Հանքարդյունաբերությունը որպես գաղթի ճանապարհը բռնած գյուղի միակ փրկություն. «Փաստ»

«Փաստ» օրաթերթը գրում է.

Երկու օր առաջ Վայոց ձորի մարզի Զառիթափի համայնքապետարանի շենքում և Սյունիքի մարզի Շաղատի համայնքապետարանի շենքում տեղի ունեցան «Թոռնիկ Եվա» ՍՊԸ–ի կողմից ներկայացված Սիսիանի հանքային շրջանի Սիսկատար–Արտավանի հանքային դաշտում 2017–2020 թթ. օգտակար հանածոների արդյունահանման նպատակով ընդերքի երկրաբանական ուսումնասիրության նախնական գնահատման հայտի վերաբերյալ երկրորդ հանրային քննարկումները: Ինչպես հայտնի է, «Թոռնիկ Եվա» ՍՊԸ–ն այս գյուղերի վարչական տարածքում գտնվող հատվածում՝ Սիսիանի հանքային շրջանի Սիսկատար–Արտավան հանքային դաշտում, նախատեսում է կատարել ոսկի–բազմամետաղային հանքայնացման երկրաբանական ուսումնասիրության աշխատանքներ:

Ըստ ընկերության կողմից ներկայացված նախնական գնահատման հայտի՝ ուսումնասիրվելու է ավելի քան 6000 հա տարածք, որից մոտ 4000 հա–ը պատկանում է Զառիթափ համայնքին, իսկ 2100 հա–ն էլ՝ Շաղատին, և ուսումնասիրության համար նախատեսվող տարածքում ընդգրկված հողատարածքները օգտագործվում են որպես արոտավայրեր և խոտհարքներ: Ընկերությունը նախատեսում է կատարել 3 հազար մ3 ծավալով մակերեսային լեռնային փորվածքներ, վերանորոգել գոյություն ունեցող 12 կմ երկարությամբ ավտոճանապարհը և նախապատրաստել 40 հատ հորատման հարթակներ: Մակերեսային նմուշարկման աշխատանքներ կատարելուց հետո, հեռանկարային տեղամասերում հանքայնացման բնույթը խորքում պարզաբանման նպատակով նախատեսվում է կատարել հորատման աշխատանքներ: Այդ նպատակով նախատեսվում է հորատել 20 հատ 50 մ–անոց և 20 հատ էլ 100 մ–անոց հորատանցքեր:

Զառիթափի գյուղապետ Սիմոն Բաբայանը «Փաստի» հետ զրույցում նշեց, որ նա` որպես համայնքի ղեկավար, մտահոգված է, որ իր համայնքի բնակիչներն աշխատատեղեր ունենան և գաղթի ճանապարհը չբռնեն: Նրա ներկայացմամբ երեկ գյուղում տեղի ունեցած հանրային լսումները նորմալ մթնոլորտում են ընթացել և անգամ բնապահպանական ՀԿ–ներից են ներկայացուցիչներ ներկա եղել: Ըստ գյուղապետի՝ նույնիսկ առաջարկություն է եղել Զառիթափ խոշորացված համայնքի մեջ մտնող այն համայնքում էլ լսումներ անցկացնել, որն ավելի հարակից է հանքավայրին:

«ժողովրդի 50%–ը այսօր արտագաղթել է: Նրանց մեծ մասը սպասում են, թեթևակի շշուկ լսելու դեպքում դրսից զանգում են, հարցնում՝ հնարավո՞ր է աշխատատեղ ստեղծվի, վերադառնանք մեր ընտանիք: Ծեր հորնումորը, կնոջն ու երեխաներին թողել են, գնացել: Եթե վաղը կամ մյուս օրը ինչ–որ բան կբացահայտվի այս տարածքներում, ինչ–որ բան կնշմարվի, եթե օգտակար հանածոներ լինեն, ես պարտավորված եմ հետևելու, որ օրենքով սահմանված կարգով կատարվեն բոլոր աշխատանքները՝ պահպանելով բնապահպանական նորմերը:

Մյուս կողմից այդ մեծ հարստությունը թողնել հողի տակ, երբ մեր երկիրն այսօր ֆինանսական վատ վիճակի մեջ է, սխալ է: Եթե աշխատատեղեր լինեն, ու մարդիկ աշխատեն, դրանից մեր բյուջեն մի քիչ գումար կունենա, հանրապետության բյուջեն նույնպես: Մոտ 200–300 աշխատատեղ կստեղծվի: Ես կարծում եմ այս տեսակ բաներին չի կարելի վատ նայել, չի կարելի ամեն ինչին գորշ նայել»,– ասաց համայնքապետը:

Սիմոն Բաբայանի ներկայացմամբ՝ գյուղացուն այսօր աշխատատեղ ունենալ է պետք, որպեսզի ապրի, որպեսզի երիտասարդ տղան բանակում ծառայությունն ավարտելուց և գյուղ վերադառնալուց հետո գաղթի ճանապարհը չբռնի կամ էլ որպես վերջին տարբերակ՝ Երևանում ծանոթներ ու բարեկամներ ունենալու դեպքում չտեղափոխվի մայրաքաղաք:

«Գալիս են Երևան ու ծերանում այստեղ՝ պարտքերի ու վարկերի մեջ: Այս ամենը հնարավորություն է ստեղծում, որ մարդիկ իրենց տնտեսության մեջ աշխատեն, իրենց ծնողներին օգնեն, 3 հատ կովը 5 դարձնեն»,– հավելեց նա:

Շարունակությունը` «Փաստ» օրաթերթի այսօրվա համարում