«Ռուսներն այսօր այնքան խնդիրներ ունեն, որ մեր դեմ ուղղված քայլեր անելու ժամանակ ու ցանկություն հազիվ թե ունենան». «Փաստ»

«Փաստ» օրաթերթը գրում է.

Մեր հարցերին պատասխանում է ժողովրդագիր Ռուբեն Եգանյանը

– Պարոն Եգանյան, որոշումը, որով արգելվում է Հայաստանում տրված վարորդական վկայականների կիրառությունը Ռուսաստանի Դաշնությունում, ինչպե՞ս կանդրադառնա մեր միգրանտների վրա:

– Բնականաբար մարդկանց վրա վատ է անդրադառնալու: Նրանց ծախսերն են ավելանալու: Նրանց հնարավորություններն են սահմանափակվելու:

Եվ աշխատանքային մեր միգրանտները, եթե զբաղվում են բեռնափոխադրումների գործով, կամ մեքենաներ են վարում, պետք է փորձեն լուծել իրենց հարցերը: Իսկ լուծելը խնդիրներ են, որոնք կապված են դրամական ծախսերի հետ, կապված են նաև ժամանակի կորստի հետ, այլևայլ դժվարությունների հետ:

– Իսկ հնարավո՞ր է սա պատճառ դառնա, որ տեղի ունենա մարդկանց ներհոսք Հայաստան:

– Ես չեմ կարծում, որ մեր աշխատանքային միգրանտների մեծ մասն է, որ զբաղվում է տրանսպորտային ծառայությունների մատուցմամբ, որպեսզի վերադառնան Հայաստան: Այնպես որ, ես այս հարցի հետ կապված ներհոսք չեմ կանխատեսում:

– Իսկ ինչպե՞ս եք գնահատում Ռուսաստանի դիրքորոշումը:

– Ես գնահատում եմ որպես իրենց ներքին խնդիրների լուծմանն ուղղված քայլ ընդամենը: Նրանք ցանկանում են առավել լիարժեք դարձնել իրենց տրանսպորտային միջոցների անվտանգությունը:

– Ընդամե՞նը:

– Կարծում եմ` այո:

– Քաղաքական ենթատեքստ չե՞ք տեսնում:

– Ոչ: Առանձնապես քաղաքական ենթատեքստ չեմ տեսնում: Հիմնականում տրանսպորտային ծառայությունների կարգավորման հարցն է: Գուցե և կողքից այլ խնդիրներ ևս կան, որոնք այդքան էլ նշանակալից չեն:

– Իսկ այդ դեպքում, ինչո՞ւ է մեքենա վարելու հնարավորություն տրվում այն երկրների քաղաքացիներին, օրինակ, Ղազախստանի, որտեղ ռուսերենն ունի պետական լեզվի կարգավիճակ: Ի՞նչ է` այս մարդիկ մասնագիտական առումով ավելի հմո՞ւտ են, քան հայ վարորդները:

– Այդ հարցի պատասխանը կարող են տալ Ռուսաստանի օրենքներն ընդունողները: Ես այդ հարցի պատասխանը չեմ կարող տալ:

Բայց բոլոր դեպքերում կարող եմ ասել, որ այդ օրենքը չի վերաբերվում միայն հայերին և հայերի դեմ չէ այն:

– Այդպես չմտածենք:

– Իհարկե, այդպես չպետք է մտածել: Որովհետև ռուսներն այսօր այնքան խնդիրներ ունեն, որ մեր դեմ ուղղված քայլեր անելու ժամանակ ու ցանկություն հազիվ թե ունենան:

  Շարունակությունը` «Փաստ» օրաթերթի այսօրվա համարում