Ընդդիմադիր դիմակ հագած որոշ կերպարներ աստիճանաբար կորցնում են ողջամտության վերջին փշուրները

Ընդդիմադիր դիմակ հագած որոշ կերպարներ աստիճանաբար կորցնում են ողջամտության վերջին փշուրները, անում հայտարարություններ, որոնք առաջին հայացքից են միայն փաշինյանական վարչախմբի դեմ, իրականում սպասարկում են Փաշինյանի օրակարգը, հանրության մեջ էլ տպավորություն ստեղծում, թե ընդդիմադիր շարժումը բաղկացած է բացառապես տրամաբանության հետ լուրջ խնդիրներ ունեցող անմեղսունակներից։

Լեհաստանում նախկին դեսպան, ՍԴ աշխատակազմի նախկին ղեկավար Էդգար Ղազարյանն այդ առումով, թերևս, անգերազանցելի է։ Որոշ ժամանակ առաջ Ղազարյանը Նիկոլ Փաշինյանի դեմ ակցիաներ էր անում կառավարության դեմ, խոստանում, որ նա «իքս» պահի հրաժարական կտա, ակտիվ գործողություններ խոստանում, սակայն հետո ծլկեց՝ հերթական անգամ վարկաբեկելով ընդդիմադիր շարժումը։

Այժմ էլ Ղազարյանը, թերևս կորցրել է Փաշինյանին պաշտոնանկ անելու հույսերը՝ թիրախներն ուղղելով տնտեսության առանցքային ոլորտների դեմ։ Ոչ ավելի, ոչ պակաս, Էդգար Ղազարյանը, փրփրակալած քննադատում էր «Սպայկա» ընկերությանը, հայհոյանքներ ու վիրավորանքներ հասցնելով։ Իսկ ընկերության միակ «մեղքն» այն է, որ հումանիտար օգնություն է տեղափոխել Թուրքիա։

Իսկ ո՞վ պիտի տեղափոխեր, եթե հենց «Սպայկան» է Հայաստանի թիվ մեկ բեռնափոխադրողը, որն աշխատում է աշխարհի տարբեր երկրների հետ, ապահովում Հայաստանից արտահանման առյուծի բաժինը, 1000 խոշոր հարկատուների ցանկում 2022 թվականին 58-րդն է եղել՝ վճարելով 4,6 մլրդ դրամ հարկ:

Այսինքն, գործ ունենք մի իրավիճակի հետ, երբ կյանքում ոչինչ չստեղծած, սեփական երկրին որևէ բարիք չտված քրոնիկ մի անմեղսունակ հանդգնում է քննադատել Հայաստանի տնտեսության լոկոմոտիվներից մեկին, որը պարզապես բարեխղճորեն իր գործն է արել՝ կառավարության պատվերով ապրանք է տեղափոխել Թուրքիա։ Նույն հաջողությամբ, ընկերությունը արտերկրից սնունդ է բերում Հայաստան, դրանից, միգուցե, օգտվում է ինքը՝ Էդգար Ղազարյանը։

«Սպայկան» տարիներ շարունակ Հայաստանի այցեքարտն է եղել և կա։ Ու Թուրքիա հումանիտար օգնություն ուղարկելու փաստը քննադատելու համար ավելի ճիշտ և հասցեական թիրախներ կան, դիցուք՝ ՀՀ կառավարությունը։ Մասնավոր ընկերությանը, բիզնեսին հարվածելը ոչ հայաստանյան ընդդիմության շահերից է բխում, ոչ էլ Հայաստանի Հանրապետության։ Իսկ էդգար Ղազարյանների ելույթները դիտողները, վստահաբար, ավելի ու ավելի են հիասթափվում ընդդիմությունից։

Ահա այսպես, մանիպուլյացիաներով, անմեղսունակներին եթերներ ապահովելով, անհեթեթ հռետորաբանությունը խթանելով էլ փաշինյանական վարչախումբը շարունակում է իշխել Հայաստանում։ Իսկ մենք զարմանում ենք, թե ինչու այսպես եղավ:

Արմեն Ստեփանյան