Չինական՝ 40–ամյա պատմություն ունեցող մեքենաշինական ընկերությունը Հայաստանում ներդրումներ կանի. «Փաստ»

«Փաստ» օրաթերթը գրում է.

ՀՀ տնտեսական զարգացման և ներդրումների նախարար Սուրեն Կարայանը երկու օր առաջ հանդիպել էր Չինաստանի մեքենաշինական կորպորացիայի՝ Երևան ժամանած պատվիրակության հետ։ Իսկ հանդիպման ընթացքում նախարարին էր ներկայացվել ընկերության հիմնական գործունեությունը շինարարության և էներգետիկայի ոլորտներում, այն է՝ էլեկտրակայանների, ջերմակայանների, ջրակայանների, շենքերի և ճանապարհների կառուցում և շինարարություն։

China Machinery Engineering Corporation–ի ներկայացուցիչ Ջեյմս Դոնգը Սուրեն Կարայանին հայտնել էր, որ ընկերությունը հետաքրքրված է Հայաստանում խոշորածավալ ներդրումներ իրականացնելով: Սուրեն Կարայանը պատվիրակությանը ներկայացրել էր Հայաստանի ճանապարհաշինության և էներգետիկայի ոլորտում ներդրումներ իրականացնելու հեռանկարները՝ ներկայացնելով Հյուսիս–հարավ մայրուղու շինարարության և Սյունիքի մարզում կառուցվող Ազատ տնտեսական գոտում գործունեություն ծավալելու հնարավորությունները։

Տնտեսական զարգացման և ներդրումների նախարարության կայքից տեղեկանում ենք, որ հանդիպման ընթացքում պայմանավորվածություն է ձեռք բերվել, որ Հայաստանի զարգացման հիմնադրամի տնօրեն Արմեն Ավակյանը ընկերության ուշադրությանը կներկայացնի Հայաստանի խոշոր ներդրումային ծրագրերի մանրամասները, և ներդրումների իրականացման հետագա քայլերի քննարկման նպատակով նախարարությունը մշտական կապի մեջ կլինի ներդրողների հետ:

Ինչևէ, բավական խոստումնալից պատմություն է, առավել ևս եթե ծանոթ լինես ընկերության գրանցած հաջողություններին և անցած ճանապարհին: Ահա մի քանի տեղեկություն չինական ընկերության մասին:

Ընկերության պաշտոնական կայքից՝ www.cccme.org.cn կայքից տեղեկանում ենք, որ Չինաստանի ազգային մեքենաների և սարքավորումների ներմուծման և արտահանման կորպորացիայից վերանվանվելով Չինաստանի Մեքենաշինության Ինստիտուտ (CMEC)՝ ընկերությունը հիմնադրման առաջին քարը դրել է դեռևս 1978 թ.–ին՝ որպես առաջին խոշորագույն ազգային արդյունաբերական և առևտրային կորպորացիա:

CMEC–ը ներկայում ներդրումային գործունեությամբ է զբաղվում աշխարհի շուրջ 150 երկրներում՝ որպես միջազգային կոնստրուկտորական պայմանագրման հիմնական կապալառու և ամբողջական կայանի արտահանման բիզնես ներկայացուցիչ:

Հետևելով երազանքը իրականություն դարձնելու իր նշանաբանին՝ CMEC–ը անընդհատ իր վրա է վերցնում փոխադարձ օգուտ, ընդհանուր զարգացում, ներդաշնակություն և առաջընթաց ցուցիչները, ձգտում է դառնալ միջազգային կորպորատիվ խումբ, որը կզբաղեցնի առաջին տեղը Չինաստանում և կլինի հանրաճանաչ ամբողջ աշխարհում:

Այն խոշոր միջազգային ինտեգրված ընկերություն է, որը համաձայնագրեր ունի հիմնական բիզնեսի նախագծերում ներմուծման ու արտահանման և՛ արդյունաբերական և՛ առևտրային կոմբինացիաներում:

Ընկերությունը միաժամանակ զբաղվում է գիտական հետազոտությունների ու միջազգային ծառայությունների, ինչպես նաև տեխնոլոգիաների և առևտրի ինտեգրման հարցերով: Հանդիսանալով հեղինակավոր միջազգային կապալառու մեքենաշինության բնագավառում՝ նրա ինժեներական պայմանագրերի շրջանակի մեջ են մտնում նաև այնպիսի ոլորտներ, ինչպիսիք են էլեկտրոէներգետիկան ու առհասարակ էներգետիկան, տրանսպորտն ու էլեկտրոնային հաղորդակցությունը, բնակելի, շինարարական, արտադրական ու վերամշակող ընկերությունները, շրջակա միջավայրի պահպանությունը և օգտակար հանածոներ ունեցող հանքերի ուսումնասիրությունը:

Շարունակությունը` «Փաստ» օրաթերթի այսօրվա համարում