատեց մեր զրուցակիցը:

Այդուհանդերձ, նա չի շրջանցում նաև ոլորտի խնդիրները: Դայակներ տրամադրող գործակալության ղեկավարին մտահոգում է այն, որ երեխաներին խնամել ցանկացողները հաճախ կրթություն չեն ունենում:

«Դայակի ինստիտուտը մեր երկրում զարգացած չէ: Պրոֆեսիոնալ դայակներ չկան: Ամեն մեկը վեր է կենում, ուզում է դայակ լինի, բայց դա այդպես չէ: Դայակը պետք է առաջին բուժօգնությունից սկսած ամեն ինչին տիրապետի»,– նկատեց նա:

Ըստ գործակալության ղեկավարի, եթե ինչպես զարգացած երկրներում է, այստեղ էլ դայակները հարկ վճարեն, ապա ոլորտում միայն պետք է բանիմացները գործեն:

Ի դեպ, քիչ չեն դեպքերը, երբ մանկապարտեզի դայակներն աշխատանքից դուրս են եկել և ավելի բարձր գնով մասնավոր ծառայություններ մատուցել:

Հարկերից տուժածը «Իմ դայակ» գործակալությունն է: Այն իր գործունեությունը արդեն դադարեցրել է: Իրենք ծնողներին դայակներ են առաջարկել: Եթե նրանք համագործակցել են, ապա ծնողները գործակալությանը պետք է տոկոսներ վճարեին, ինչը չեն արել:

«Մեզ խաբում էին անգամ պայմանագիր կնքելուց հետո, ասում էին, որ չեն աշխատում, բայց քաղաքը շատ փոքր է, տեսնում էինք, որ այդ դայակը երեխային պահում է: Եթե հարկային դաշտում լինեին դայակները, գուցե նման խնդիրներ չլիներ: Հերիք է ամեն ինչ խաբելով անել, պետք է աշխատել պարզ ու թափանցիկ»,– փոխանցեցին գործակալությունից:

 Շարունակությունը՝ «Փաստ» օրաթերթի այսօրվա համարում