Պետրոս Ղազարյանը քաղաքական գաղջ մթնոլորտի ու գործը սիրով կատարելու մասին. «Փաստ»

«Փաստ» օրաթերթը գրում է.

Քաղաքական մեկնաբան, «Կենտրոն» հեռուստաընկերության «Ուրվագիծ» հաղորդաշարի հեղինակ և վարող Պետրոս Ղազարյանը, ում արդեն երկար տարիներ հաջողվում է հաղորդման բարձր դիտողականություն ապահովել, կարողանում է նույնիսկ քաղաքական այս գաղջ մթնոլորտի պայմաններում ասելիք գտնել ու հեռուստադիտողին հրամցնել:

«Փաստը» որոշեց պարզել, թե այս օրերին, երբ քաղաքական կյանքում առանձնապես տեղատվություններ ու մակընթացություններ չկան, և այն նմանվել է պոլիտբյուրոյի տարիներին, ինչպես է նրան հաջողվում քաղաքական արդյունավետ պրոդուկտ «արտադրել»:

«Ամենամեծ պրոբլեմը հյուրին գտնելն է, քանի որ իրադարձություններ նույնիսկ մեր երկրում են տեղի ունենում: Քաղաքական կյանքն այն օրին են հասցրել, որ այն մեծ հաշվով կանգնած է, բայց քանի որ կյանքն ընդհանրապես չի կարող կանգնել, ուրեմն ասելիք նույնպես պետք է լինի: Մեր երկրում խնդիրների պակաս չկա, բայց մարդիկ, ովքեր մասնագետներ և քաղաքական պրոցեսի կրողներն են, բավականին սակավ են, որը, ցավոք սրտի, ամենամեծ խնդիրն է»,– ասաց Պ. Ղազարյանը:

Քաղաքական դաշտն, ըստ նրա, տխրում է, երբ քաղաքական գործիչներն իրենք են տխուր լինում: Քաղաքական մեկնաբանի կարծիքով միշտ էլ հայաստանյան քաղաքական ներկապնակում եղել են փայլուն դեմքեր: Նրանք հիմա էլ կան, պարզապես չեն երևում, քանի որ մթնոլորտը չի տրամադրում:

«Մեզ մոտ այն սկզբունքը չկա, որ եթե ինչ–որ մի տեղ աշխատանք ես անում, պետք է այն հետաքրքիր անես, որպեսզի դրանից հաճույք ստանաս: Քաղաքականությունը նույնպես աշխատանք է: Նայում ես մարդկանց դեմքին, ոչինչ չի հասկանում, աթոռին նստած տառապում է, բայց դարձել է դեպուտատ: Եթե լուրջ հարց ուղղես, թե ինչո՞ւ է այդ տեղում հայտնվել, ինքն էլ չի կարողանա պատասխանել: Բայց հայտնվել է, որովհետև դա ժամանակի տրենդի մեջ է: Նման մարդիկ չեն հասկանում, որ այդ գործի վրա ծախսած բոլոր րոպեները, ժամերը, օրերը իրենց կյանքից է գնում, էլ չեմ ասում, թե դա ինչքան թանկ է նստում ժողովրդի վրա»,– ասաց Պետրոս Ղազարյանը:

Խոսելով ընդդիմադիր կուսակցությունների քաղաքական դաշտից փաստացի բացակա լինելու մասին, մեկնաբանը նշեց, որ նրանք իրականում ներկայանում են այնքանով, որքանով իրենց ռեսուրսն ու հնարավորություններն են թույլ տալիս:

«Նայեք ՏԻՄ ընտրությունների արդյունքները, 90 տոկոսը Հանրապետական է, մարզերում ընդդիմությունն ընդհանրապես ռեսուրս չունի: Իսկ ընդդիմության ակտիվանալու համար հարկավոր են ֆինանսներ, պետք են մարդիկ, դրա համար մեր նման երկրներում պետք է ոչ թե ասել, որ ընդդիմություն չկա, այլ պետք է ելք փնտրել: Ես կարծում եմ, որ մենք պետք է օրենք ընդունենք, որ ԱԺ անցած կուսակցությունները բյուջեից ավելի մեծ գումար ստանան, որպեսզի կարողանան կենսունակ լինել: Եվ, քանի որ հասարակությունը իր ձայնը տվել է ընդդիմադիր կուսակցությանն իր կյանքը փոխելու, իր տեսակետը ներկայացնելու հնարավորություն պետք է ունենա: Թե չէ, ստացվում է, որ կա մի ուժ, որն օգտվում է պետության ամեն ինչից, իսկ մնացած ուժերը խաղից դուրս են մնում: Հիմա եթե ես ունենամ 10 հատ պիստալետ, դուք մի հատ ռագատկա, մենք իրար հետ կռվենք, դուք կհաղթե՞ք: Նույն իրավիճակն է նաև քաղաքական դաշտում»,– ասաց Պ. Ղազարյանը:

Խոսելով իրենց ընդդիմություն հայտարարած ՕՐՕ դաշինքի մասին, որն այսօր չկա, նա նշեց, որ այն «ադնառազվի» դաշինք էր, որի կենսագրությունն ավարտվեց ընտրություններն ավարտվելուց հետո: Նրա կարծիքով նման դաշինքները նույնիսկ հաղթելուց և խորհրդարանում հայտնվելուց հետո անգամ ոչինչ էլ չէին կարողանա փոխել:

«Իմ կարծիքով եթե լիդերը տեսլական ունի, ապա կապ չունի հաղթել է, թե պարտվել: Պետք է փորձի իր ծրագրերը կյանքի կոչել, որովհետև տեսլական ունի և այդպես է կյանքը տեսնում: Այսինքն, լիդերները պետք է իդեաներ ունենան և այն ինչ–որ ձևով առաջ տանելու ելքեր փնտրեն: Եվ եթե դա չի արվում, ուրեմն դա նրանց տեղը չէ»,– ասաց Պ. Ղազարյանը:

Մեջբերելով մեկ այլ իրավիճակ, երբ օրինակ քաղաքական գործիչ Րաֆֆի Հովհաննիսյանի նման կես տարին մեկ խոսվում է նոր շարժում սկսելու մասին, քաղաքական մեկնաբանը նշեց, որ դա ևս լուրջ չէ:

«Դա էլ է արժեզրկվել, կամ երբ ժամանակ առ ժամանակ նա հայտարարում է Սերժ Սարգսյանի հրաժարականի պահանջի մասին, մոռանալով, որ ինքն էլ իր ներկայությամբ իր ղեկավարած կուսակցությունն է քայքայել»,– ասաց «Ուրվագիծ» հաղորդաշարի հեղինակը:

Վերջերս ձևավորված «Երկիր ծիրանի» կուսակցության մասին էլ նա տեսակետ հայտնեց, թե այն ոչ թե կուսակցություն է, այլ իռացիոնալ քաղաքական ուժ, որը ծնվել է Երևանի ավագանու ընտրություններին մասնակցելու համար, հայտնվել է այնտեղ՝ այլ ընդդիմադիր ուժերի այդ ընտրություններին չմասնակցելու հետևանքով և ավագանու գործունեության ավարտի հետ էլ կուսակցությունը կավարտվի:

Շարունակությունը՝ «Փաստ» օրաթերթի այսօրվա համարում