Թոշակառուները կարող են 280 դրամով լիարժեք սնվել. Երևանում սոցիալական ռեստորան բացվեց

Թոշակառուների համար Երևանի կենտրոնում 280 դրամով լիարժեք ճաշելն արդեն հնարավոր է։ 6 ամիս տևած շինարարությունից հետո մատչելի սննդով սոցիալական ռեստորանն այսօր իր դռները բացեց ոչ միայն թոշակառուների, այլև մյուս քաղաքացիների համար։

Ծրագրի գաղափարը «Արտ Լանչ» ցանցի սեփականատեր Բակուր Մելքոնյանինն է, որն անձամբ է թոշակառուներին ներկայացնում ճաշացանկը։

«Ռեստորանում երկու հոսքագիծ կա, մեկը մեր «Արտ Լանչի» սովորական գներով է, մյուսը` շատ ցածր գներով` թոշակառուների համար։ Սովորական մարդն այստեղ ուտելով օգնում է, որ այստեղից եկած եկամուտը դրվի մյուս հոսքագծի վրա»,–Sputnik Արմենիայի հետ զրույցում ասաց Մելքոնյանը։

Օրինակ` այստեղ 90 դրամով հնարավոր է ուտել 1 բաժին հնդկաձավար, 190 դրամով` կոտլետ, 170 դրամով` կարտոֆիլի խյուս և այլն։ Յուրաքանչյուր տարեց հնարավորություն ունի նաև նվեր ընտրելու, որը թողել են մյուս հոսքագծի հաճախորդները։ Նվերներն այստեղ սուրճի, քաղցրավենիքի, պիցցայի, հյութի ու ֆրեշի տեսքով են։

Նվերների գներն էլ են մատչելի։ Օրինակ` 50 դրամով կարելի է մի բաժակ սուրճ նվիրել տարեցներին։ Ծրագիրը հաճելիորեն զարմացրել է տարեցներին, որոնք արդեն իսկ համտեսում և դրական գնահատական են տալիս ճաշատեսակներին։ Ասում են` այնքան մատչելի է, որ ընտանիքի անդամների համար էլ են տանում։

«Շատ հաճելի է մեզ նման ծրագիրը։ Շատ համով սնունդ են տալիս ու այնքան լավ են սպասարկում, որ ուզում ես էլի գալ։ Շատ կուզեի, որ բոլոր տեղերն էլ բացեն, մարդիկ գնան, օգտվեն»,– Sputnik Արմենիայի հետ զրույցում ասաց 66–ամյա Ժորա Պետրոսյանը։

Ծրագիրն աջակիցների պակաս չունի։ Բացման արարողությանը մասնակցում է նաև ՀՀ էկոնոմիկայի նախկին նախարար Վահան Քերոբյանը, որը կամավորական սկզբունքով սպասարկում է տարեցներին։

«Երբ մի քանի ամիս առաջ Բակուր Մելքոնյանն ասաց այս ծրագրի մեկնարկի մասին, դեռևս նախարար եղած ժամանակ խոստացա, որ մի քանի ժամով կգամ և կաշխատեմ։ Այսօր նախարար չեմ, բայց խոստումը մնում է խոստում»,–ասաց Քերոբյանը։

Նախկին նախարարաը վստահ է, որ այժմ բիզնես ոլորտում ընկերությունների հասունությունը չափվում է սոցիալական ծրագրերով։

Սոցիալական ռեստորանն այսօր 13 աշխատակից ունի, որոնցից 5–ը 60–ն անց են։