Ճակատագրական այդ օրը տեղի ունեցածի բացահայտումը շատ հարցեր կպարզաջրի, ու կհասկանանք այսօրվա հետևանքների իրական պատճառները. Աննա Կոստանյան

Աննա Կոստանյանը ֆեյսբուքյան իր էջում գրում է.

 

Հոկտեմբերի 27-ը տրավմատիկ, միևնույն ժամանակ կանխորոշիչ դարձավ հայկական քաղաքական դաշտի ամայացման համար։ Այս ողբերգությունն սկիզբ դրեց հայ քաղաքակության ապականմանը, այլանդակվելուն, հիմնահատակ փչանալուն ու քաղաքական մտքի սնանկացմանը։ Տասնյակ տարիներ փորձում ես հավատալ, որ ընդունված այլասերված մշակույթը կփոխվի, որ կկարողանաս ինչ-որ գույն բերել վայրի կանոններով առաջնորդվող ասպարեզում, բայց օրենքները միշտ նույնն են, հարց է, թե ով կկարողանա մինչեւ վերջ դիմակայել ու չհանձնվել։

 

99-ից այս կողմ հարյուրավոր հարցեր մինչ օրս մնացել են անպատասխան` ով, ինչու, ինչպես, ինչի համար։ Ու էս ռեբուսը կլուծվի միայն մեկ պարագայում` եթե խոսի ՄԵԿ ՄԱՐԴ, և այդ մեկ մարդը հիմա ողջ է ու բանտում, թեև հոգեկան առողջությունը վստահաբար կասկածանքի տակ է։ Ճակատագրական այդ օրը տեղի ունեցածի բացահայտումը շատ հարցեր կպարզաջրի, ու կհասկանանք այսօրվա հետեւանքների իրական պատճառները, ավելի քան վստահ եմ, որ էդ օրն առանցքային կապ է ունեցել այն ամենի հետ, ինչ տեղի է ունենում այսօր։

 

Հոկտեմբերի 27-ից հետո ազգային համաձայնության կառավարություն ձեւավորելու պահանջով գրված ցուցակն այն ժամանակվա նախագահ Քոչարյանին ներկայացվել է այժմյան խորհրդարանի պատգամավոր Անդրանիկ Քոչարյանի կողմից, որտեղ ինքն իրեն սույն պերսոնաժն առաջարկել էր նշանակել որպես փոխվարչապետ։ Այդ ցուցակում կային անուններ, որոնց տերերն այսօր պաշտոնեական դիրքն են զբաղեցնում այսօրվա իշխանության հովանու ներքո։