Իշխանությունները չեն կարող երկար հերքել անհերքելինՀայոց եկեղեցին և ազգային խնդիրները լուծելու մեր կարողականությունը. «Փաստ»

«Փաստ» օրաթերթը գրում է.

Արամ Սարգսյանը ՀՀԿ–ի վարչական ռեսուրս օգտագործելու մասին

Երեկ ԱԺ–ում շարունակվում էր արտահերթ նստաշրջանը: Հուլիսի 6–ից մեկնարկած նստաշրջանի գլխավոր թեման 2016թ. բյուջեի հաշվետվությունն է, որի նախաձեռնողը ՀՀ Կառավարությունն է: Նիստի ժամանակ հերթական անգամ քննարկման առարկա դարձավ նաև ընտրությունների ժամանակ վարչական ռեսուրս օգտագործել–չօգտագործելու հարցը: ՀՀԿ–ն ամեն կերպ փորձում էր ապացուցել, թե նման բան չի եղել, իսկ ընդդիմադիր պատգամավորները պնդում էին, որ ՀՀԿ–ն մեղմ ասած՝ ստում է:

Այս երկխոսության ժամանակ «Ելք» խմբակցության ղեկավար Նիկոլ Փաշինյանը հիշեցնելով ԽՍՀՄ տարիների հայտնի անեկդոտը, նշեց թե ինչպես ՀՀԿ–ն է փորձում «ապացուցել», որ վարչական ռեսուրսի օգտագործման փորձ չի եղել, այնպես էլ ԽՍՀՄ–ի տարիներին էին պնդում, որ մեր երկրում սեքս չկա:

«Փաստը» Դեմոկրատական կուսակցության ղեկավար Արամ Սարգսյանից փորձեց պարզել, թե իր կարծիքով ինչու է ՀՀԿ–ն «չեմ տեսել, չեմ լսել, չգիտեմ» դիրք բռնել, ինչպես ժամանակին խորհրդային միության ղեկավարներն էին սեքսի մասին հարցերին պատասխանելիս վարվում:

Արամ Սարգսյանը հարցը լսելուն պես առաջարկեց համեմատությունը մի կողմ դնել և խոսել բուն թեմայից, քանի որ բացահայտ է, որ իրականում վարչական ռեսուրս օգտագործվել է: Ավելին, նրա կարծիքով ռեյտինգային ընտրակարգով կազմակերպված ընտրությունները նույնպես ընթացել են ադմինիստրատիվ ուժերի մոբիլիզացիայի պայմաններում:

«Փաստ է, որ հանրապետության բոլոր մարզպետարանները, քաղաքապետարանները, գյուղապետարանները, բոլորն այդ գործով էին զբաղվում: Եվ զարմանալի կլիներ, որ չզբաղվեին, բայց նրանք այդ ռեսուրսն օգտագործել են միայն հօգուտ իրենց: Դա հաստատված փաստ է: Ամեն տարի մի բան հորինում են, այս տարի էլ ռեյտինգային ընտրակարգն էին հորինել»,– ասաց Արամ Սարգսյանը:

Քաղաքական–հասարակական գործիչը նշեց նաև, թե՛ բռնողն է հանրապետականը, թե՛ բռնվողը: Եվ այդ պայմաններում ինչպես կարող են իրենք իրենց բռնել: Նույնիսկ գազելներում գումար բաժանելու տեսանյութեր հրապարակվեցին, բայց դրանք այդպես էլ մնացին անարձագանք, այն պատճառով, որ սպասարկում էին Հանրապետականին:

«Եթե գործերը փակում են, հասարակությունը ո՞նց կարող է դա հաստատել: Թե ինչքան կտևի նրանց այդ գործելաոճը դժվար է ասել, բայց ուզում եմ նրանց հիշեցնել, որ գուցե 20–25 տարին իրենց համար երկար ժամանակ է, բայց պատմության տեսանկյունից, դա ծովում մի կաթիլ էլ չի: Երբ գա այն պահը, երբ իրենք ստիպված լինեն իրենք իրենց առջև հաշվետու լինել, կտեսնեն, թե ինչ են արել իրենց երկրի և ժողովրդի գլխին: Ես խնդիր չէի տեսնի, եթե իշխանությունը լիներ իշխանություն հանուն ժողովրդի ու պետության, բայց եթե իրենց իշխանության օրոք ամեն տարի երկրից հեռանում է մոտ 50 հազար մարդ, խոսել թե իրենք ինչ արեցին կամ չարեցին, անլուրջ և անիմաստ խոսակցություն եմ համարում»,– ասաց Ա. Սարգսյանը:

Նրա համար իշխանության լավ կամ վատ աշխատանքի ցուցիչը հասարակության բարեկեցությունն է: Եվ ակնհայտ է, որ գնալով մեծանում է հարուստների ու աղքատների միջև բևեռացումը, իսկ աղքատության թիվը այդպես էլ չի նվազում: Մյուս կողմից էլ երկիրն ամայանում է, իսկ սոցիալական որևէ լուրջ խնդիր այդպես էլ չի լուծվում: Այս պայմաններում այնքան էլ կարևոր չէ, թե իշխանություններն օգտագործե՞լ են ադմինիստրատիվ ռեսուրս, փող բաժանե՞լ են, թե՝ ոչ: Նրա կարծիքով մարդիկ սուս ու փուս նստած են ու չեն բողոքում, քանի որ արդեն զգացել են իրենց մեղավորությունը, բայց կգա մի պահ, երբ մարդիկ կհասկանան, որ իրենց սոցիալական վատ վիճակի և երկրում առկա անարդարության մթնոլորտի պատճառը իշխանություններն են:

«Ինչ վերաբերում է իշխանություններին, նրանք ամեն անգամ մտածում են, թե այս անգամ էլ իրենց գլուխն ազատեցին պարտականություններից, բայց հավատացնում եմ, որ այդ գործելաոճը երկար չի տևի: Աշխարհաքաղաքական ներկա զարգացումների ֆոնին Հայաստանում տեղի ունեցող իրադարձությունները մեղմ ասած բավականին հեռու են բավարար լինելուց»,– ասաց Ա. Սարգսյանը:

Շարունակությունը` «Փաստ» օրաթերթի այսօրվա համարում