Քաղաքականությունն առաջնորդելու մասին է, և կանայք արդեն պարտավոր են ստանձնել այդ պատասխանատվությունը

«Եթե ուզում եք հասկանալ, թե ինչպիսին է քաղաքականությունն առանց կանանց, ապա ձեռքով փակեք ձեր մի աչքը…այնպես ինչպես տեսնում եք՝ ոչ լիարժեք ու թերրի, նույն պատկերն էլ ունի քաղաքականությունն առանց կանանց։ «Ապրելու երկիր» կուսակցության նախագահ Մանե Թանդիլյանն այսպես սկսեց իր ելույթն ուսանողների հետ հանդիպմանը։

«Ժամանակակից առաջնորդություն. միտումներ և մարտահրավերներ» հանդիպումների շարքի շրջանակում Մանե Թանդիլյանն այցելել էր Հայաստանում ֆրանսիական համալսարան՝ հանդիպելու տարբեր ֆակուլտետների և կուրսերի ուսանողների հետ։ Համալսարանի ռեկտոր Սալվա Նակուզին ողջունեց նախաձեռնությունը՝ կարևորելով կանանց առաջնորդության մասին ևս մեկ անգամ խոսելու, մարտրահրավերները բարձրաձայնելու և կանանց ուաղջիկներին աջակցելու ծրագրերը։ Այնուհետև, մոտիվացիոն ելույթով հանդես եկավ Մանե Թանդիլյանը։ Ո՞րն է ժամանակակից առաջնորդությունը, ինչ հատկանիշներ պետք է ունենա առաջնորդը, և առաջնորդությունն ունի՞ արդյոք սեռական խտրականություն. Մանե Թանդիլյանի ելույթից առանձնացրել ենք ուշագրավ հատվածները.

Առաջնորդությունն ու կանանց ներգրավածությունն այդ համատեքստում

Դրականն առաջ մղելը, բարեփոխումները, հասարակության և աշխարհի համար որևէ լավ բան անելն ունի առաջնորդման կարիք, հետևաբար, առաջնորդությունը բնական ու կարևոր երևույթ է, որովհետև առանց դրա փոփոխության հասնել հնարավոր չէ։

Ինչպես համոզված եմ, որ ժամանակի հետ փոխվել և փոխվում են առաջնորդների կերպարները, այնպես էլ խորապես համոզված եմ, որ ավելի շատ կանայք պետք է ստանձնեն այդ առաջնորդությունը։ Շատ կարևոր եմ համարում, որ այս դիսկուրսում ներգրավված լինեն նաև տղամարդիկ, ու շատ ուրախ եմ դահլիճում ակտիվ տղաներ տեսնելու համար։ Իսկ կարևոր եմ համարում, որովհետև, երբ խոսում ենք կին-տղամարդ ներգրավածության մասին, ամենևին էլ նկատի չունենք իրար հակադրվելը։ Ընդհակառակը… մենք պետք է տեսնենք այնպես, ինչպես տղամարդիկ. աշխարհում միակողմանի ոչինչ չի լինում, և առաջնորդությունը պետք է լինի միասին, զուգահեռ, համագործակցային։

Արդյունավետ առաջնորդություն. Կարողանալ սահմանել առաջնահերթությունները

Առաջնահերթություն սահմանելը միայն տղամարդկային հատկանիշ չէ. սահմանել կարևորը, տարբերակել, առաջնայինը ոչ այնքան առաջնայինից ու երկրորդականից։ Իհարկե, կարող ենք ասել, որ սա սովորել ևս հնարավոր է, բայց կարող ենք և ասել, որ դա բնատուր է։ Պատկերացրեք իրավիճակ, երբ մեր մայրերը գալիս են տուն, տունը թափթփված է, խառը, ընտանիքը ևս նոր է վերադարձել աշխատանքից… ի՞նչ է անում կինն առաջինը. հավաքում է տու՞նը, թե՞ ուտելիք է պատրաստում ընտանիքի համար, որովհետև հասկանում է, որ դա այդ պահին ավելի կարևոր է։ Չէ՞ որ կնոջը, ոչ ոք չի ասել, թե տուն վերադառնալիս կամ նման իրավիճակում հայտնվելիս առաջնայինն ինչն անի, կինը պարզպաես բնությունից տրված բնազդով գիտի, թե իր ընտանիքի համար որն է ավելի կարևոր ու օգտակար, և կարողանում է սահմանել այդ առաջնահերթությունները։

Ժամանակի ճիշտ կառավարում. հասցնել ամեն բան

Նույն 24 ժամն ունեն և՛ տղամարդիկ, և՛ կանայք։ Բայց կանայք այդ ընթացքում անում են ավելին, քան տղամարդիկ։ Աշխատանք, ընտանիք, կարիերա, երեխաներ, ընկերներ, ազատ ժամանց ու սիրելի զբաղմունք. այս ամենը համատեղում են, ու կարողանում են այնպես անել, որ մեկը մյուսի պատճառով չտուժի։ Կանայք ամեն ինչ հասցնում են իրենց բնազդով, որովհետև շատ լավ գիտեն, որ հակառակ դեպքում չեն հասցնի ոչինչ։

Փոփոխություն «պարտադրելը» կամ փոփոխությունն ավարտին հասցնելը

Սկսած բանը կիսատ թողնել չի կարելի ու չես կարող, կինը՝ առավել ևս։ Որովհետև այդ փոփոխության կրողն է, որովհետև հեռատես ու հետևողական է, որովհետև մտածում է երկարաժամկետ ու տեսնում է այդ փոփոխության հնարավոր արդյունքը։

Մենթորինգ.  Քեզ հետ միասին զարգացնել նաև դիմացին 

Քեզ հետ միասին տանել առաջ, օգնել աճին, զարգացմանն ու կայացմնանը, գիտելիքն ու հմտությունները փոխանցել դիմացինին. մենթորինգն առաջնորդության կարևոր էլեմենտներից է։ Եվ առաջնորդները պետք է կարողանան նաև ոգեշնչել։

Կանանց ներգրավածությունը քաղաքականությունում պետք է լինի բովանդակային

Անարդարացիորեն, բայց քաղաքականությունը համարվում է տղամարդկանցը։ Ամբողջ աշխարհում երկրների կին ղեկավարները ընդամենը 6-7 % են կազմում։ Այսինքն, հազարավոր կարևոր որոշումներ կայացվում են «մեկ աչքով», դրանք կանանց երկարաժամկետ մտածողության, անվտանգության բնազդային հատկանիշներից զուրկ որոշումներ են, դրանք ռիսկի նկատմամբ ավելի զգուշավոր, ավելի հաշվենկատ ու ավելի խորը մտածող մարդկանց բացակայության պատճառով արված որոշումներ են։ Հիմա առավել քան երբևէ, պետք է մտածելու տեղիք տա, թե ինչպես անել, որ կանայք ավելի շատ ներգրավվեն կարևոր որոշումների կայացման գործընթացում։

Հանդիպման ընթացքում ուսանողներն ակտիվորեն ներգրավվեցին հարց-պատասխան ձևաչափով քննարկմանը, Մանե Թանդիլյանին ուղղեցին իրենց հուզող հարցերը քաղաքականությունում կանանց ներգրավածության բարձրացման, արժեքների ու սկզբունքների սահմանման, սեփական կարողությունները ճիշտ գնահատելու և այլ կարևոր թեմաների մասին։

Նշենք, որ հանդիպումների շարքը լինելու է շարունակական։