Տիգրան Ուրիխանյանը ներքաղաքական գաղջ օդի ու կլիմայական փոփոխությունների մասին. «Փաստ»

«Փաստ» օրաթերթը գրում է.

Պարզվում է ԱԺ պատգամավոր Տիգրան Ուրիխանյանը ընտրություններից առաջ հույս է ունեցել, որ ժողովրդի մեծամասնությունը ոչ թե իշխող ՀՀԿ–ին ձայն կտա, այլ այն քաղաքական ուժին, ով ամեն քայլափոխի ժողովրդի հետ է եղել ու կատարել նրա ամենաչնչին ցանկությունն անգամ:

«Ժողովուրդը 5 տարի շարունակ ինձնից պահանջում էր, որ ես իր յուրաքանչյուր կապրիզն իրականացնեմ Ազգային ժողովում: Եվ ես մտածում էի, որ դրանից հետո, դա քվեի տեսքով կարտահայտվի, բայց պարզվեց, որ սա այն երկիրը չէ, որտեղ ժողովուրդն ընդհանրապես դիրքորոշում ունի»,– ասաց պատգամավորը:

Ու այսքանից հետո նա թեև հիասթափվել է հասարակությունից, բայց տրամադրությունն այնքան էլ չի ընկել: Ինչ վերաբերում է Հայկական կուսակցությունների երրորդ ֆորումին ու ֆորումի շրջանակներում ընդունված բանաձևին, ապա այդ մասին նա որևէ ինֆորմացիայի չէր տիրապետում: Նույնիսկ տեղյակ էլ չէր օրվա «բում նյուզին»՝ որ Ալեքսանդր Արզումանյանը երկար ժամանակ ընդդիմադիր խաղեր տալուց հետո ՀՀ նախագահի հրամանագրով արդեն նշանակվել է Դանիայի Թագավորությունում Հայաստանի Հանրապետության արտակարգ և լիազոր դեսպան:

«Անկեղծ ասած այդ մասին էլ որևէ տեղեկություն չունեմ: Ես արձակուրդում եմ գտնվում, ինչպես մնացած բոլոր նորմալ մարդիկ»,– ասաց Տ. Ուրիխանյանը:

Նա նաև ասաց, որ քաղաքականությունից էլ է «արձակուրդ» վերցրել, քանի որ նոր է վերադարձել Եվրոպայի անվտանգության և համագործակցության կազմակերպության վեհաժողովից, որտեղ հավուր պատշաճի ներկայացրել է մեր երկիրը, երկու զեկույց է ներկայացրել ժողովրդավարության և մարդու իրավունքների հանձնաժողովում, այն քվեարկությամբ անց է կացրել և հանձնաժողովի կողմից ընդունվել է բանաձևը: Այդքան գործից հետո հիմա վայելում է իր արձակուրդը: Նա չցանկացավ տեղեկացնել, թե որտեղ է պատրաստվում անցկացնել արձակուրդը, քանի որ անձնական հարցերի չի ցանկանում պատասխանել:

Պատասխանելով հարցին, թե արդյո՞ք ներքաղաքական կյանքում կրկին գաղջության մթնոլորտը չի դարձել գերակայող, Տ. Ուրիխանյանն ասաց, որ ժողովուրդը լավ հնարավորություն ուներ իշխանափոխություն իրականացնելու, բայց ընտրեց փողն ու իշխանությունը, ուստի այսուհետ ունենալու են այն, ինչ նախկինում արդեն ունեցել են:

«Իմ նման մարդիկ, որոնք անվերապահորեն, ցանկացած մանրուքներից սկսած, խոշորագույն հարցերով վերջացրած սպասարկել են հանրային ու ժողովրդական շահը, այսուհետ պետք է մտածեն, թե արդյո՞ք ճիշտ են շարժվել, թե՞ այն ժողովուրդը, որը ընտրեց մեծամասնությանը կամ իշխանությանը, ավելի ճիշտ քաղաքական դիրքորոշում ունի: Այսինքն, եթե մեր հանրության մեծ մասին դուր է գալիս, մեծ մասը ճիշտ է համարում, այն քաղաքական կուրսը որը վարվել և վարվում է, և ինքն իրեն հետ համահունչ է զգում այդ ամենի հետ, ապա դա է օրվա ուղեցույցը և ուղենիշը: Ժողովրդի ցանկությունը քաղաքական և պետական գործիչների համար թիվ մեկ ուղենիշն է: Ուստի քաղաքական, պետական կամ առհասարակ մթնոլորտը գաղջ է, թե գաղջ չէ, այնուամենայնիվ, դուրեկան է նույն այն մեծամասնության համար, որն ընտրեց իշխանությանն ու իշխանական ուժերին»,– ասաց Տ. Ուրիխանյանը:

Հարցին, թե եթե ինքը մասնակցեր Սևանից լրացուցիչ ջրառ իրականացնելու օրինագծի քվեարկությանը «կո՞ղմ» կքվեարկեր, թե՝ «դեմ», ասաց, որ ինքը 105 պատգամավորներից 90–ի նման չէ, որ ձեռքի հետ լսելով օրենք քննարկի կամ դիրքորոշում հայտնի: Այսինքն՝ մինչև հարցը չուսումնասիրի, ոչինչ էլ չի ասի: Իսկ զրույցի վերջում պատգամավորը հասարակությանը կոչ արեց նաև լրջորեն վերաբերել շրջակա միջավայրում առկա փոփոխություններին:

«Որովհետև կլիմայական փոփոխության վատթարացումները, երբ հունիս ամսվա ընթացքում օդի ջերմաստիճանը հասնում է 40 աստիճանի, իսկ մի քանի օր հետո կարկուտ է տեղում, լուրջ խնդիր է մարդկության ու հայաստանցիների համար: Ամռանը՝ այսքանը»,– իր խոսքը եզրափակեց պատգամավորը: