«Ինչո՞ւ են միշտ հեռանում նրանք, որոնք անհրաժեշտ են ու պարտադիր». Մարկ Սաղաթելյանն այսօր կդառնար 46 տարեկան (ֆոտո/վիդեո)

Այսօր՝ սեպտեմբերի 1-ին, դերասան, շոումեն եւ հաղորդավար Մարկ Սաղաթելյանը կդառնար 46 տարեկան, եթե չարաբաստիկ հիվանդությունը չխլեր նրա կյանքը։

Սաղաթելյանը ծնվել է 1971 թվականին, Երեւանում։ 1988-1994 թվականներին սովորել է Մխիթար Հերացու անվան պետական բժշկական ինստիտուտում, որի ՈՒՀԱ թիմի կազմում էլ հանդես է եկել ուսանողության տարիներին։ 1992 եւ 1994 թվականներին համալսարանի թիմը դարձել է բարձրագույն լիգայի չեմպիոն։

Մարկ Սաղաթելյանը մասնակցություն է ունեցել մի շարք հումորային ֆիլմերում եւ նախագծերում՝ «Մեր բակը», «Թույն կասետ», «Ուրիշ կասետ», «Քայլ ձիով» եւ այլն։ Սակայն այսօր NEWS.am STYLE-ը որոշել է վերհիշել հումորիստի արտահայտած մտքերից մի քանիսը.Ես ոչ քաղաքական գործիչ եմ, ոչ էլ տնտեսագետ, բայց ես գիտեմ, որ պետք է զարգացման այլ ուղիներ փնտրել: Այդ ժամանակ հասարակությունը ավելի բարի կդառնա:

Շատերը քննադատում են շոու-բիզնեսը, որովհետեւ խառնում են այն մշակույթի հետ: Առաջինը շոուի միջոցով գումար վաստակելու փորձ է, իսկ մշակույթը կենսակերպ է, որով մարդը տարբերվում է կենդանուց, ժողովուրդները՝ մեկը մյուսից:

Մարդկային անխելքությունն ու հիմարությունը սահման չունեն: Նաեւ ինձ ապշեցնում է համատարած անգրագիտությունը:

Ինչո՞ւ են միշտ հեռանում նրանք, որոնք անհրաժեշտ են ու պարտադիր, որ մնան, որովհետև իրենց կյանքով լույս ու հույս են տալիս մյուսներին…

Նրանք, որոնք թույլերի հետեւից են գնում, սխալվում են: Ի՞նչ կարելի է սովորել թույլից. միայն վախկոտություն:

Ինտելիգենտ լինել նշանակում է՝ աշխարհին եւ մարդկանց հանդուրժողաբար վերաբերվել:

Երբեմն պետք է կյանքին նայել ուրիշի աչքերով, որպեսզի քեզ կողքից տեսնես:

Մարդիկ, ինչպես եւ շախմատում, բաժանվում են սպիտակների եւ սեւերի, պարզապես կյանքում առաջին քայլը միշտ սևերն են անում:

Սարերից բարձր կարող են լինել միայն մեր սարերը: