Աթոռներն ու սեղաններն են վառելու. «Փաստ»

«Փաստ» օրաթերթը գրում է.

Արմավիրի մարզի Արաքս համայնքում գազը դեռ երազանք է։ Համայնքը գազաֆիկացված չէ: Ձմռանն ով ինչպես կարողանում է, տունը տաքացնում է:

«Գյուղացիների մեծ մասն աթարով է տաքացնում, հատուկենտ ընտանիքներ կան, որ փայտ են վառում»,– «Փաստ» օրաթերթի թղթակցի հետ զրույցում դժգոհեցին Արաքսի բնակիչները:

Եղանակն արդեն ցրտել է, բայց արաքսեցիների երդիկներից ծուխ դեռ չի ելնում: Նրանց մեծ մասը չի կարողանում փայտ ձեռք բերել: Այն թանկացել է: Այսօր մեկ խորանարդ մետրը 30000 դրամով է վաճառվում: Հողագործության միջոցով ապրող գյուղացիները փայտին մոտ գալ չեն կարողանում:

«Եթե այս տարի էլ նախորդի պես ցուրտ եղավ, չգիտենք՝ ի՞նչ ենք անելու: Մարդիկ ստիպված են լինելու իրենց տան աթոռներն ու սեղանները կոտրեն ու վառեն: Շատերն էլ անցնելու են մրգատու ծառերին»,– վրդովվեցին նրանք:

Ջերմատան բերքը կորցնելու դեպքերը նույնպես քիչ չեն: Տեղացիները հիշում են՝ նախորդ տարի տեղացած առատ ձյան և քամու պատճառով ջերմոցների 90 տոկոսը ավերվել էր:

«Մարդիկ իրենց եղած– չեղածը վաճառեցին, ցելոֆոն առան ու ջերմոցները վերականգնեցին: Մինչև էսօր վարկի տակից չենք կարողանում դուրս գալ»,– վերհիշեցին մեր զրուցակիցները:

Ջերմոցները նրանց ապրուստի միակ միջոցն են: Գազի փոխարեն ջերմատները շահագործվում են փայտով կամ էլեկտրաէներգիայով: Բայց դրանք էլ չեն հեշտացնում նրանց կյանքը: Հատկապես ձմռան ամիսներին էլեկտրաէներգիայի հետ կապված խնդիրներ են առաջանում: Հոսանքի տատանումների պատճառով բնակիչները էլեկտրատեխնիկայից են զրկվում:

«Երբ սկսում են բոլորը հոսանք օգտագործել՝ ծանրաբեռնվածություն է առաջանում՝ 220 վոլտի փոխարեն լարումը 150 է դառնում: Իմ սառնարանի մատոռն արդեն 3 անգամ փոխել եմ: Տատանումների պատճառով փչացել է»,– բողոքեց բնակիչը:

1600–ից ավելի բնակիչ ունեցող համայնքը դեռ խորհրդային տարիներից է կապույտ վառելիքին կարոտ: Հարևան Մեծամորն ու Հայկաշենն էլ Արաքսի բախտակիցներն են: Այդտեղ նույնպես գազաֆիկացում չկա: Գյուղացիները սրտնեղեցին, որ ամեն համապետական ընտրությունների ժամանակ խոստանում են գազի հարցը լուծել, սակայն, ընտրություններից հետո մոռանում են:

Բոլոր պատկան մարմիններում սահմանամերձ համայնքի խնդրի մասին քաջատեղյակ են: Արաքսեցիների խնդրանքը բազմիցս պատկան կառույցները մերժել են: Ասել են՝ ձեզ գազ չի հասնում:

Վարդան Գրիգորյանը համայնքի ղեկավարի պաշտոնում ընտրվելուց հետո առաջինը հենց գազի խնդրի վրա է կանգ առել: Նամակ է գրել կառավարություն: Պատասխանը, սակայն, նրան չի գոհացրել: Հայտնել են, որ 2017 թվականին նախատեսված չէ այդտեղ գազ անցկացնել: Կապույտ վառելիքը սահմանամերձ բնակավայր հասցնելու համար նախնական հաշվարկով 475 միլիոն դրամ է անհրաժեշտ:

«Ասել են՝ շահավետ չէ, բայց մենակ մենք չենք օգտվելու դրանից: Էդ տարածքում 3 գյուղ կա, դրանք ևս օգտվելու են»,– ասաց նա:

Շարունակությունը՝ «Փաստ» օրաթերթի այսօրվա համարում