Իրանի պաշտպանության նախարարը մեկնաբանել է Իսրայելում ամերիկյան THAAD ՀՕՊ համակարգի տեղակայումը

Իրանի պաշտպանության նախարարը հայտարարել է, որ ԱՄՆ-ի արտադրության միջին հեռահարության հրթիռները մեծ բարձրության վրա որսալու համար նախատեսված THAAD շարժական ցամաքային հակահրթիռային համակարգի մարտկոցի տեղակայումն Իսրայելի տարածքում թշնամու վարած «հոգեբանական պատերազմի» մի մասն է և նորություն չէ: Այս մասին հայտնում է Mehr գործակալությունը:

Գեներալ Ազիզ Նասիրզադեն, անդրադառնալով Իսրայելում THAAD հրթիռային մարտկոցի և դրա հետ կապված ամերիկյան ռազմական անձնակազմի տեղակայման ԱՄՆ որոշմանը, ասել է. «THAAD-ը հակաբալիստիկ համակարգ է։ Այն նորություն չէ և, հետևաբար, եղել է շատ ավելի վաղ: Մենք թշնամու նման գործողությունները գնահատում ենք որպես հոգեբանական պատերազմ»։

Հիշեցնենք, որ այս շաբաթ Պենտագոնը հայտնել էր, որ Միացյալ Նահանգներն Իսրայել կուղարկի միջին հեռահարության հրթիռները մեծ բարձրության վրա որսալու համար նախատեսված THAAD շարժական ցամաքային հակահրթիռային համակարգի մարտկոց, ինչպես նաև այն գործարկելու համար անհրաժեշտ զորքեր: ԱՄՆ-ն նման որոշում է կայացրել՝ չնայած, որ Իրանը նախազգուշացրել է Վաշինգտոնին հեռու պահել ամերիկյան ռազմական ուժերն Իսրայելից:

Պենտագոնի խոսնակ, գեներալ-մայոր Փեթ Ռայդերը հայտարարության մեջ ասել էր, որ պաշտպանության նախարար Լլոյդ Օսթինը թույլատրել է THAAD մարտկոցի տեղակայումը նախագահ Ջո Բայդենի ցուցումով: Նա ընդգծել էր, որ համակարգը կօգնի ուժեղացնել Իսրայելի հակաօդային պաշտպանությունը ապրիլին և հոկտեմբերին Իրանի կողմից զանգվածային բալիստիկ հրթիռային հարձակումներից հետո:

Հրթիռային պաշտպանության կատարաելագործված համակարգի մատակարարումը կարող է ավելի բորբոքել հակամարտությունը Մերձավոր Արևելքում՝ չնայած համապարփակ պատերազմից խուսափելուն ուղղված լայնածավալ դիվանագիտական ջանքերին, նկատում է աղբյուրը: