Տհաճ միջադեպ արգենտինական տանգոյի երեկոյի ժամանակ. «Փաստ»

«Փաստ» օրաթերթը գրում է.

Հայաստանի և Արգենտինայի դիվանագիտական հարաբերությունների 25–ամյակի շրջանակներում Կոնվերս Բանկը և Հայաստանում Արգենտինայի դեսպանությունը հոկտեմբերի 9–14–ը Երևանում անցկացնում են «Արգենտինական տանգոյի շաբաթ» խորագրով միջոցառումների շարք:

Նախագծի շրջանակներում հոկտեմբերի 12–ին, ժամը 19:00–ին, Արամ Խաչատրյան համերգասրահում տեղի ունեցավ արգենտինական տանգոյի երեկո:

Երեկոյի ընթացքում հանդես եկած Պաբլո Մաինետտին, Ջորջ Մենդոզան և Չեչիլիա Մասեն այդպես էլ չիմացան, թե ինչ իրարանցում է ամֆիթատրոնում:

Մեծ թվով հանդիսականներ տոմսեր էին գնել ու փորձում էին նստել իրենց տեղերում: Սակայն բոլոր նրանց, ովքեր տոմսեր էին գնել ամֆիթատրոնի տեղերից, ուղղակի վռնդեցին:

Ի՞նչ իրավունք ունեն: Համերգասրահի աշխատակազմի ներկայացուցիչները բոլորին ստիպում էին իջնել ամֆիթատրոնից ու տեղավորվել ներքևում՝ պարտերում: Պատճառաբանում էին, թե ամֆիթատրոնում պետք է նստեն միայն նախարարությունների ներկայացուցիչները:

Այդ դեպքում թող չվաճառեին այդ տոմսերը:

Վերջում պարզվեց, որ ամֆիթատրոնի հարևանությամբ ֆուրշեթ են կազմակերպել, և նախարարությունների ներկայացուցիչները պիտի «քեֆ» անեին: Ի դեպ, նրանցից համարյա մարդ չէր էլ եկել:

Իսկ ամֆիթատրոնի տոմսեր գնած հանդիսականները վրդովված հեռացան համերգից:

Ո՞վ է իրավունք տվել վիրավորել մարդկանց նախարարությունների ինչ–որ դեմքերի հաճոյանալու համար:

Շարունակությունը՝ «Փաստ» օրաթերթի այսօրվա համարում