Նովոյին պատկանող գազալցակայանում ծեծել են գազի տեսուչներին․ հարցը հասել է մինչև Մոսկվա

Պետեկամուտների կոմիտեն սկսել է զբաղվել գազալցակայաններով, որոնք բացահայտ գազագողությամբ են զբաղված ու դրա շնորհիվ նաև խոշոր չափի հարկեր են թաքցնում։ Բայց դեռ արդյունավետ և ինչպես հարկն է՝ չի կարողանում զբաղվել ՊԵԿ-ը այս հարցով։ 

MediaHub-ը օրերս անդրադարձել էր ՊԵԿ-ի տարածած այն հաղորդագրությանը, որով 6.6 միլիարդի չարաշահում և հարկերից խուսափելու, ՀԴՄ կտրոն չտրամադրելու դեպքեր էր բացահայտել ԱԳԼՃԿ-ներում։ Բայց դրանից զատ՝ վերջին մեկ ամսվա ընթացքում ՊԵԿ հետաքննության և օպերատիվ հետախուզական վարչությունը (ՀՕՀՎ) լայնածավալ ստուգումներ է իրականացրել ՀՀԿ-ական նախկին պատգամավոր Նահապետ Գևորգյանին՝ Նովոյին պատկանող բենզա-գազալցակայաններում և խոշոր չափի՝ 1 մլրդից ավելի չարաշահումներ հայտնաբերել։ Այսօր էլ հաղորդագրություն են տարածել, որ 2024 թվականի ապրիլից սկսած, գնահատելով ավտոգազալցակայանների գործունեություն իրականացնող տնտեսվարող սուբյեկտների հարկային կարգապահության գծով իրականացված վերլուծությունների և դիտարկումների արդյունքները, ռիսկային գնահատված 21 ավտոգազալցակայանում Հարկ վճարողների ընթացիկ հսկողության հարկային տեսչություն-վարչության կողմից իրականացված չափագրման ուսումնասիրությունների արդյունքում հայտնաբերվել է ապրանքային մնացորդի պակասորդ և գանձման է առաջադրվել շուրջ 4.8 մլրդ դրամ տուգանք` ՀՀ հարկային օրենսգրքի 406-րդ հոդվածի համաձայն: Ուշագրավ է, որ MediaHub-ը երեկ ՊԵԿ-ին այս թեմայով որոշակի հարցումներ էր ուղարկել, և մինչ մեզ պատասխանելը՝ հաջորդ օրը տարածեցին այս հաղորդագրությունը։ Տպավորություն է, որ բզեցինք թե չէ՝ ՊԵԿ-ը որոշեց անմիջապես գործի անցնել։ 

ՊԵԿ-ից, մասնավորապես, հետաքրքրվել էինք «Գազպրոմ Արմենիայից» գազագողության դեպքերով, թե ի՞նչ քայլեր է ձեռնարկում Կոմիտեն այս արատավոր երևույթի դեմն առնելու ուղղությամբ, քանզի ԱԳԼՃԿ-ները ստվերային խողովակներով գազ գողանալով ոչ միայն վնաս են հասցնում «Գազպրոմ Արմենիային», այլև դրա հաշվին վնաս են հասցնում պետությանը՝ հսկայական հարկեր թաքցնելով ստվերային ճանապարհով գազի վաճառքից։ Բայց սա ամենը չէ։

Տնտեսական բնույթի այս հանցագործությունները զուգորդվում են նաև ակնհայտ խոիլիգանական և կրիմինալ դրսևորումներով։ Մասնավորապես, «Գազպրոմ Արմենիայի» տեսուչները դժգոհում են, որ իրենք խոչընդոտներ են ունենում որոշ ԱԳԼՃԿ-ներ ստուգայցերի ժամանակ, մասնավորապես՝ ԱԳԼՃԿ-ների տերերն ու աշխատակիցները կոնֆլիկտի են բռնվում տեսուչների հետ և թույլ չեն տալիս, որ վերջիններս մտնեն իրենց տարածք ու ստուգումներ կատարեն, որպեսզի հանկարծ չբացահայատեն իրենց քաշած «լևի» գծերը։ 

Մասնավորապես, MediaHub-ը տեղեկացավ, որ մոտ երկու ամիս առաջ այդպիսի մի կոնֆլիկտ է առաջացել Փարաքարի տարածքում գործող գազալցակայաններից մեկում, որը պատկանում է հենց վերը նշված նախկին պատգամավոր Նահապետ Գևորգյանին՝ Նովոյին։ Նախկինում, ինչպես ասացին, այդ գազալցակայանը Նովոյի ոխերիմ հակառակորդ մեկ այլ նախկին պատգամավորի է պատկանել՝ Ճոյտ մականունով հայտնի Հակոբ Հակոբյանին։ Մեզ պատմեցին, որ գազի տեսուչները այցելել են տվյալ գազալցակայան ստուգումների, սակայն Նովոյի մարդիկ արգելել են տեսուչներին մուտք գործել իրենց տարածք, ինչի հետևանքով ընդհարում և վեճ է առաջացել նրանց միջև։ Բանը հասել է անգամ ծեծկռտուքի․ Նովոյի մարդիկ, որոնց մեջ, ըստ տեղեկությունների, եղել են նրա որդին և ընկերները, բառացիորեն հարձակվել են «Գազպրոմի» տեսուչների վրա, նրանց նկատմամբ բռնություն կիրառել, կարելի է ասել՝ ծեծել ու «լարել» են նրանց տարածքից՝ թույլ չտալով կատարել իրենց աշխատանքը։ 

Մեր աղբյուրները փոխանցեցին, որ կոնֆլիկտն այնքան լուրջ է եղել, որ բանը հասել է մինչև «դիվան բաշուն»՝ Մոսկվա, ու Մոսկվայից են համապատասխան մարդիկ եկել Հայաստան, որ խնդրին լուծում տան։ Բայց վերջնական «իտոգի», ինչպես ասում են, չեն եկել, որովհետև գազագողությամբ զբաղվողների «մաֆիան» չի ցանկանում զիջել դիրքերն ու տեղափոխվել օրինական դաշտ, քանզի ստվերային գործունեությամբ միլիոնավոր դրամներ են աշխատում։ Մենք հետաքրքրվեցինք՝ արդյոք միջադեպի առնչությամբ որևէ մեկը դիմե՞լ է իրավապահ մարմիններին, կա՞, արդյոք, հարուցված գործ, սակայն Քննչական կոմիտեից ասացին՝ նման դեպքով իրենց մոտ որևէ վարույթ չկա նախաձեռնված։ Իսկ իրավապահներին չեն դիմել, որովհետև, ինչպես ասացինք, որոշել են հարցը ավելի բարձր ատյաններով՝ Մոսկվայի միջոցով լուծել և ավելորդ քաշքշուկների մեջ չընկնել։

Գազագողության թեմայով MediaHub-ը դիմել է նաև «Գազպրոմ Արմենիային», որտեղից հաստատել են, որ կա նման խնդիր, և ՊԵԿ-ից համանման հարցման պատասխանը ստանալուն պես՝ առանձին հրապարակմամբ հանդես կգանք։ 

Վահե Մակարյան