Համահայկական կառույց` ազգային ներուժը մեկտեղելու նպատակով. «Փաստ»

«Փաստ» օրաթերթը գրում է.

Մեր հյուրն է Համագործակցության և փոխօգնության համազգային կառույցի աշխատանքային խմբի ղեկավար Արշակ Սադոյանը

– Պարոն Սադոյան, Դուք նախաձեռնության այլ անդամների հետ միասին խնդիր եք դրել ստեղծել Համագործակցության և փոխօգնության համազգային կառույց: Ի՞նչ ընթացքի մեջ է գործը:

– Այսօր մեր խնդիրն այն պետք է լինի, որպեսզի մտածենք, թե ինչպես դիմակայենք ժամանակակից աշխարհի մարտահրավերներին: Իսկ Հայաստանում ընդամենն ապրում է 2,7–2,8 միլիոն մարդ: Մինչդեռ ողջ աշխարհում հայերի քանակը հասնում է մինչև 11 միլիոնի: Նշանակում է մարտահրավերներին դիմակայելու հարցում պետք է ներգրավենք աշխարհի ողջ հայության պոտենցիալը, ո՛չ միայն Հայաստանում ապրողների:

Իսկ այսօր պայմանները նպաստավոր են այդ գաղափարի իրականացման համար: Քանզի աշխահի հզոր երկրները ոչ միայն չեն խոչընդոտում, այլև նպաստում են, որ աշխարհով մեկ ցրված ժողովուրդները կարողանան իրենց մշակութային առանձնահատկություններն օգտագործելով, հանդես գալ որպես ամբողջություն:

Նաև այսօր ինֆորմացիոն տեխնոլագիաների զարգացումը հնարավորություն է տալիս ստեղծել հեռակառավարվող կառույցներ: Այս հանգամանքներից օգտվելով, մենք խնդիր դրեցինք ստեղծել ազգ–կազմակերպություն, որը, որպես ամբողջություն, կփորձի իրականացնել իր սեփական քաղաքականությունը համաշխարհային քաղաքակրթության զարգացման գործում:

– Իսկ Դուք դիմե՞լ եք սփյուռքին, ինչպես է այն արձագանքում: Կամ ո՞ր կառույցների հետ եք աշխատում:

– Մենք հատուկ դիմել ենք սփյուռքի մեր համայնքների ներկայացուցիչներին և տեղեկացրել նրանց մեր ծրագրի մասին: Նաև դիմել ենք Հայաստանի Հանրապետության բոլոր նախարարություններին, Աժ պատգամավորներին: Եվ քանի որ առաջիկայում նախատեսվում է կազմակերպել Հայաստան–սփյուռք 6–րդ համաժողովը, ապա համաժողովում առավել մանրամասնորեն կխոսենք նախագծի մասին:

– Իսկ մոտավորապես պատկերացնո՞ւմ եք, թե ինչ կառուցվածք է այն ունենալու:

– Որպես առաջին քայլ, ձևավորվելու է Համազգային խորհուրդը: Այն ըստ էության լինելու է ազգ–կազմակերպության պառլամենտը` բաղկացած մոտ 80 անդամից: Հաջորդ քայլով կստեղծվեն գործադիրի գործառույթներ իրականացնող հնաձնախմբեր: Իսկ հանձնախմբերի ղեկավարներից ձևավորվելու է գործադիր խորհուրդը, որը, փաստորեն, կազմակերպության կառավարությունն է լինելու:

– Առավել շոշափելի` ո՞րն է լինելու կազմակերպության ստեղծման նպատակը, ի՞նչ գործ է արվելու:

– Կազմակերպությունը նախ և առաջ ծառայություններ է մատուցելու մեր ազգակիցներին, որոնք կարող են գտնվել աշխարհի ամենատարբեր ծայրերում: Դրա համար տարբեր մասնագիտությունների գծով աշխարհով մեկ կստեղծվեն համահայկական համագործակցության և փոխօգնության կառույցներ:

Պայմաններ կստեղծենք, որպեսզի, համարյա առանց էական ծախսերի, օգտվեն հեռահաղորդակցության միջոցների հնարավորություններից և իրենց աշխատանքները կատարեն: Միաժամանակ պետությունը նրանց կաջակցի մեկնարկային միջոցներով: Արդյունքում կստեղծվի մի միջավայր, որտեղ հայ լինելը ոչ միայն կլինի պատիվ, այլև նյութական խրախուսանքի հնարավորություն կտա: Այսինքն` հայ լինելն ու իրեն հայ զգալը նաև կլինի օգտակար, նյութապես ձեռնտու:

Հենց այս սկզբունքն է ընկած լինելու մեր կառույցի հիմքում:

Կառույցի ներսում կիրականացվեն մոտ 30 տարբեր տեսակի ծառայություններ: Անգամ կիրականացվի հեռաբժշկություն:

Միաժամանակ բանակցություններ ենք վարում հայաստանյան բուհերի հետ, որպեսզի հեռավար ուսուցմամբ որակյալ կրթություն մատուցվի սփյուռքի մեր հայրենակիցներին: Անգամ մանկապարտեզների գործունեությունը կարող է տեսանկարահանվել ու տրամադրվել դրսի մեր երեխաներին:

Եվ նման միջավայրի պարագայում արտերկրի հայը հնարավորինս կարող է խուսափել ասիմիլացիայից:

– Ասել է թե` Ձեր նախաձեռնության հիմքում ընկած է նաև հայապահպանության գաղափարը:

– Բնականաբար: Նաև հարակից այլ բաղադրիչներ ունի նախագիծը: Մասնավորապես` լոբիստական գործունեությունը: Այդ շրջանակներում պետք է մենք աջակցենք դրսում քաղաքական գործունեությամբ զբաղվող մեր հայրենակիցներին:

Մի խոսքով` կառույցի կազմակերպչական հնարավորություններն օգտագործելով, պայմաններ կստեղծենք, որպեսզի, անկախ բնակության վայրից, մեր հայրենակիցներն ունենան մրցակցային առավելություններ այլոց նկատմամբ:

– Ովքե՞ր են նախագծի հեղինակները, ովքե՞ր են այն մշակել:

– Նախագիծի հիմնական սկզբունքները ներկայացվել է Հանրային խորհուրդ: Հանրային խորհրդի հավանությանն արժանանալուց հետո անձամբ ես զեկուցել եմ նրա մասին հանրապետության նախագահ Սերժ Սարգսյանին: Նախագահի կողմից դրական գնահատականի արժանանալուց հետո ուղարկվել է նախարարություններին:

Իսկ որպեսզի ծրագիրը մշակվի արդեն իր մանրամասնություններով, ստեղծվել է առանձին աշխատանքային խումբ, որտեղ ընդգրկվել են շահագրգիռ մարդիկ:

  Շարունակությունը` «Փաստ» օրաթերթի այսօրվա համարում