ՀՀԿ խորհրդի անդամ Հայկ Դերզյանի ելույթը Վենեսուելայում անցկացվող երիտասարդական միջազգային համաժողովի ընթացքում

Թույլ տվեք սկսեմ իմ խորին շնորհակալությունը հայտնելով Վենեսուելայի նախագահին՝ պարոն Նիկոլաս Մադուրոյին, ինչպես նաև վենեսուելացի ժողովրդին և ղեկավարությանը՝ այս կարևոր Հակաֆաշիստական կոնգրեսի կազմակերպման համար:

 

Հաջորդ տարի կլրանա 80 տարին մեր ընդհանուր հաղթանակի՝ 20-րդ դարի ամենամեծ չարիքի՝ ֆաշիզմի նկատմամբ: Այս հաղթանակը միասնության, քաջության և զոհողության հաղթանակ էր: Սակայն այս հաղթանակի ժառանգությունը պահպանելը երբեմն ավելի դժվար է, քան հաղթանակի հասնելը:

 

Որպես Հայաստանի ներկայացուցիչ, ես մեծ հպարտություն եմ զգում այսօր այստեղ գտնվելու և իմ երկիրը ներկայացնելու համար: Հայ ժողովուրդը մեծապես ներգրավված էր ֆաշիզմի դեմ պայքարում Մեծ Հայրենական պատերազմի տարիներին:

 

Ավելի քան 500,000 հայեր Խորհրդային Միությունից մասնակցել են այս պատերազմին:

 

Այդ ընթացքում 70,000 հայեր պարգևատրվել են շքանշաններով և մեդալներով իրենց խիզախության համար:

106 հայեր, ինչպես նաև 11 այլազգիներ Հայկական Խորհրդային Սոցիալիստական Հանրապետությունից, արժանացել են Խորհրդային Միության հերոսի կոչմանը: Բացի այդ, 68 հայ գեներալներ առաջնորդել են տարբեր ռազմական ստորաբաժանումներ պատերազմի բոլոր ճակատներում:

 

Պատմության հուզիչ պահերից մեկը տեղի ունեցավ 1945 թ. մայիսի 2-ին, երբ Ռեյխստագի գրավումից հետո, հայկական 89-րդ հրաձգային դիվիզիայի զինվորները Ռեյխստագի պատերի մոտ կատարեցին ավանդական «Քոչարի» պարը՝ արդարության հաղթանակը տոնելով:

 

Սակայն այս հաղթանակն ապահովվեց մեծ զոհողությունների գնով: Ավելի քան 200,000 հայեր իրենց կյանքը տվեցին Մեծ Հայրենական պատերազմում: Որպեսզի հասկանանք այս զոհողության մասշտաբը, պետք է նշենք, որ 1940 թ. Հայկական ԽՍՀ-ի բնակչությունը կազմում էր ընդամենը 1.37 միլիոն մարդ:

 

Հարգելի՛ բարեկամներ, Հայաստանի պայքարը ֆաշիզմի դեմ չավարտվեց 20-րդ դարում: Այսօր, 21-րդ դարում, Հայաստանը շարունակում է ամուր կանգնել այս չարիքի ժամանակակից դրսևորումների դեմ պայքարի մեջ:

Ֆաշիզմի կործանարար ժառանգության անբաժանելի մասն են կազմում ժողովուրդների հանդեպ ատելության տարածումը, անմեղ խաղաղ բնակիչների սպանությունները, էթնիկ զտումները և բնակչության բռնի տեղահանությունները:

 

Այս չարիքի վերջնական հաղթանակը ապահովելու համար պետությունների միջև միասնականությունն առավել կարևոր է: Մենք պետք է խթանենք ակտիվ համագործակցությունը, ստեղծենք նոր կապեր և զարգացնենք արդյունավետ համագործակցության հարթակներ:

 

Որպես Հայաստանի ներկայացուցիչ՝ ուզում եմ հաստատել, որ մեր երկիրը միշտ բարձր է գնահատել այս հաղթանակի կարևորությունը: Մեր արժեքներն ու հետաքրքրությունները համընկնում են չարիքի բոլոր դրսևորումների դեմ շարունակվող պայքարի հետ:

 

Եվս մեկ անգամ հայտնում եմ իմ անկեղծ շնորհակալությունը այս հնարավորության համար և մաղթում բոլորիս արդյունավետ քննարկումներ և նշանակալի արդյունքներ մեր ջանքերում:

 

Շնորհակալություն: