Շնորհավոր Ամանոր և Սուրբ Ծնունդ. «Փաստ»

«Փաստ» օրաթերթը գրում է.

Մոտենում է Ամանորը, և քանի որ ձեր ձեռքին «Փաստի»՝ այս տարվա վերջին համարն է, փորձենք դարձյալ ամփոփել 2016 թվականը: Չգիտեմ՝ ձեր քիմքին որքանով հարմար կգա ոլորտային մեր ընտրությունը, այդուհանդերձ, փորձել ենք հնարավորինս տարողունակ և հետաքրքիր դիտարկումներ անել՝ օգտվելով ամենատարբեր ռեսուրսների օգնությունից:
Ամենաազդեցիկ մարդիկ
Եվ այսպես՝ ովքեր են եղել արդեն անցնող տարվա հինգ ամենաազդեցիկ մարդիկ՝ աշխարհի կտրվածքով՝
• ՌԴ նախագահ Վլ. Պուտին
• ԱՄՆ նորընտիր նախագահ Դոնալդ Թրամփ (Ի դեպ՝ Times–ի դիտարկմամբ՝ Թրամփը աշխարհի մարդ ճանաչվեց)
• Գերմանիայի կանցլեր Անգելա Մերկել
• Չինաստանի Կոմկուսի առաջնորդ Սի Ցզինպին
• Հռոմի Ֆրնացիսկոս պապ

Աշխարհի ամենաբարգավաճ երկրները
Legatum Institute–ը, հաշվի առնելով այնպիսի չափանիշներ, ինչպիսիք են՝ տնտեսությունը, առողջապահությունը, կրթությունը, անվտանգությունը, մարդու ազատությունը և այլ բազիսային ցուցանիշներ՝ կազմել է աշխարհի ամենաբարգավաճ երկրների ցանկը: Ըստ այդմ՝ դիտարկենք առաջին հնգյակը, ցավոք, մոռանալով Հայաստանի մասին, որովհետև նույնիսկ մեր ռազմավարական դաշնակից և ամեն ինչում մեզ համար օրինակելի ՌԴ–ն հայտնվել է ամոթալի 95–րդ տեղում: Սկանդինավյան երկրները, ինչպես միշտ, առաջատար տեղերում են: Եվ այսպես՝
• Նոր Զելանդիա,
• Նորվեգիա,
• Ֆինլանդիա,
• Շվեյցարիա,
• Կանադա

Ամենագեղեցիկ կանայք
Mundo ռեսուրսը, ներկայացնելով աշխարհի ամենագեղեցիկ կանանց՝ առաջին տեղը վերապահել է հայուհիներին: Դե գոնե մի բանով պիտի՞ մխիթարվենք, թե ոչ: Եվ այսպես՝ գեղեցկուհիներ.
Հայուհիներ, ավստրալուհիներ, բրազիլուհիներ, բուլղարուհիներ, բարբադոսուհիներ

Ամենահարգի բուհերը
Կարծում եմ, հարստությունից այսքան խոսելուց հետո տեղին կլինի կրթությանը նույնպես անդրադառնալ, առանձնացնելով հինգ ամենահարգի բուհերը՝ ըստ Quacquarelli Symonds ռեսուրսի: Այսպիսով՝
ԱՄՆ Մասաչուսեթսի տեխնոլոգիական համալսարան, ԱՄՆ Սթենֆորդի համալսարան, ԱՄՆ Հարվարդի համալսարան, Մեծ Բրիտանիայի Քեմբրիջի համալսարան, ԱՄՆ Կալիֆոռնիայի տեխնոլոգիական ինստիտուտ:

Ամենաշատը վճարվող հինգ մարզիկները
Քանի որ սպորտն ամբողջ աշխարհում քաղաքականությանը հավասար է հետաքրքրում բոլորին, փորձեցինք ընթերցողին նաև այս ոլորտի առաջատարներին հրամցնել, բայց փորձագետների շրջանում այնպիսի շփոթ էր, որ կենտրոնացանք Forbes–ի՝ ամենահարուստ կամ ամենաշատը վճարվող հինգ մարզիկների սանդղակի վրա: Ըստ այդմ՝
• Քրիշտիանու Ռոնալդու՝ տարեկան 88 մլն դոլար եկամուտ
• Լիոնել Մեսսի՝ 81,4 մլն դոլար
• Լոբրոն Ջեյմս՝ 77,2 մլն դոլար
• Ռոջեր Ֆեդերեր՝ 67,8 մլն դոլար
• Քեյվին Դյուրանտ՝ 56,2 մլն դոլար:

