Ռուսները ասֆալտի որակն ու թերությունները գնահատող սարք են ստեղծել. «Փաստ»

«Փաստ» օրաթերթը գրում է.

Ռուսական «Ռոսատոմ Արևելյան Եվրոպա» ընկերությունը ստեղծել է մի սարքավորում, որը հնարավորություն է տալիս գնահատելու ասֆալտի որակը, դրա հաստությունը: Սարքավորման միջոցով հնարավոր է լինում պարզել, թե ճանապարհի որ կետում որքան է ասֆալտի հաստությունը, ինչ նյութեր են օգտագործվել, քանի սմ է կազմում ասֆալտը, քանի սմ՝ շեբենը, կան արդյոք թերություններ կամ գուցե գետնի տակ ջրեր են կուտակվել ջրահեռացումը նորմալ կերպ չկատարելու արդյունքում: Այս մասին «Փաստ»–ին հայտնեց ընկերության տնօրենի տեղակալ Վլադիմիր Գորնը:

«Кондор» անունը ստացած ճանապարհային ծածկի վերահսկման համակարգը «Ռոսատոմի» գյուտն է, սակայն այն միայն թղթի վրա չէ, արդեն իսկ կա պիլոտային կոմպլեքս, որն օգտագործվել է Ռուսաստանում, ստուգումներ է իրականացրել ճանապարհների վրա: Այդ կոմպլեքսի միջոցով ստուգվել են Ռուսաստանի նոր կառուցված ճանապարհները:

Կոմպլեքսի աշխատանքը կայանում է հետևյալում. կա հատուկ միկրոավտոբուս, որի վրա ամրացվում է այդ ամբողջ սարքավորումը, և իրական ժամանակի ռեժիմում, երբ ավտոմեքենան գնում է 60 կմ/ժամ արագությամբ, սարքը կարող է սկանավորել, թե ինչ է գտնվում ախտորոշում իրականացնող սարքի տակ՝ մինչև 3 մ խորության վրա:

Ըստ Գորնի՝ որպես կանոն, դա բավարար է ամբողջությամբ ցույց տալու ճանապարհի տակ կատարված աշխատանքները կոնկրետ տեղում, և տվյալներ փոխանցել ճանապարհների որակի գնահատում կատարող ընկերություններին:

Իսկ ինչ վերաբերում է արդեն իսկ գործող ճանապարհներին, ապա այսպիսի ախտորոշումը թույլ է տալիս ավելի ճշգրիտ վերանորոգում իրականացնել, հստակ գնահատական տալ, առանց որևէ հատված քանդելու հասկանալ, թե ճանապարհի որ մասը շտապ վերանորոգման կարիք ունի, այդ վերանորոգումը ինչ ծավալներ կկազմի, ինչպիսի թաքնված թերություններ կան, որ կարելի է արդեն այս պահին շտկել: Այս դեպքում կապալառուն վերանորոգման ժամանակ ճանապարհը փակելուց հետո չի բացահայտում այդ խնդիրները, այլ մինչ նշված վայր հասնելը արդեն իսկ տեղյակ է լինում աշխատանքների ծավալի ու տեղի մասին՝ հնարավորություն ունենալով վերցնել անհրաժեշտ տեխնիկան ու նյութերը: Սա թույլ է տալիս առավելագույնս արագ շտկել խնդիրները:

Վլադիմիր Գորնի խոսքով՝ իրենք արդեն պատրաստ են վաճառել սարքավորումը: «Փաստ»–ի հարցին, թե գնորդներ արդեն ունե՞ք, պատասխանում է. «Հետաքրքրվողներ, իհարկե, կան: Դեռևս սարքավորումը փորձարկել ենք միայն Ռուսաստանի ճանապարհների վրա, բայց պատրաստ ենք խոսել այլ ընկերություններին մատակարարելու վերաբերյալ»:

Ինչ վերաբերում է սարքավորման արժեքին, ապա ըստ Գորնի՝ բանակցությունների ավարտից հետո միայն հստակ կարելի է ասել, սակայն այն գնահատվում է 100–200 հազար ԱՄՆ դոլարի սահմաններում՝ կախված կոնֆիգուրացիայից:

«Այն իր մեջ արդեն ներառում է ավտոմեքենա, որի վրա ամրացվում է սարքավորումը: Այն արդեն պատրաստի շարժական լաբորատորիա է»,– նշեց մեր զրուցակիցը:

Հարցին էլ, թե Ռուսաստանի ճանապարհները փորձարկելուց հետո ինչպիսի՞ արդյունքներ ստացան, Վլադիմիր Գորնը պատասխանեց, որ իրենց նպատակը մեղավորներ կամ անհամապատասխանություններ գտնելը չէ, այլ ասֆալտի շերտի տակ կատարվող երևույթների օբյեկտիվ պատկերը տալ:

«Սա լավ միջոց է ճանապարհը կառուցապատողների համար՝ իրենք իրենց ստուգելու տեսանկյունից: Ես կարծում եմ, որ աշխարհում չկա ոչինչ իդեալական, և յուրաքանչյուր աշխատանք կարող է ունենալ իր թերությունները: Ճանապարհային շինարարության և ոչ մի կապալառու երևի թե չունի պահանջ առաջին անգամից իդեալական արդյունք ստանալ: Դրա համար էլ իրենք վերստուգում են: Նրանք պետք է հնարավորություն ունենան մինչ պատվիրատուին ճանապարհը հանձնելը, բոլոր նյուանսները վերացնել: Այսինքն՝ սա պատժամիջոց չէ, որպեսզի պատվիրատուն գա, գտնի անհամապատասխանություններ ու մեղավորներ, և պատժի վերջիններին»,– եզրափակեց Գորնը:

Շարունակությունը՝ «Փաստ» օրաթերթի այսօրվա համարում