Բոլոր ազգերի մեջ հայ մայրիկն առաջին մրցանակի հաղթող. «Փաստ»

«Փաստ» օրաթերթը գրում է.

Մերի Սարիկյանը, հղիության շրջանից հաճախելով Գերմանիայի Մանհայմ քաղաքի մայրիկների դպրոց, նպատակ է ունեցել իր բնավորության համաձայն պահպանել կարգապահ լինելու սկզբունքը և հղիության ողջ ընթացքում «ապահովել» իր մանկիկի բնականոն զարգացման ընթացքը: Բայց միայն կարգ ու կանոնին հետևելը չի եղել նրա դպրոց հաճախելու նպատակը, այլև ողջ հղիության ընթացքը հետաքրքիր դարձնելն ու նույն կարգավիճակում գտնվող ապագա այլ մայրիկների հետ շփվելը:

«Մայրիկների դպրոցի մասին իմանալուց հետո սկզբում մեծ հաճույքով հաճախեցի նախապատրաստական դասընթացների: Դրանից հետո մասնակցեցի երեխայի ճիշտ կերակրման հմտությունների դասընթացին: Այսինքն, հղիության ողջ ընթացքի համար անհրաժեշտ բոլոր դասընթացներին հաճախեցի: Հայտնի է, որ հետծննդյան շրջանում բոլոր մայրերը հետծննդաբերական դեպրեսիաների մեջ են ընկնում, և երեխայիս ծննդից հետո, դպրոցն ինձ առաջարկեց վերականգնողական դասընթացների մասնակցել»,– ասաց Մերի Սարիկյանը:

Դասընթացների ժամանակ նոր ծննդաբերած մայրիկները հնարավորություն են ունեցել շփվել միմյանց հետ: Եվ այդ դասընթացի ժամանակ, տեղեկանալով դպրոցում կազմակերպվելիք մայրիկների մրցույթի մասին, Մերին որոշել է մասնակցել և որպես մայրիկ հասկանալ, թե դասընթացների ընթացքում որքանով է հաջողվել դառնալ անթերի մայրիկ իր բալիկի համար:

«Սկզբում բացարձակ չէի մտածում հաղթելու մասին, պարզապես հետաքրքրությունից ելնելով որոշեցինք մասնակցել մրցույթին: Մրցույթին մասնակցող մայրիկները շատ տարբեր ազգությունների ներկայացուցիչներ էին: Կային ռուսներ, գերմանացիներ, հնդիկներ, թուրքեր: Բացի ինձնից, մեկ այլ հայ մայրիկ էլ կար: Առաջին փուլը հաղթահարելուց հետո, ոգևորությունս բավականին մեծացավ, քանի որ իմ հաղթելու հավանականությունը ավելի ռեալ դարձավ»,– ասաց Մերին:

Առաջին փուլի մոտ 40 մասնակիցներից երկրորդ փուլ են անցել 10–ը: Հայտարարված երկու անվանակարգից՝ «Մայրիկի լավագույն օրակարգը» և «Ամենածիծաղաշարժ պատմությունը», մեր հայրենակից երիտասարդ մայրիկին հաջողվել է առաջին անվանակարգի հաղթողը դառնալ:

«Ես մրցույթի մասնակցելու փորձ արդեն ունեի, քանի որ Գերմանիայում բնակվելու ժամանակ, երբ հաճախում էի գերմաներենի դասընթացների, հայտարարված մրցույթի ժամանակ կարողացա ընկերներիս ներկայացնել Հայոց ցեղասպանության մասին նյութեր և համոզվեցի, որ եթե ասելիքն իսկապես ազնիվ է և ցանկությունը մեծ է, որ օտարազգիները քեզ հասկանան, ապա ասելիքը փոխանցելու ժամանակ լեզվի չիմացությունը չի կարող խոչընդոտ լինել»,– ասաց Մերին:

Առաջին մրցանակը շահելուն օգնել է ոչ միայն լեզվի դասընթացների ժամանակ կուտակած փորձը, այլև մայրանալուց հետո այն զգացմունքների հրավառությունը, որը նա ապրել է երեխայի աշխարհ գալուց հետո: Մասնագիտությամբ իրավաբան–մայրիկը ոլորտի մասին հարուստ պաշար ունենալուց բացի այս ընթացքում հասկացել է, թե որն է իրականում իր հիմնական կոչումը:

«Զգացմունքների մի այնպիսի բարձր ալիք էր իմ հոգում արթնացել, որ կարծես ես գտել էի իմ իսկական՝ մայր լինելու կոչումը: Եվ եթե աղջկաս՝ Էմիլի ծնունդից հետո իմ հոգում կուտակված ամբողջ էմոցիաներն ու փորձը կարողանամ փոխանցել մեր հայ մայրիկներին, դա ինձ համար կլինի ամենաիդեալական զբաղմունքը»,– ասաց Մերի Սարիկյանը:

26–ամյա մայրիկն ասաց, որ այս պահին իր ամենամեծ ցանկությունն իրականացնելու համար նախաձեռնել է հանդիպում կազմակերպել բոլոր նորաթուխ մայրիկների հետ:

Բայց մինչ այդ, նա խորհուրդ է տալիս, որ այս զբաղված աշխարհում երեխայի հոգսերով զբաղվելուց բացի, շրջապատի մեկուսացումից միայնակության զգացում չունենալու համար շրջապատի հետ շատ խոսել ու կիսվել սեփական ապրումների մասին, ինչը թույլ կտա հաղթահարել միայնակության բարդույթը: Նա նախատեսում է նաև ստեղծել կայք, որը բոլոր մայրիկներին կօգնի ավելի տեղեկացված լինելուց բացի նաև օգնել միմյանց, և փոխանակվել սեփական պատմություններով: Ի դեպ, ֆեյսբուք սոցիալական ցանցում արդեն ստեղծված «Էմիլի & մամի» էջն ազատ հարթակ է, որի միջոցով բոլոր մայրիկները կարող են հարցեր ուղղել Մերիին և ստանալ պատասխանները:

Շարունակությունը` «Փաստ» օրաթերթի այսօրվա համարում