«Վարորդի ընկեր» ՀԿ նախագահ. «Մոտ ապագայում մեզ մոտ երթևեկությունը չի կարգավորվի». «Փաստ»

«Փաստ» օրաթերթը գրում է.

Օրեր առաջ վարչապետ Կարեն Կարապետյանը հանձնարարական տվեց Տրանսպորտի, կապի և տեղեկատվական տեխնոլոգիաների նախարարին, Քաղաքաշինության պետական կոմիտեի նախագահին, Ոստիկանության պետին և Երևանի քաղաքապետին՝ երկու ամսվա ընթացքում ուսումնասիրել մայրաքաղաքում խցանումների պատճառները և դրանք վերացնելու ուղղությամբ առաջարկություններ ներկայացնել:

Թեմայի շուրջ «Փաստ» օրաթերթը զրուցել է «Վարորդի ընկեր» հասարակական կազմակերպության նախագահ Տիգրան Քեյանի հետ

– Պարոն Քեյան, որո՞նք են խցանումների հիմնական պատճառները:

– Պատճառները շատ են. վարորդները երթևեկության կանոնները պահպանելու նկատմամբ կարգապահ չեն, քաղաքային տրանսպորտն անկանոն է երթևեկություն իրականացնում: Երթևեկության ժամերը ևս խցանումների պատճառ են դառնում: Ավտոկայանատեղիները բացակայում են: Օրինակ՝ Հերացի փողոցում մշտապես խցանումներ կան: Բժշկական համալսարանի մոտ կայանատեղիներ չկան, ստիպված երկրորդ գիծ են կայանում և խցանումների պատճառ դառնում: Այն վայրերը, որտեղ հասարակության շարժը շատ է, պետք է երթևեկությունը կանոնակարգվի: Քաղաքապետարանների, վարչական շրջանների հարակից տարածքներում պետք է կայանման տեղեր սահմանվեն, որպեսզի ավտոմեքենաները երկրորդ և երրորդ շարքերում չկանգնեն և խցանման պատճառ չհանդիսանան: Իսկ քաղաքային տրանսպորտի անկանոն երթևեկությունն ինքնին բերում է նրան, որ տվյալ հատվածում մի քանի ավտոմեքենաներ են կայանում և խնդիրներ են առաջանում: Խցանումների մեծ մասն առաջանում է խոշոր վթարների դեպքում:

– Պաշտոնական տվյալները փաստում են, որ մեքենաների ներկրումն ավելացել է: Արդյոք սա ևս խցանումների առաջացման պատճառ չէ՞:

– Մեքենաների քանակն իսկապես ավելացել է, դա պատճառներից մեկն է: Բացի այդ էլ, կան փողոցներ, որոնք ի սկզբանե նախատեսված չեն այդչափ մեքենաների միաժամանակյա երթևեկն ապահովելու համար: Ուստի պետք է այլ հանգույցներ կառուցվեն, որոնք կբեռնաթափեն հիմնական փողոցները, բայց այնպես, որ դրանք ավելի չծանրաբեռնեն ու խճճեն երթևեկությունը: Պետք է ավելացնեն միակողմանի երթևեկությունները, որոնք խնդիրը լուծելու ուղիներից մեկը կարող են հանդիսանալ: Աթենք քաղաքում Երևանից ավելի շատ են մեքենաներ երթևեկում, քանի որ այնտեղ միակողմանի ճանապարհները գերակշռում են երկկողմանիներին, գրեթե խցանում չկա: Այնտեղ մեքենաների քանակը տասն անգամ ավել է: Մեզ մոտ կենտրոնական ավտոկայանի ճանապարհին՝ Իսակով պողոտայում են խցանումներ լինում, դա կարելի է լուսացույցերի միջոցով կարգավորել: Ավելացնեմ, որ մեզ մոտ դժվար է միանգամից երթևեկությունը կարգավորել, քանի որ վարորդների մեծ մասն անկարգապահ է: Իրենք երկրորդ գոտուց երրորդ գոտի են տեղափոխվում՝ չզիջելով ճանապարհը, խցկվում են մեքենաների արանքներում, որը տվյալ հատվածում լրացուցիչ ծանրաբեռնվածություն է առաջացնում: Վարորդն էլ պետք է կարգապահ լինի, որ խնդիրը կարգավորվի: Միայն ծրագրեր մշակելով և ընդունելով հարցը լուծում չի ստանա:

– Արդյոք հնարավո՞ր է կանոնակարգել երթևեկությունը և խնդիրը վերացնել:

– Հնարավոր է, եթե այդ ուղղությամբ աշխատեն: Դպրոցների, ուսումնական հաստատությունների մոտակայքում պետք է կայանատեղիներ ստեղծվեն: Վարորդների կարգապահության մակարդակը պետք է բարձրացնել՝ նույնիսկ դասընթացներ կազմակերպելով: Վարորդական վկայականների ձեռքբերումը պետք է մատչելի չլինի: Դպրոցներում պետք է երթևեկության կանոններ ուսուցանեն, որպեսզի դեռ փոքր տարիքից իրազեկված լինեն երթևեկության մասին: Ծանրաբեռնված հատվածներում կատարեն երթևեկության փոփոխություն: Օրինակ՝ Կոմիտաս փողոցն ամբողջությամբ փոփոխվեց՝ չորրորդ գոտի ավելացավ:

– Պատրաստվում են Երևան քաղաքի տրանսպորտային խնդիրը կարգավորելու ուղղությամբ քայլեր ձեռնարկել, մասնավորապես, գազելները փոխարինել ավտոբուսներով: Ըստ Ձեզ, ի վերջո, խնդիրը լուծում կստանա՞:

– Կառավարության տվյալ կառույցի աշխատակիցները հիմնականում տեսականորեն են մի քանի փոփոխություններ կատարում՝ պրակտիկորեն այն չկիրառելով: Իսկ դա խնդիրներ է առաջացնում: Ինձ չի թվում, որ մոտ ապագայում մեզ մոտ երթևեկությունը կկարգավորվի: Վթարների հետ կապված են խցանումներն առաջանում: Ապահովագրական գործակալությունն ուշ է տեղ հասնում, վթարված մեքենաներն ավելի երկար են կանգնում՝ զբաղեցնելով ամբողջ փողոցը: Պետք է կայանատեղիներ ստեղծել: Գազելը վերացնելով` խնդրին լուծում չի տրվի: Անկանոն երթևեկությունը պետք է կարգավորել և միակողմանի ճանապարհների թիվն ավելացնել:

Շարունակությունը՝ «Փաստ» օրաթերթի այսօրվա համարում