3 երեխայի հայր էր, պոստերից նոր էր վերադարձել. նոր մանրամասններ՝ Արմավիրի ողբերգական վթարից

«3 երեխայի հայր էր, ծնողները մահացած են։ Արհեստավոր մարդ էր։ Ինչով կարողանում՝ օգնում էր համագյուղացիներին։ 25-օրյա հավաքների էր մասնակցել, պոստերից նոր էր վերադարձել»,- Oragir.News-ի հետ զրույցում ասաց ողբերգական ավտովթարի զոհ դարձած, Արմավիրի մարզի Խոյ համայնքի Ծիածան գյուղի 34-ամյա բնակիչ Վազգեն Կ․-ի համագյուղացիներից մեկը։

Նրա խոսքով՝ սոցիալապես շատ անապահով ընտանիք էին։ Մահացած Վահզգեն Կ.-ն հիմնականում շինարարության գործերով էր զբաղվում և հողագործությամբ:

«2 երեխաները մանկահասակ են, իր հետ վթարի ժամանակ մեծ տղան է եղել։ Ինչքանով տեղյակ ենք՝ արդեն վիճակը կայուն է, բայց դեռ կշարունակի մնալ հիվանդանոցում»,- ասաց Վազգեն Կ.-ի համագյուղացին։

Թե ինչպես է դեպքը տեղի ունեցել՝ Oragir.News-ի զրուցակիցը տեղյակ չէր։

Հիշեցնենք, որ մարտի 19-ին ողբերգական ավտովթար է տեղի ունեցել Արմավիրի մարզում: Ժամը 01:40-ի սահմաններում Արմավիրի մարզի բնակիչ 34-ամյա Վազգեն Կ.-ն իր վարած «Opel Astra» մակնիշի ավտոմեքենայով Աղավնատուն վարչական բնակավայրի տարածքում, դեռևս անհայտհանգամանքներում, դուրս է եկել երթևեկելի գոտուց, բախվել հողաթմբերին և կողաշրջված վիճակում հայտնվել ծառի մոտ: