Փաշինյանը հաստատեց, որ գնում է արտահերթ ընտրությունների

Գործող իշխանություններն ամիսներ շարունակ տարհամոզում են հանրությանը, պնդում, թե մտադիր չեն արտահերթ խորհրդարանական ընտրություններ անցկացնել, մինչդեռ յուրաքանչյուր ողջամիտ մարդ էլ ունի նման տպավորություն։ Ի վերջո, երեկ հրապարակած իր տեսաուղերձում Փաշինյանն անուղղակի հաստատել է, որ իշխանությունը պատրաստվում է արտահերթ գործընթացների։

Օրեր առաջ խորհրդարանն ընդունեց «Եվրաքվեն»՝ Եվրամիության անդամակցության գործընթաց սկսելու մեկնարկի նախագիծը, որը պետք է ամրագրվի Սահմանադրության մեջ, հանրաքվեով։ Երեկ էլ հայտարարել է նոր Սահմանադրություն ընդունելու անհրաժեշտության մասին։ Ակնհայտ է, որ նման հանրաքվեների, հատկապես, երբ դրանք վտանգ են ներկայացնում Հայաստանի համար, մասնակիցների թիվը չափազանց փոքր է լինելու։ Իշխանությունը խնդիր է ունենալու այդ առումով։ Բազմաթիվ վերլուծաբաններ նշել են ամիսներ շարունակ, որ հանրաքվեներին մասնակիցների թիվ ապահովելու համար իշխանությունը միաժամանակ նաև խորհրդարանական ընտրություններ է անցկացնելու, ինչը թույլ կտա ապահովել անհրաժեշտ մասնակիցների թիվը։

Ի դեպ, առայժմ միայն «Հայաստան» դաշինքն է հստակ արտահայտվել արտահերթ խորհրդարանական ընտրությունների մասով, Ռոբերտ Քոչարյանն օրերս նշեց, որ դաշինքը ծանրակշիռ մասնակցություն է ունենալու գործընթացներին, լինեն՝ արտահերթ, թե՝ հերթական։ Իսկ դա նշանակում է, որ ընդդիմությունն էլ աստիճանաբար մտնում է նախընտրական քարոզչության փուլ՝ բարդացնելով գործող իշխանությունների կյանքը։

Ամեն դեպքում, չարժե ծաղրել Փաշինյանին, անհեթեթ գնահատելով նրա հայտարարությունները։ Վերջինս հրաշալի գիտի, թե ինչ է անում, ինչպես է ապամոնտաժում պետական համակարգը, կախվածության մեջ գցում Ադրբեջանից ու Թուրքիայից։ Եվ սոցցանցերում նրան ու իր թիմին ծաղրելու փոխարեն պետք է սթափ ու լուրջ գնահատել վտանգը, արագ պատրաստվել արտահերթ գործընթացների։ 

Անահիտ Վարդանյան