Հայտնի է «Գալաքսի չեմպիոնների լիգա 2024» ֆուտզալի ամենամյա առաջնության հաղթող թիմը
![Հայտնի է «Գալաքսի չեմպիոնների լիգա 2024» ֆուտզալի ամենամյա առաջնության հաղթող թիմը](/timthumb.php?src=disc/04-07-24/63630b844b6063acd8deac45df0ff885.jpg&w=780)
Ավարտվեց «Գալաքսի չեմպիոնների լիգա 2024» ֆուտզալի ամենամյա առաջնությունը, որին մասնակցեցին «Գալաքսի» ընկերությունների խմբի կազմում ընդգրկված ընկերություններից 8 թիմեր: Եզրափակիչում անզիջում պայքար մղեցին Ucom ու Galaxy թիմերը: Հանդիպումն ավարտվեց 5:1 հաշվով՝ հոգուտ Ucom ընկերության:
«Իրապես առաջնությունը հաջողված էր: Նման տեմպով ու իրադարձություններով լի առաջնություն դեռևս չէր եղել: Այսօր թիմերը և հատկապես Ucom-ի թիմը ցույց տվեցին պրոֆեսիոնալ ու կազմակերպված խաղ: Այս տարի պետք է արձանագրել մի կարևոր փաստ, որ առաջնությունում խաղում էին տարբեր սերունդներ: Բոլոր թիմերը ցուցաբերել են որակապես բարձր մակարդակի խաղ: Այն, որ «Գալաքսի չեմպիոնների լիգա 2024» կայացել է, դա յուրաքանչյուր մասնակցի անձնական ներդրման արդյունք է»,-նշել է «Գալաքսի» ընկերությունների խմբի համահիմնադիր և գլխավոր տնօրեն Արամ Խաչատրյանը:
Հաղթող թիմերին մեդալներով պարգևատրել է «Գալաքսի» ընկերությունների խմբի համահիմնադիր և կառավարաման խորհրդի համանախագահ Արտյոմ Խաչատրյանը: Նա ընդգծել է ամենամյա նախագծի կարևորությունը`«Գալաքսի» համայնքի միասնականության համար: Նշենք, որ «Գալաքսի չեմպիոնների լիգա 2024» մրցում էին «Գալաքսի» ընկերությունների խմբի կազմում հանդես եկող Cofix, Galaxy Group, Megafood, Ucom, PAUL, Santafe, TI’ME, Yerevan Mall թիմերը:
Մրցաշարի ընթացքում թիմային խաղում անհատական մարզական ձեռքբերումների համար սահմանվել են մրցանակներ: 2024թ-ի լավագույն ռմբարկու է ճանաչվել Yerevan Mall-ը ներկայացնող Մովսես Աբրահամյանը, լավագույն դարպասապահ՝ Ucom-ի աշխատակից Հովսեփ Բաբաջանյանը: Լավագույն երկրպագուների թիմի մրցանակին է արժանացել TI’ME ընկերությունը:
«Ucom-ն այս մրցաշարում ցուցաբերել է աննկուն ու գերարարագ խաղ: Շնորհավորում եմ գործընկերներիս այս հաղթանակի առթիվ և մաղթում, որ Ucom-ի թիմի մեկնարկած հաղթական շքերթը անդադար լինի ու նոր բարձունքների հասցնի ինչպես Ucom ընկերությունը, այնպես էլ «Գալաքսի» ընկերությունների խումբը: Շնորհակալություն եմ հայտնում նաև մեր երկրպագուներին, քանի որ նրանք իրենց ոգևորող գործողություններով օգնեցին ձեռքբերելու այս հաղթանակը»,-նշել է Ucom ընկերության գլխավոր տնօրեն Ռալֆ Յիրիկյանը:
«Այս մրցաշարը «Գալաքսի» համայնքի անկոտրում կամքի ու բացառիկ ընկերասիրության դրսևորումն է: Մեծ հպարտություն է տեսնել, թե ընկերական հավաքներն ինչպես են պրոֆեսիոնալ խաղերի վերածվում` ավելի ու ավելի միավորելով մարդկանց: Շնորհավորում եմ բոլոր մասնակիցներին և հաղթող Ucom ընկերությանը և մաղթում ձեռքբերումներ կյանքի բոլոր շրջափուլերում»,- իր ուղերձն է հղել «Գալաքսի» ընկերությունների խմբի համահիմնադիր և կառավարաման խորհրդի համանախագահ Գուրգեն Խաչատրյանը:
«Գալաքսի Չեմպիոնների Լիգա 2024» մրցաշարը տեղի է ունեցել «Գազպրոմ Արմենիա» Ուսումնա-սպորտային համալիրի մարզադահլիճում։ Մրցաշարի բրենդավորման և կազմակերպչական աշխատանքներն իրականացրել է «ԱքսելՄոնդրիան և գործընկերներ» հաղորդակցական ընկերությունը։
«Գալաքսի» ընկերությունների խումբը, հիմնադրված Գուրգեն Խաչատրյանի, Արտյոմ Խաչատրյանի և Արամ Խաչատրյանի կողմից, հայկական հոլդինգային ընկերություն է, որը ներկայացնում է 15 ընկերություն 3 երկրում։ «Գալաքսին» Հայաստանի ամենամեծ սոցիալական պատասխանատվության և համայնքի զարգացման նախագծեր իրականացնող ընկերությունն է, որի իրականացրած նախագծերի տարեկան ուղիղ շահառուների թիվը գերազանցում է մի քանի հազարը: «Գալաքսի» ընկերությունների խումբը Հայաստանի լավագույն գործատուներից է` 3000-ը գերազանցող աշխատակիցներով:
![](disc/04-07-24/179523d72c8fff58dc23df33bc4b85d2.jpg)
![](disc/04-07-24/663d121e32acfc4e9d67855fe7fea331.jpg)
![](disc/04-07-24/426e049947497a4881523e92ce0107da.jpg)
![](disc/04-07-24/98f68f24a839789df32bfcafe7585028.jpg)
![](disc/04-07-24/5bdacdcc23bc6a3a6132e2ccf0e8874a.jpg)
![](disc/04-07-24/6e765cfa6af6225afb90102d116254c0.jpg)
![](disc/04-07-24/4dd39645f0c32039f972cf38c2decde4.jpg)
![](disc/04-07-24/e27d82a10378c71597427a5c692c46b0.jpg)