«Հասարակական պաշտպաններ» ՀԿ նախագահ. «Նազարյան Ռոբերտի հանձնաժողովը միայն ձեռք տնկող է». «Փաստ»

«Փաստ» օրաթերթը գրում է.

«Վեոլիա ջուր» ընկերությունն օգոստոսի 7–ին դիմել է Հանրային ծառայությունները կարգավորող հանձնաժողով` սակագների վերանայման հայտով: Առաջարկել է խմելու ջրի մատակարարման և ջրահեռացման ծառայությունների մատուցման սակագինը 2018 թ.–ի համար ավելացնել 14,3 դրամով:

«Հասարակական պաշտպաններ» ՀԿ նախագահ Արամ Գրիգորյանը «Փաստ» օրաթերթի թղթակցի հետ զրույցում ասաց, որ այսօրվա ջրամատակարարման ծառայությունների մատուցման որակը չի համապատասխանում գնին: Ծառությունների համեմատ առանց այն էլ ջրի գինը բարձր է: Նա այս պարագայում գինը բարձրացնելու անհրաժեշտություն չի տեսնում:

«Եթե որակը չի լավացնելու, ընդհանրապես գնի բարձրացում չպետք է դիտվի»,– նկատեց նա:

Արամ Գրիգորյանը ջրամատակարարման համակարգի խնդիրներն է թվում: Նրա պնդմամբ՝ կան ջրի անթույլատրելի կորուստներ: Ըստ «Հասարակական պաշտպաններ» ՀԿ նախագահի՝ ո՛չ կառավարությունը, ո՛չ հանրային ծառայությունները կարգավորող հանձնաժողովը և ո՛չ էլ «Վեոլիա» ջուրը կորուստները նվազեցնելու խնդիր իրենց առջև չեն դրել:

«Եթե մենք կորուստները 10%-ով նվազեցնենք, գինն այդքան կիջնի: Այդպիսի խնդիր չի դրվել: Սակագներ սահմանելու մեթոդաբանությունը, կարգը խեղաթյուրված է: Դրա համար ցանկացած ընկերություն նայում է իր բիզնեսին, եթե պետք է շատ եկամուտ ունենա, գները բարձրացնում է»,– նշեց մեր զրուցակիցը:

Օրենքով սակագների կարգավորումը հանրային ծառայությունները կարգավորող հանձնաժողովի գործառույթն է, որն, ըստ Գրիգորյանի, չի կատարում:

«Նազարյան Ռոբերտի հանձնաժողովը ոչինչ չի անում, 4–5 հոգի ձեռք են տնկում և վերջ: Բոլոր խնդիրների պատասխան տվողը հանձնաժողովն է և ինքը ոչ միայն սակագների հաստատման հաշվարկ պետք է կատարի, այլև զբաղվի կարգավորման խնդիրներով»,– մատնանշեց նա:

Բացի սա, սակագին սահմանելու գործընթացը կապված է սպառողների և ընկերությունների շահերի պահպանման հետ: Գրիգորյանի խոսքով՝ հանձնաժողովը պարտավոր է պաշտպանել նաև սպառողների շահերը, լսել նրանց դիրքորոշումները:

«Հանձնաժողովն ուղղակի արհամարհել է սպառողների շահերը: Ընկերությունը բերում է սակագին: Նա լսում է վարչապետին ու գին հաստատում: Սա արատավոր երևույթ է»,– վրդովվեց նա:

Իսկ կառավարության նիստում վարչապետ Կարեն Կարապետյանը հանձնարարել է ուղիներ գտնել պահպանելու խմելու ջրի սակագինը: Արամ Գրիգորյանը բարկանում է՝ վարչապետի գործը չէ սակագների կարգավորումը: Գոյություն ունի հանրային ծառայությունները կարգավորող հանձնաժողով: Դա նրա պարտքն է:

«Որևէ մեկը սակագների կարգավորման հարցով հանձնարարություն տալու իրավունք չունի: Դրանք հանձնարարականներով չեն սահմանվում: Գոյություն ունի հանձնաժողով, որն օրենքով սահմանված իր պարտքը պետք է կատարի»,– շարունակեց մեր զրուցակիցը:

Մեր երկրում ամեն ինչ քաղաքականացված է: Ջրի գինը՝ նույնպես: Ըստ նրա՝ տնտեսական մեխանիզմ այստեղ չի գործում:

«Մեկն ասել է՝ այդպես է ձեռնտու: Պայմանագրի մեջ էլ գրել են: Վերևից է ամեն ինչ գալիս»,– եզրափակեց «Հասարակական պաշտպաններ» ՀԿ նախագահը:

Շարունակությունը՝ «Փաստ» օրաթերթի այսօրվա համարում