«Բեսթ Վեստերն Փարադայս»–ի դելֆինաթերապիան զայրացրել է հանրությանը. «Փաստ»

«Փաստ» օրաթերթը գրում է.

Օրեր առաջ «Բեսթ Վեստերն Փարադայս Դիլիջան» հյուրանոցի ֆեյսբուքյան էջում հայտնվեց մի տեսահոլովակ, որը տեղեկացնում էր հյուրանոցում դելֆինաթերապիաներ անցկացնելու ծառայության մասին:

«Արդեն գործում է իր տեսակի մեջ բացառիկ և տարածաշրջանում միակ ծառայությունը` դելֆինաթերապիա և լող դելֆինների հետ: Դելֆինաթերապիան մեծ հնարավորություն է սահմանափակ կարողություններով երեխաների վերականգնման և միջավայրի ճիշտ ընկալման համար: Դելֆինների հետ լողը տալիս է դրական լիցքեր, ինչի շնորհիվ վերականգնվում և ամրապնդվում է իմունային համակարգը: Սիրով տեղեկացնենք, որ մեր հմուտ մասնագետները` արտերկրում գործող տարիների փորձ անցած «Морская Звезда»–ի լավագույն մասնագետներն են, ովքեր հոգ են տանում և՛ ձեր, և՛ դելֆինների առողջության մասին: Յուրաքանչյուրի համար անհատական հատուկ ծրագիր կկազմվի ըստ առողջական վիճակի գնահատման` լավագույն արդյունքի հասնելու համար: Դելֆինների համար կառուցված է հատուկ լողավազան` բաղկացած հանգստի և լողի գոտիներից, և որն ունի ծովի ջրի բոլոր բնական տարրերը»,– ասված է տեսանյութին ուղեկցող մեկնաբանության մեջ:

Տեսանյութից տեղեկանում ենք, որ այդ դելֆինները բերվել են Սոչիից, և հատուկ շեշտվում է, թե նրանք ծնվել են հենց լողավազանում: Ինչը հավանաբար ըստ հյուրանոցի սեփականատիրոջ՝ կարող է մեղմացուցիչ հանգամանք հանդիսանալ բնության այդ հրաշք կենդանիներին անազատության մեջ պահելու համար: Տեսանյութում անգամ ասվում է, թե շենքը հատուկ դելֆինների համար է կառուցվել, ջուրն էլ ունի հատուկ դելֆիններին համապատասխան աղիություն:

Երևի թե ավելորդ է հիշեցնել, թե ինչպիսի աղմուկ էր բարձրացվել սրանից 7 տարի առաջ Երևանի դելֆինարիումի հետ կապված, և թե ինչպես էին բնապահպաններն ու ակտիվիստները պայքարում դրա գոյության դեմ՝ փորձելով պաշտպանել դելֆինների կյանքը:

Ի դեպ, հյուրանոցի այս նորամուծությունը նույնպես չի վրիպել վերջիններիս հայացքից: Հաշված ժամերի ընթացքում հյուրանոցի ֆեյսբուքյան էջի միջին գնահատականը դարձել է 1,9՝ «շնորհիվ» 230 օգտատերի, ովքեր էջը գնահատել են 1 միավոր: Նշենք, որ հոդվածը պատրաստելու ընթացքում բացասական գնահատականներ դնողների թիվն ավելանում էր, իսկ հյուրանոցի ֆեյսբուքյան էջի գնահատականը իջնում:

Ինչ վերաբերում է այս էկզոտիկ ծառայության արժեքներին, ապա դրանք տատանվում են 15–20 հազար դրամի սահմաններում: Այսպես՝ դելֆինների հետ լողի 15 րոպեն կարժենա 20 հազար դրամ, իսկ մինչև 10 տարեկան երեխաների դեպքում ծնողը կվճարի 5 հազար դրամ։

Հյուրանոցի ադմինիստրացիայից փորձեցինք մանրամասներ ճշտել դելֆինների՝ Հայաստանում և ապա հյուրանոցի լողավազանում հայտնվելու, արդյունքում էլ՝ բիզնես նպատակներին ծառայելու օրինականության, ինչպես նաև ծառայության իրականացման թույլտվության վերաբերյալ: Հյուրանոցի աշխատակիցը, լսելով մեզ հուզող հարցերը, խոստացավ հեռախոսահամարը փոխանցել տնօրենին՝ լիարժեք պատասխան ստանալու նպատակով:

Հավելենք, որ հյուրանոցի ֆեյսբուքյան էջում իրենց նոր ծառայության մասին տեղեկացնելուց հետո, էջը ողողվել է բացասական մեկնաբանություններով թե՛ բնապահպանների և թե՛ պարզապես ոչ անտարբեր մարդկանց գրառումներով, ովքեր հյուրանոցի ղեկավարությանը կոչ են անում հրաժարվել այդ գաղափարից ու կենդանիներին վերադարձնել վայրի բնություն:

Շարունակությունը՝ «Փաստ» օրաթերթի այսօրվա համարում