Որ ոչ ոք չկարողանա այլևս նման փաստաթղթեր ստորագրել. «Հայաքվեն» այս պահին առավել քան ակտուալ է․ «Փաստ»

«Փաստ» օրաթերթը գրում է.

Վերջին իրադարձությունների ֆոնին ակտիվացել են կարծիքները, թե «Հայաքվե» նախաձեռնության ստորագրահավաքը ժամանակի անիմաստ կորուստ էր: «Հայաքվե» քաղաքացիական օրենսդրական նախաձեռնության անդամ Աննա Կոստանյանը «Փաստի» հետ զրույցում ասում է, որ մինչ «Հայաքվե» նախաձեռնությունը սկսելը կանխատեսում կար՝ ենթադրենք, Նիկոլ Փաշինյանն ինչ-որ վերջնական փաստաթուղթ է ստորագրում Արցախի մասով, ի՞նչ ենք անելու, ժամանակավրեպ չի՞ լինի «Հայաքվեն», և սա սահմանադրական այն պրոցե՞սն է, որով կարելի է պայքարել վերջնական կապիտուլ յացիոն փաստաթուղթը կանխելու դեմ:

«Սակայն բոլոր ռիսկերը հաշվի առնելով՝ հանգեցինք եզրակացության, որ քաղաքացիական նախաձեռնության դրական կողմերն ավելի շատ են, քան ռիսկերը: Սահմանադրության նախաբանում հռչակված են համազգային անժամկետ նպատակներ, որոնց համար պարտավոր ենք պայքարել՝ անկախ նրանից, թե ինչ գործընթացում են Հայաստանն ու Արցախը: Այս նախաձեռնության առաջին նպատակը համազգային անժամկետ նպատակների հետևելն ու դրանք Քրեական օրենսգրքում ամրագրելն է, որ Հայաստանի որևէ պաշտոնյա ո՛չ հիմա, ո՛չ էլ ապագայում իրավունք չունենա Արցախի և Հայաստանի հետ կապված այնպիսի աղետալի որոշում կայացնել, հայտարարություն անել կամ թուղթ ստորագրել, որը կհարվածի Սահմանադրության նախաբանում սահմանված նպատակներին»,-նշում է մեր զրուցակիցը:

Չնայած այժմ ունենք հայաթափված Արցախ, բայց, ըստ Կոստանյանի, չեն ընդունում, որ Արցախի հարցը փակված է: «Չպետք է պայքարի որևէ գործիք մի կողմ դնել ու ասել, որ, միևնույնն է, Արցախը հայաթափվել է: Նույնիսկ այն պարագայում, երբ Գրանադայում Փաշինյանը միացավ եվրոպական երկրների ներկայացուցիչների քառակողմ հայտարարությանը՝ ամրագրելով, որ հետամուտ են լինելու Հայաստանի և Ադրբեջանի տարածքային ամբողջականությունը փոխադարձաբար ճանաչելու գործընթացին: Սրան պետք է հաջորդի Ադրբեջանի կողմից փաստաթղթի ստորագրումը:

«Հայաքվեն» այս պահին առավել քան ակտուալ է: Փաշինյանը պետք է պատասխանատվության կանչվի նման աղետալի փաստաթղթեր ստորագրելու համար: «Հայաքվեի» նպատակն է, որ Քրեական օրենսգիրքը հնարավորություն տա քրեորեն պատժել ցանկացած հայ պաշտոնյայի, որը կհամարձակվի հակահայկական, հակաարցախյան և ցեղասպանության միջազգային ճանաչման գործընթացի ուղղությամբ հակահայկական քայլեր ձեռնարկել: Չեմ հասկանում «Հայաքվեի» դեմ տարվող այս քարոզչությունը: Որոշ մարդիկ դա անում են միտումնավոր կերպով տարբեր կենտրոնների կողմից ուղղորդված, իսկ մարդկանց մի մասն էլ ընկնում է այս ուղղորդումների ազդեցության ներքո՝ չհասկանալով, որ այդ կերպ Նիկոլ Փաշինյանին են օգնում:

Հասկանում եմ շատերի մտահոգությունը՝ ինչի՞ համար էր «Հայաքվեն», եթե Արցախը հայաթափվեց: Մարդկանց պետք է բացատրել, որ այս պրոցեսն առաջին հերթին հիմա և հետագայում ցանկացած պաշտոնյայի ձեռքը բռնելու համար է, որ ոչ ոք չկարողանա այլևս նման փաստաթղթեր ստորագրել: Պետք է հաշվի առնենք, որ վերջնականապես կապիտուլացված չենք, Փաշինյանը դեռևս չի ստորագրել այս կապիտուլ յացիոն փաստաթուղթը, որով ճանաչելու է Արցախը Ադրբեջանի կազմում, որքան էլ միացել է հայտարարությանը»,-ամփոփում է Աննա Կոստանյանը:

Մանրամասները՝ «Փաստ» օրաթերթի այսօրվա համարում