Ըստ Գեղամյանի՝ «ՌԻԱ ՆՈՎՈՍՏԻ»-ն ուղղակի վրիպել է

Ռուսական «ՌԻԱ ՆՈՎՈՍՏԻ» գործակալությունը «Զենքի հետևից՝ Չինաստան. Հայաստանին քիչ են ռուսական Սմերչերն ու Իսկանդերները» հոդված էր հրապարակել, որում անդրադարձ էր կատարվել պաշտպանության նախարար Վիգեն Սարգսյանի Չինաստան այցին: Գործակալության հետ զրույցում քաղաքագետ Ալեքսանդր Խրամչիխինը նշեց, որ Հայաստանը, խորացնելով գործակցությունը Չինաստանի հետ, շանտաժի է ենթարկում Մոսկվային, որպեսզի ստանա ավելի էժան զենք: Հետաքրքրական, որ հոդվածը հեռացվել է կայքից:
Past.am-ի հարցին՝ ինչո՞վ է պայմանավորված ռուսական պետական քաղաքականությունը ներկայացնող խոշորագույն քարոզչամիջոցի մտահոգությունը, «Ազգային միաբանություն» կուսակցության նախագահ, ԱԺ Հանրապետական խմբակցության պատգամավոր Արտաշես Գեղամյանը պատասխանեց. «Ռուսական մամուլը շատ բազմազան է: Այդ հարցը չէր ծագի, եթե մարդիկ լսեին Արևելյան տնտեսական ֆորումում ՌԴ նախագահ Վլադիմիր Պուտինի խոսքերը: Նա շեշտեց՝ Չինաստանը Ռուսաստանի բարեկամն ու դաշնակիցն է: Ընդ որում՝ Պուտինը դա ասաց Մոնղոլիայի, Ճապոնիայի ղեկավարների ներկայությամբ: Մտահոգվելու բան չկա, իսկ «ՌԻԱ ՆՈՎՈՍՏԻ» գործակալության հեղինակը վրիպել է՝ մոռանալով այս հույժ կարևոր փաստը»: Այնուհանդերձ, նկատենք, որ նման ԶԼՄ-ներում չեն լինում պատահական վրիպումներ:
Պարոն Գեղամյանն անդրադարձավ նաև ԱՄՆ-ին ուղղված Պուտինի քննադատությանը: Հիշեցնենք, որ ՌԴ նախագահ Վլադիմիր Պուտինը քննադատել է Ուկրաինային պաշտպանական զենք տրամադրելու վերաբերյալ ԱՄՆ–ի որոշումը՝ նշելով, որ դա չի նպաստում խաղաղությանը: Հայաստանցի բազմաթիվ վերլուծաբանների խոսքով՝ սա երկակի ստանդարտների կիրառում է, քանի որ նույն ՌԴ–ն զենք է մատակարարում ԼՂ հակամարտության կողմերին: «Բացարձակ չեմ տեսնում երկակի ստանդարտներ: Ինչ վերաբերում է զենք վաճառելուն, ապա լավագույն պատասխանը տվել է ՀՀ նախագահը»,- ասաց Գեղամյանը: