Վիկտոր Դալլաքյանը հարցազրույց չի տալիս. «Փաստ»

«Փաստ» օրաթերթը գրում է.

Երկար ժամանակ է հայտնի քաղաքական գործիչ Վիկտոր Դալլաքյանը հարցազրույցի կամ ասուլիսի ձևաչափով չի հանդիպել ԶԼՄ ներկայացուցիչների հետ: «Փաստի» թղթակիցը փորձեց տեղեկանալ նրանից, թե ինչպես են Դալլաքյանի և իր հիմնած կուսակցության գործերը:

– Ինչպես են Ձեր գործերը, Ձեր կողմից ստեղծած կուսակցությունն ինչո՞վ է ներկայում զբաղվում:

– Շնորհակալություն, ձեզ հաջողություն եմ ցանկանում, որ հետաքրքրվում եք մեզանով:

– Շնորհակալ եմ, բայց կասե՞ք ինչով եք զբաղվում, առաջիկայում ՏԻՄ ընտրություններ են:

– Ես հեռախոսային հարցազրույցներ չեմ տալիս, լա՞վ:

– Իսկ ինչպե՞ս կարող ենք պայմանավորվել հարցազրույցի համար, պարոն Դալլաքյան:

– Եթե ես ասելիք ունենամ, ես լրագրողներին կհրավիրեմ, իմ ասելիքը կասեմ, լա՞վ:

– Շատ լավ, իսկ ե՞րբ սպասենք Ձեր ասելիքին, պարոն Դալլաքյան:

– Ես ձեր հասցեն, ձեր տեղը գիտեմ, ձեզ էլ լավ եմ վերաբերվում:

– Մոտավոր ժամկետ չե՞ք ցանկանում նշել:

– Իհարկե՝ ոչ:

– Ինչո՞ւ:

– Հիմա մենք հարցազրո՞ւյց ենք անում, ասեցի հարցազրույց չենք անում չէ՞: Կիմանաք, պատշաճ ձևով կտեղեկանաք, լա՞վ: Հիմա հաջողություն և շնորհակալություն:

Հ.Գ. Հանուն անկեղծության նշենք, որ «Փաստը» բոլոր քաղաքական կուսակցությունների ու գործիչների հանդեպ մեծագույն հարգանք է դրսևորում և ուշադիր է նրանց հանդեպ: Եվ քանի որ ԱԺ ընտրություններից հետո շատ քաղաքական կուսակցությունների, ինչպես նաև կուսակցությունների դաշինքների ղեկավարներ կամ ներկայացուցիչներ տևական ժամանակ ԶԼՄ–ներով հանդես չեն գալիս և չեն ներկայացնում իրենց տեսակետը երկրում կատարվող իրադարձությունների մասին, այդ իսկ պատճառով մենք փորձեցինք խախտել անդորրը և դիմել ոչ վաղ անցյալում բավականին ակտիվ գործունեություն ծավալած քաղաքական գործիչներին, իմանալու նրանց կարծիքը մեր երկրի ներկայի արտաքին և ներքաղաքական իրադարձությունների վերաբերյալ: Այնուամենայնիվ ևս մեկ անգամ ընդգծենք, որ «Փաստի» դռները բաց են բոլոր քաղաքական կուսակցությունների համար և պատրաստ ենք լսել բոլորի տեսակետը երկրում և երկրի սահմաններից դուրս ծավալվող իրադարձությունների մասին:

Շարունակությունը՝ «Փաստ» օրաթերթի այսօրվա համարում