Թուրք մասնագետի աղմկահարույց հրապարակումը

Առաջին / ՖԻԲԱ-Եվրոպայի մրցումների կազմակերպման բաժնի աշխատակից, ազգությամբ թուրք Սինան Տազեի լայնածավալ հրապարակումը simonlux.svbtle.com պարբերականում հայ-ադրբեջանական հարաբերությունների վերաբերյալ կարելի է ֆանտաստիկ որակել: Տազեն ներկա է գտնվել վերջերս Ռումինիայում տեղի ունեցած մինչև 20 տարեկան բասկետբոլիստների Եվրոպայի Բ դվիզիոնի առաջնությանը, որտեղ միմյանց հետ մրցեցին նաև Հայաստանի և Ադրբեջանի հավաքականները:

«Առաջին խնդիրը ծագեց այն պատճառով, որ Հայաստանի և Ադրբեջանի պատվիրակությունները նույն հյուրանոցում էին հանգրվանել: Խնդրի վերաբերյալ շարունակ զանգեր էի ստանում: Ադրբեջանցիները շարունակ շփվում էին ինձ հետ, քանզի հաղորդակցվում էին մայրենի լեզվով: Ես երեք տարի առաջ Ադրբեջանի հավաքականի մարզիչն էի: Ադրբեջանցիները անընդհատ բողոքում և դժգոհում էին: Ես զրուցեցի հայկական պատվիրակության ղեկավար Արթուր Նազարյանի հետ: Նա ևս անհանգստացած էր, բայց շատ ավելի զուսպ և պրոֆեսիոնալ մոտեցում ցուցաբերեց խնդրին: Նա հավաստիացրեց, որ խնդիրներ և միջադեպեր չեն լինի: Արթուրի պատասխանն ինձ հանգստացրեց, բայց ես գիտեմ, որ հիմնական դեպքերում ագրեսորները ոչ թե հայերն են, այլ ադրբեջանցիները: Ես նրանց ասացի, որ այլընտրանք չկա, և պետք է ըմբռնումով մոտենալ խնդրին և շարունակել բնակվել նույն հյուրանոցում: Խնդիրը կարգավորվեց»,- գրել է Տազեն:

Վերջինս նկարագրել է հանդիպումը Հայաստանի և Ֆինլանդիայի հավաքականների միջև՝ նշելով, որ չնայած պարտությանը՝ Հայաստանի հավաքականի տղաները ապացուցեցին, որ առյուծի սիրտ ունեն ու պայքարում են մինչև վերջ:

«Ստացվեց այնպես, որ հաջորդ փուլում միմյանց հետ պետք է մրցեին Հայաստանի և Ադրբեջանի հավաքականները: Խաղից առաջ որոշակի հանգստություն էր նկատվում միայն երկու ամերիկացի բասկետբոլիստների դեմքերին: Երկու հավաքականները իրավունք ունեին մեկական օտարերկրացի խաղացողից օգտվելու: Թե հայերը և թե ադրբեջանցիները ընտրել էին ամերիկացիներին: Շարունակ նայում էի իմ նախկին թիմի նստարանին: Կողմերը անմնացորդ նվիրումով էին գործում: Տեղի էր ունենում այն, ինչից շատ էի վախենում: Լարվածությունը հասել էր գագաթնակետին: Բայց կրկին անգամ ուզում եմ նշել, որ հայ խաղացողները առյուծի սիրտ ունեն, և դրամատիկ պայքարում նրանք հաղթեցին 82:80 հաշվով: Նշեմ կրկին, որ հայ խաղացողներից Կոյումջյանը, Հակոբյանն ու Արսլանյանը առյուծի սիրտ ունեն: Արսլանյանը երիտասարդ է, բայց հասուն մարդու գլուխ ունի: Հայաստանը հաղթեց, և Արթուրը գրկախառնվեց հավաքականի գլխավոր մարզչի հետ»,- նշել է թուրք պաշտոնյան:

Որքան էլ տարօրինակ հնչի, Տազեն սկզբունքային այս դիմակայությունում երկրպագել է Հայաստանի հավաքականին և մեծ բավականություն է ստացել Ադրբեջանի հավաքականի պարտությունից: «Որպես թուրք՝ ատում եմ այն մոտեցումը, ըստ որի՝ մեր սերունդը ժխտում է Հայոց ցեղասպանությունը: Որպես Ադրբեջանի հավաքականի մարզիչ՝ ես ատում եմ այն մոտեցումը, որը նրանք ունեն հայերի նկատմամբ: Երբ հայերը խաղում էին իմ նախկին թիմի դեմ, ես հույս ունեի, որ Ադրբեջանը կպարտվի: Դա լավ հնարավորթյուն կլիներ նրանց համար սովորելու և դասեր քաղելու: Երբ վերջում հայերը կանգնած էին, և ադրբեջանցիները սեղմում էին նրանց ձեռքը, ես խենթանում էի ուրախությունից: Խենթանում էի՝ տեսնելով Ադրբեջանի խաղացողների շոկ ապրող դեմքերը: Սպորտը ամբողջությամբ հարգանք է: Շատ դասեր կան, որ մենք պետք է քաղենք հուլիսի 21-ին կայացած Հայաստան-Ադրբեջան խաղից»,- գրել է թուրք պաշտոնյան:

Վերջինիս համար Հայաստանի հավաքականն իրական բացահայտում է եղել. «Տարիներ շարունակ Հայաստանի բասկետբոլի ֆեդերացիան քայլեր է ձեռնարկում մարզաձևը զարգացնելու համար: Կան դժվարություններ, որոնք հաղթահարվում են, և Հայաստանն ունի բավական ուժեղ հավաքական»:

Ի դեպ, Տազեն հայերեն գրելով «շնորհակալություն»՝ իր երախտիքն է հայտնել հայկական պատվիրակության բոլոր անդամներին: «Ուզում եմ շնորհակալություն հայտնել հայկական պատվիրակության բոլոր անդամներին, մասնավորապես՝ Արթուրին, մարզչական անձնակազմին, ովքեր կարողացան սիրտ և ոգի ներդնել բասկետբոլում: Նրանք իրենց պրոֆեսիոնալ դրսևորեցին: Հատուկ շնորհակալություն մարզիչ Վիգեն Էսկիջյանին, ով խաղացողների մեջ ձևավորել է հաղթողի հոգեբանություն: Նրանք իսկ հաղթողներն էին այդ օրվա»,- հավելել է Տազեն:

Հիշեցնենք, որ այս մրցաշարում Ադրբեջանի հավաքականին հաղթելուց հետո մեր ընտրանին 96:75 հաշվով առավելության հասնելով Իռլանդիայի նկատմամբ՝ զբաղեցրել է 17-րդ հորիզոնականը: