Բարձրագույն կրթություն ունեցողները կազմում են գործազուրկների 9,7%–ը. «Փաստ»

«Փաստ» օրաթերթը գրում է.

2017 թ.–ի հոկտեմբերի 1–ի դրությամբ աշխատանք փնտրողների թիվը

Լոռու մարզում կազմում է շուրջ 9,8 հազար մարդ, որը նախորդ տարվա նույն ժամանակահատվածի նկատմամբ նվազել է 15,4%–ով: Գործազուրկների թվաքանակը կազմում է աշխատանք փնտրողների 95,8%–ը կամ 9400 մարդ: «Փաստ» օրաթերթի հարցմանն ի պատասխան տեղեկացրին Զբաղվածության պետական գործակալությունից:

Այս ցուցանիշը նախորդ տարվա նույն ժամանակահատվածի նկատմամբ նվազել է 12,4%–ով: Աշխատանք չունեցող կանայք կազմում են գործազուրկների թվի 69,4%–ը, կամ 6500 մարդ: Գործազուրկի կարգավիճակ ունեցողների 24,4%–ը երիտասարդ է, 2,7%–ը՝ հաշմանդամություն ունեցող: Աշխատանք փնտրողների մեծ մասը Վանաձորից են: Ըստ ԱՎԾ–ի տվյալների՝ մարզում գործազրկության մակարդակը

2016 թ. կազմել է 12,3%, որը 2015 թ. նկատմամբ նվազել է 3,4%–ով: Աշխատանք չունեցողների թվաքանակում մեծ թիվ են կազմում կրթության և մանկավարժության, տնտեսագիտության և կառավարման, առողջապահության ոլորտի մասնագետները: Իսկ մասնագիտություն չունեցողները կազմում են գործազուրկների 64,2%–ը:

Հատկանշական է, որ բարձրագույն և հետբուհական կրթություն ունեցողները կազմում են գործազուրկների 9,7%–ը, թերի բարձրագույն և միջին մասնագիտական կրթություն ունեցողները` 22,1%–ը, արհեստագործական կրթությունը` 4,1%–ը, միջնակարգ ընդհանուրը՝ 57,3 հիմնական ընդհանուր, հատուկ ընդհանուր և տարրական կրթություն ունեցողները՝ 6,8%–ը:

Լոռիում գործազուրկների թվում 20–29 տարեկանները կազմում են 24,4%–ը,

30–44 տարեկանները 42,1%–ը: 40–ից բարձր տարիք ունեցողների 18,5%–ն է գործազուրկ: Աշխատանք չունեցողների 15%–ը 50 տարեկաններից բարձրերն են կազմում: Ընթացիկ տարում աշխատանքի է տեղավորվել 667 աշխատանք փնտրող: Աշխատանքի տեղավորման լուրջ խնդիրներ, սակայն, ունեն առաջին անգամ աշխատանք փնտրողները: Նրանք կազմում են աշխատանք փնտրողների 46%–ը: Նշենք, որ զբաղվածության պետական գործակալության կողմից աշխատանքի տեղավորվածները աշխատում են հիմնական արդյունաբերության, մեծածախ և մանրածախ առևտրի, ավտոմեքենաների և մոտոցիկլների նորոգման, սպասարկման այլ ծառայությունների ոլորտներում: Աշխատաշուկայի լարվածությունը մեղմելու նպատակով իրականացվել են զբաղվածության կարգավորմանն ուղղված 2 պետական ծրագրեր: Արդյունքում 133 անձինք աշխատանք են գտել:

Շարունակությունը՝ «Փաստ» օրաթերթի այսօրվա համարում