Վարկերի տոկոսադրույքների մասնակի սուբսիդավորումը կընդլայնի տնտեսվարողների կարողությունները. «Փաստ»

«Փաստ» օրաթերթը գրում է.

«Գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագրին հավանություն տալու մասին» կառավարության որոշման նախագիծը շրջանառության է դրվել Իրավական ակտերի նախագծերի հրապարակման միասնական կայքում: Նախագծի ընդունման անհրաժեշտությունը պայմանավորված է վարկավորման բնագավառում պետական հովանավորչական քաղաքականության իրականացման անհրաժեշտությամբ, որը թելադրվում է առևտրային բանկերի և ֆինանսական կազմակերպությունների կողմից տրամադրվող վարկերի բարձր տոկոսադրույքներով¬, ինչը լուրջ խոչընդոտ է գյուղատնտեսությունում բազմաթիվ տնտեսվարողների գործունեության համար:

Ըստ նախագծի՝ գյուղատնտեսության առջև ծառացած խնդիրների լուծման արդյունավետ միջոցներից է գյուղատնտեսությունում տնտեսվարողների վարկավորման մատչելիության բարձրացումը և վարկավորման պայմանների բարելավումը: «Գյուղատնտեսական մթերքների արտադրության, մթերման, վերամշակման, գյուղատնտեսական աշխատանքների նախապատրաստման, արտադրական կարողությունների ընդլայնման, նոր արդիական տեխնոլոգիաների կիրառման համար գյուղատնտեսությունում տնտեսավարողներին խիստ անհրաժեշտ է ունենալ բավարար հիմնական և շրջանառու միջոցներ: Դրա ապահովման արդյունավետ մեխանիզմներից է նպատակային վարկերի տոկոսադրույքների սուբսիդավորման ծրագրի իրականացման միջոցով վարկերի մատչելիության բարձրացումը: Վերջինս հնարավորություն կընձեռի ընդլայնել գյուղացիական տնտեսությունների կարողությունները, բարձրացնել ոլորտի մրցունակությունը, նպաստել գյուղական համայնքների ամրապնդմանը, բարելավել գյուղական բնակչության կենսապայմաններն ու կյանքի որակը, բարձրացնել երկրի պարենային անվտանգության մակարդակը»,– ասված է նախագծի մեջ:

Ըստ նախագծի՝ ոլորտին տրամադրվող վարկերի մատչելիության բարձրացման ներկայիս գործող ծրագրերում կիրառվող մեխանիզմները և պայմանները հնարավորություն են տալիս լուծելու միայն գյուղատնտեսությունում տնտեսավարողների ընթացիկ խնդիրները: Ներկայումս խնդիր է վարկավորման պայմանների, մասնավորապես՝ վարկավորման ժամկետների, տրամադրվող վարկի գումարի ավելացման, սուբսիդավորվող տոկոսադրույքի մեծացումը, վարկերի նպատակաուղղումը տնտեսությունների խոշորացմանը, արդիական տեխնոլոգիաների ներդրմանը, տնտեսվարողների ուսուցմանը և այլն: Իսկ սա ըստ Նախագծի հեղինակների՝ կարևորագույն խնդիր է:

Գիտենք, որ առևտրային բանկերի կողմից տրամադրվող վարկերի բարձր տոկոսադրույքների պատճառով, դրանք գրեթե անմատչելի են արտադրատեխնիկական բարդ պայմաններ ունեցող և իրացման դժվարություններ ունեցող բազմաթիվ տնտեսվարողների համար:

Յուրաքանչյուր տարի ծրագիրն իրականացվել է երկու փուլով հանրապետության բոլոր համայնքներում: Ինչպես մայր գումարի մարման, այնպես էլ տոկոսադրույքի վճարման համար արտոնյալ ժամկետ է սահմանվել առնվազն 6 ամիս: Ընդհանուր առմամբ, 2011 թ. ապրիլի 1–ից մինչև 2017 թ. հունիսի 30–ն ընկած ժամանակահատվածում տրամադրվել է շուրջ 127 հազար 500 միավոր վարկ 106 միլիարդ 400 միլիոն դրամ գումարով: Սուբսիդավորված գումարը կազմել է շուրջ 5 միլիարդ 100 միլիոն դրամ:

Ծրագրի հիմնական նպատակն է` հանրապետության ագրոպարենային ոլորտում զբաղված ֆիզիկական և իրավաբանական անձանց տրամադրվող վարկերի տոկոսադրույքների մասնակի սուբսիդավորման, վարկավորման պայմանների բարելավման միջոցով` վարկավորման մատչելիության մակարդակի բարձրացումը և արդյունքում տնտեսավարողների կարողությունների ընդլայնումը և արդիական տեխնոլոգիաների ներդրմանը նպաստելը:

Շարունակությունը` «Փաստ» օրաթերթի այսօրվա համարում