Գուսան Հայկազուն. «Եթե երկուսից երեք հոգու վրա արյան հետք կա, մեղավոր են՝ թող դատեն, բայց մյուսներին ազատ արձակեն». «Փաստ»

«Փաստ» օրաթերթը գրում է.

Երգահան, «Հայկազունք» երաժշտական համույթի գեղարվեստական ղեկավար, Արցախյան պատերազմի մասնակից Գուսան Հայկազունը «Փաստի» հետ զրույցում «Սասնա ծռերի» դատավարությունը որակում է որպես խայտառակ գործընթաց:

– «Սասնա ծռերի» գործով դատական նիստերը բավական բուռն էմոցիաներով են ընթանում: Մյուս կողմից էլ հանրությանը զայրացրել է, որ ոչ պետական բարձրագույն կրթություն ունեցող երիտասարդ աղջիկն է դատը վարում: Ինչպե՞ս կգնահատեք այս դատավարությունը, հատկապես, որ այն հանձնարարել են նման «պրոֆեսիոնալիզմ» ունեցող կնոջ, և ըստ Ձեզ՝ ի՞նչ ավարտ այն կունենա:

– Դատավարությունը շատ վատ է գնում, դա բոլորիս է հայտնի, բոլորս ենք տեսնում: Սա մեր ամբողջ դատական համակարգի սխալն է: Պարզապես պատժում են տղաներին: Սա խայտառակ դատավարություն է, որը ցանկալի չէ մեր երկրի համար: Սահմանադրության օր ենք նշում, բայց Սահմանադրությունում չես կարող այդպիսի տող գտնել, որ թույլ կտա նման դաժան կերպով տղաների հետ վարվելու:

Նրանք բոլորը հայրենասեր են, ազգին նվիրված, եթե անգամ սխալ են գործել, օրենքի տառին համապատասխան պետք է դատվեն, արժանապատվությունից չպետք է նրանց զրկեն: Դրանով խայտառակ են անում մեր իշխանությունն ու պետությունը:

– Նախորդ շաբաթ Արայիկ Խանդոյանին, Արեգ Կյուրեղյանին և «Սասնա ծռերի» խմբի ևս մի քանի անդամի ծեծի ենթարկելով՝ արդյոք համակարգն ինքն իրեն չի՞ վարկաբեկում:

– Միանշանակ վարկաբեկում է: Այս տղաները պատահական մարդիկ չեն, նրանց թուրքերը չեն կարողացել նվաստացնել կամ խեղճացնել, մե՞նք ենք խեղճացնում: Նրանցից միայն վրեժ են լուծում: Եվ դրանով ընդհանուր ահուսարսափ են մտցնում ժողովրդի մեջ, որ տեսեք՝ ով փորձի նման բան անել, նրա հետ էլ այդ նույն կերպ կվարվեն:

Դա ճիշտ բան չէ, դա պետությանը, մեր երկրին չի սազում: Ես կուզեյի արժանապատիվ դատ լիներ, արժանապատիվ դատարան, արժանապատվորեն էլ ինչ իրենց հասնում էր, թող դատեին: Սխալ են գործել, թող դատեն, բայց՝ արժանապատվորեն:

Վարդան Պետրոսյանին դատավարությունն ի՞նչ դարձրեց, խայտառակեցին խեղճին, փորձեցին նվաստացնել, ինչի՞ համար: Մարդիկ մեղք են գործել, դատե՛ք: Հիմի եթե արտասահմանցին գար այստեղ ու նման բան աներ, այդկե՞րպ կվարվեին նրա հետ: Իսկ ինչո՞ւ են մեր տղաների հետ այդպես վարվում:

– Արդյոք կարո՞ղ ենք ենթադրել, որ այս դատական գործընթացը կարող է «Սասնա ծռերի» համար նաև ինքնաարտահայտման հարթակ հանդիսանալ, որպեսզի իրենց կամքը, իրենց դժգոհությունները բարձաձայնեն: Նման ճանապարհ սա կարո՞ղ ենք համարել:

– Ես մի քանի անգամ ասել եմ դեռևս անցած տարվա ընթացքում: Այդ ձևով ժողովրդի հետ չեն վարվում: «Սասնա ծռերը» ամեն ինչ էլ կարող են անել և ժողովուրդն էլ կարող էր ըմբոստանալ, բայց արդյունքում, հասկանում ենք, իշխանությունները ժողովրդի աչքից ընկնում են:

Եթե ծռերին հասնում է 10 տարի, թող դատեն, իհարկե ես նման բան ոչ մեկին չեմ ցանկանում, բայց չնվաստացնեն, ոչ բերդում, ոչ էլ՝ առավել ևս դատարանում: Ինչպե՞ս կարելի է դատարանում մարդ ծեծել: Նման բան ոչ մի երկրում չեն անի, դատավորը պատասխանատու է կասկածյալի կամ մեղադրյալի համար: Իսկ դատավարությունը շոու դարձնելով՝ տղաներին չեն խայտառակում, դրանով մեր երկիրն է խայտառակվում:

Ամեն դեպքում ես հույս ունեմ, որ վերջապես այդ տղաներին ճիշտ կդատեն: Մի մասը ազատության մեջ պիտի լինի: Իսկ եթե երկուսից երեք հոգու վրա արյան հետք կա, մեղավոր են՝ թող դատեն, բայց մյուսներին ազատ արձակեն:

Շարունակությունը` «Փաստ» օրաթերթի այսօրվա համարում