Ամենահարուստ մարդիկ
Իհարկե, վատ չէր լինի 2016–ի կտրվածքով ամենահարուստ մարդկանց առաջին հնգյակին էլ ծանոթանալ, և այս հարցում մեզ դարձյալ օգնության է հասնում Forbes–ը:
• Ամերիկացի գործարար, Microsoft հիմնադիր Բիլ Գեյթս՝ 75 մլրդ դոլար կարողություն
• Իսպանացի Ամանսիո Օրտեգա, Zara–ի հիմնադիր՝ 67 մլրդ դոլար
• Ամերիկացի Ուորեն Բաֆեթ, Berkshire Hathaway–ի հիմնադիր՝ 60,7 մլրդ դոլար
• Կարլոս Սլիմ Էլու, հեռահաղորդակցության ոլորտում մեքսիկացի գործարար՝ 50 մլրդ դոլար
• Ամերիկացի գործարար Ջեֆ Բեզոս՝ Amazon հարթակի հիմնադիր՝ 45,2 մլն դոլար

Արվեստի բնագավառում ամենաազդեցիկ անձինք
Քանի որ կրթությանը ձեռք ձեռքի է քայլում արվեստը, անդրադառնանք արվեստի բնագավառում ամենաազդեցիկ հինգ անձանց՝ ըստ ArtReview ռեսուրսի:
• Հանս–Ուլրիխ Օբրիստ՝ շվեյցարական Serpentine Galleries–ի արտ–տնօրեն,
• Ադամ Շիմչիկ՝ լեհական Documenta 14,
• Այվան և Մանուելա Վիրտեր՝ շվեյցարական գալերիստներ,
• Դեյվիդ Ցվիրներ՝ գերմանական գալերիստ,
• Նիկոլաս Սերոտա՝ ՌԴ Гараж ժամանակակից արվեստի թանգարանի հիմնադիր

Ամենահարգի բրենդները
Ամփոփումների՝ մեր կողմից ընտրված ցանկն, իհարկե, արժե շարունակել հինգ առաջատար բրենդների ներկայացմամբ, Ամանորի շեմին չկենտրոնանալով պատերազմների, թեժ կետերի ու տխուր իրադարձությունների վրա: Այսպիսով, ըստ Stuff ռեսուրսի, դրանք հետևյալն են՝
Apple, Google, Coca–Cola, Microsoft, Toyota

Լավագույն հինգ գաջեթները
Նույն ռեսուրսի դիտարկմամբ՝ լավագույն հինգ գաջեթներն էլ արժանի են ուշադրության՝ 1. OnePlus 3 – տարվա սմարթֆոն, 2. Fujifilm X–T2 – տարվա ֆոտոապարատ, 3. Apple iPad Pro 9.7" – տարվա համակարգիչ, 4. Amazon Echo – տարվա սմարթ դինամիկ կամ տնային գաջեթ, 5. Pokemon Go – տարվա լավագույն խաղը

Այսքանից հետո ինձ մնում է շնորհավորել բոլորիդ՝ մաղթելով, որ հաջորդ տարի Հայաստանը ոչ միայն ապրի խաղաղության ու բարգավաճման տիրույթում, այլև զանազան առաջատար դիրքեր զբաղեցնի այս կամ այն վարկանիշային սանդղակներում:
Շնորհավոր Ամանոր և Սուրբ Ծնունդ, սիրելի ընթերցողներ: Թող բոլորիդ 2017 թվականը միայն ուրախություն և ամենատարբեր հաջողություններ բերի:

Էջը պատրաստեց Գոհար Սիմոնյանը

Շարունակությունը` «Փաստ» օրաթերթի այսօրվա համարում: