Տուգանվողներ դեռ չկան. «Փաստ»

«Փաստ» օրաթերթը գրում է.

Սննդամթերքի անվտանգության պետական ծառայությունը հայտարարել է, որ հացի և մսի առաքումը սեպտեմբերի 1–ից Երևանի ամբողջ տարածքում կլինի միայն համապատասխան սանիտարական անձնագրով: ՍԱՊԾ–ից փորձեցինք պարզել, թե մինչ օրս քանի՞ տնտեսվարող է սանիտարական անձնագրեր ստացել և քանի՞սն են տուգանվել այն չունենալու համար:

«55 տնտեսվարողի 132 մեքենա այս պահի դրությամբ արդեն ստացել է սանիտարական անձնագիր: Տուգանքներ դեռևս չեն կիրառվել՝ մարդկանց ժամանակ է տրվում, որ ընթացքում կարողանան իրենց խնդիրները կանոնակարգել և լուծել»,– «Փաստ»–ի հետ զրույցում հայտնեց ՀՀ ԳՆ ՍԱՊԾ տեղեկատվության և հասարակայնության հետ կապերի բաժնի պետ Անուշ Հարությունյանը:

Հարցին, թե կա՞ ժամանակահատված, որից հետո միայն տուգանքներ կկիրառվեն, նա պատասխանեց. «Ժամանակահատված, որպես այդպիսին, սահմանված չէ: Երևանի հանրային սննդի կազմակերպման օբյեկտները սեպտեմբերի 1–ից արդեն պետք է ունենան այդ անձնագրերը: Մանկապարտեզներին, դպրոցներին և բանակին մատակարարելու պարագայում պահանջը պարտադիր պայման է: Իսկ առևտրի իրականացման վայրերի համար փոփոխությունը պարտադիր կլինի նոյեմբերի 1–ից: Այս ամենը վերաբերում էր Երևանին: Իսկ մարզերի առևտրի իրականացման վայրերում, հյուրանոցային տնտեսություններում ու մնացած բոլոր այլ վայրերում փոփոխությունն ապրիլի 1–ից պետք է լինի: Այսինքն՝ մինչև 2018 թ. ապրիլի մեկը մարդկանց ժամանակ է տրված: Հատկապես նրանց, ովքեր գործընթացը սկսել են, բայց պետք է մեքենան համապատասխանեցնեն կամ որոշակի խնդիրներ լուծեն: Այդ խնդիրների կարգավորումից հետո, բնականաբար, որոշակի ժամանակահատվածում խորհրդատվությունների և ցուցումների միջոցով կփորձենք հասնել նրան, որ բոլորն էլ ունենան: Երբ կտեսնենք, որ դրանից հետո կան տնտեսվարողներ, ովքեր անտեսում են օրենքի պահանջը, նոր կդիմենք կտրուկ միջոցների»:

Նշենք, որ հարցի վերաբերյալ ՍԱՊԾ–ում նաև թեժ գիծ է բացվել:

Հարցին, թե այդ առումով ինչպիսի՞ ակտիվություն է նկատվում, Անուշ Հարությունյանը պատասխանեց. «Հասարակությունը բավականին ակտիվ է: Մասնավորապես հաց և հացաբուլկեղեն տեղափոխող փոխադրամիջոցների հետ կապված հարցերն անսահմանափակ քանակությամբ են հնչում: Տեղեկատվության բաժինն օրական երևի 20–30 զանգ է ստանում: Տնտեսվարողները ևս խիստ հետաքրքրված են այդ սանիտարական անձնագրերն անպայման ունենալու հանգամանքով: Մենք էլ փորձում ենք բոլոր հարթություններով ցույց տալ, թե որտե՞ղ և ի՞նչ ճանապարհով կարող են իրենց խնդիրը կարգավորել»:

 Շարունակությունը՝ «Փաստ» օրաթերթի այսօրվա համարում