Իշխանությունների տվայտանքը Ռուբեն Վարդանյանի շուրջ ունի մեկ պատճառ՝ իշխանությունը կորցնելու վտանգը

Հայաստանի գործող իշխանությունների տվայտանքը Ռուբեն Վարդանյանի շուրջ ունի մեկ պատճառ՝ իշխանությունը կորցնելու վտանգը։ «Ապրելու երկիր» կուսակցության նախագահ Մանե Թանդիլյանն այդ մասին ասել է «Գալայի» հետ զրույցում։

Խոսելով Ռուբեն Վարդանյանի շուրջ ծավալվող իրադարձությունների և Հայաստանից հնչող քննադատությունների մասին՝ Մանե Թանդիլյանը նշել է, թե գործող իշխանություններն իրենց իշխանության համար վտանգ են տեսնում Ռուբեն Վարդանյանի հասարակական, քաղաքական գործունեությունից։

Քանի որ այս իշխանությունը հետապնդում է բացառապես մեկ նպատակ՝ պահել սեփական իշխանությունը, նրանց բոլոր լարումներն ու հուզմունքը գալիս է հենց այդ հանգամանքից և այստեղ է, որ նրանք տեսնում են վտանգ, հասկանում են, որ Հայաստանում նախկինների վերադարձ չի լինելու, հասկանում են , որ ժողովուրդն ունի այդ տրամադրվածությունը, ինչը գովելի է։ «Այսօր, բոլոր տեսակի այլ ուժի կենտրոնացում որևէ ձևաչափով իշխանությունների համար վտանգ է»,- նշում է Մանե Թանդիլյանը, իսկ Ռուբեն Վարդանյանի դեմ տարվող քարոզչության այլ պատճառ չի տեսնում։

«Ասել, որ Արցախում իրավիճակն ավելի դժվարացավ Ռուբեն Վարդանյանի այնտեղ գնալով՝ անմեղսունակ և պարզունակ մտածողություն է, ես չեմ խորշելու այս բառերն օգտագործել, իսկ որ Արցախում չէր Ռուբեն Վարդանյանը, այնտեղ ամեն ինչ լա՞վ էր, որ չհանձնվեցին Աղավնոն ու մի շարք այլ գյուղեր, մենք մեղավորներ ենք փնտրում մե՞ր մեջ, պայքարո՞ղ մարդկանց մեջ»,- հարցադրում է անում Մանե Թանդիլյանը։

«Ապրելու երկիր» կուսակցության նախագահի խոսքով՝ Ադրբեջանի նպատակն է Արցախը տեսնել առանց հայերի և դրա համար էլ ամեն ինչ անում են, որպեսզի Արցախում Ռուբեն Վարդանյանից ազատվեն։ Ի դեպ, այդ հարցում Ադրբեջանի իշխանություններին բավականին լուրջ աջակցություն են սկսել ցուցաբերել Արցախի գործող իշխանությունները։

Մամուլի տեղեկություններով՝ վերջերս լարվել են Արցախի նախագահ Արայիկ Հարությունյանի և գործարար Արման Հակոբջանյանի հարաբերությունները։ Արման Հակոբջանյանը Ռուբեն Վարդանյանի խորհրդականն է և Արցախում իր աջակցության համար նրա բազմաթիվ մտերիմներ բավականին բարձր պաշտոնների են նշանակվել։ Ռուբեն Վարդանյանի պահանջով՝ Արման Հակոբջանյանի մերձավորներից նշանակվել են քաղաքաշինության և գյուղատնտեսության նախարարներ, իսկ նրա բարեկամին 1 ամիս առաջ պաշտոնանկ արեցին ԱԱԾ տնօրենի պաշտոնից, ինչը վկայում է, որ Արայիկ Հարությունյանն առնվազն ուժային սեգմենտում փորձում է հրաժարվել Ռուբեն Վարդանյանի հետ կապ ունեցող անձանց ծառայություններից և փորձում ամեն կերպ թուլացնել Արցախի պետնախարարին, ինչը թերևս չափազանց բարդ է լինելու, քանի որ հանրությունն արդեն սկսել է հստակ գիտակցել և հասկանալ, թե ով ով է թե՛ Արցախում և թե՛ Հայաստանում։

Արմինե Կարապետյան