«Հայաստանի էլեկտրական ցանցեր» ընկերությունը կրկին պարտատոմսեր է թողարկել

«Հայաստանի էլեկտրական ցանցեր» ընկերությունը թողարկել է դոլարային և դրամային պարտատոմսեր` 20 միլիոն դոլար և 7,7 մլրդ դրամ ընդհանուր ծավալով։ Պարտատոմսերի շրջանառության ժամկետը 6 տարի է, արժեկտրոնային եկամտաբերությունը՝ համապատասխանաբար 7,45% և 10,75%, արժեկտրոնների վճարման պարբերականությունը` 3 ամիս։

Մեկ պարտատոմսի անվանական արժեքը ՀՀ դրամով թողարկվող պարտատոմսերի դեպքում կազմում է 100,000 ՀՀ դրամ, իսկ ԱՄՆ դոլարով՝ 100 ԱՄՆ դոլար:

Ընկերության պարտատոմսերի տոկոսադրույքներն ավելի բարձր են, քան պետական պարտատոմսերինը, այն դեպքում, երբ Մուդիս միջազգային հեղինակավոր ռեյտինգային կազմակերպության կողմից Ընկերությանը տրված վարկանիշն ավելի բարձր է, քան Հայաստանի Հանրապետության վարկանիշը:

Պարտատոմսերի ձեռքբերման առավելությունն էլ նրանում է, որ ի տարբերություն ավանդների, ֆիզիկական անձանց դեպքում դրանք չեն հարկվում եկամտահարկով: Թվով երկու մարքեթմեյքերի (շուկա ստեղծողի) առկայությունն էլ նպաստում է պարտատոմսերի իրացվելիությանը երկրորդային շուկայում` ներդրողների համար ապահովելով Հայաստանի ֆոնդային բորսայում պարտատոմսերը մշտապես գնելու կամ վաճառելու հնարավորություն:

Ներգրաված միջոցներն օգտագործվում են ընդունելի նախագծերի ֆինանսավորման և/կամ վերաֆինանսավորման նպատակով` ներառյալ այնպիսի ծրագրերի, որոնք ուղղված են էլեկտրաէներգիայի կորուստների նվազեցմանը, սպասարկման որակի բարձրացմանը, նոր բաժանորդների միացմանը ցանցին եւ էլեկտրաէներգիայի հաշվառման համակարգերի արդիականացմանը։

Պարտատոմսերի տեղաբաշխողն Ամերիաբանկն է։ Միևնույն ժամանակ, պարտատոմսերի ձեռքբերման գործընթացն առավելագույնս պարզեցված է ներդրողների համար. յուրաքանչյուր ներդրող կարող է ամբողջությամբ օնլայն ու ավտոմատացված եղանակով ՀԷՑ-ի պարտատոմսեր գնել՝ օգտվելով Ամերիաբանկի MyAmeria հավելվածի MyInvest հարթակից: