«Օրենքով գողը» ավերել է գաղութի մզկիթը. «Փաստ»

«Փաստ» օրաթերթը գրում է.

Մի խումբ ազդեցիկ «օրենքով գողեր» համարում են, որ Ռուսլան Գեգեչկորիի (Շլյապա կրտսեր) «թագազերծումը» օգուտ է եղել միայն Պատիժների իրականացման դաշնային ծառայությանը: Նրանց կարծիքով, առկա պայմաններում Շլյապայի հետ հարցերը պետք է պարզվեին նրա ազատ արձակվելուց հետո միայն:

«Росбалт»–ի ներկայացմամբ՝ խնդիրը հետևյալն է: Ռուսլան Գեգեչկորին հայտնվել է Տուվայի գաղութներից մեկում՝ կրելու պատիժը: Վեճ է առաջացել նրա ու մի խումբ չեչենների ու դաղստանցիների միջև: Վեճի ընթացքում նա անպարկեշտ խոսքեր է ասել չեչեն ազգի հասցեին: Ծեծկռտուք է սկսվել: Շլյապա կրտսերը մի քանի հարված է ստացել: Վեճից հետո կովկասցիները գնացել են մզկիթ՝ աղոթելու: Շուտով այնտեղ է հայտնվել Գեգեչկորին իր ընկերների հետ: Կովկասցիներին սարսափելի ձևով ծեծել են, իսկ մզկիթը՝ ավերել: Այս լուրն արագորեն տարածվել է չեչեն ու դաղստանցի հեղինակությունների ու նաև սովորական մարդկանց շրջանում: Որոշում է կայացվել պատժվել Գեգեչկորիին: Խնդիրն այն է, որ գողական աշխարհում կրոնն ու ազգությունները, մեծ հաշվով, նշանակություն չունեն: Եվ մարդկանց ազգությանը կամ կրոնին դիպչելը ճիշտ չէ:

Միջադեպից հետո Գեգեչկորիին տեղափոխել են Կրասնոյարսկի բանտային հիվանդանոց: Ըստ կայքի՝ դա պատահական չի արվել: Պատիժների իրականացման դաշնային ծառայությունը որոշել է պատժել Գեգեչկորիին: Այդ հիվանդանոցում է գտնվել Գեգեչկորիի ոխերիմ թշնամի, «օրենքով գող» Բադրի Կոգուաշվիլին (Բադրի Քութայիսցի): Ժամանակին Գեգեչկորին ու նրա կլանի անդամներն այն «քրեական գեներալների» շարքում էին, ովքեր ստորագրել էին Բադրիին «թագազերծելու» քսիֆի տակ: Ավելի ուշ, վերջին տարիներին գողականների ամենամեծ հավաքի ժամանակ, որը տեղի է ունեցել Երևանում, Կոգուաշվիլուն ճանաչել են որպես ընտանիքի անդամ, այսինքն՝ «օրենքով գող»:

Սակայն Բադրին բանտային հիվանդանոց ժամանած «թշնամու» հանդեպ որևէ հետաքրքրություն չի դրսևորել: Փոխարենը Գեգեչկորիի հարցերը լուծել փորձել են երկու այլ գողեր՝ Կոնստանտին Բորիսովը (Կոստիլ) և Սուլխան Մժավիան (Սուլխանը): «Росбалт»–ի տվյալներով, նրանք փորձել են ստանալ նաև հիվանդանոցում գտնվող «քրեական գեներալ» Յուրի Ուսոյանի (Յուրա Լազարևսկի) աջակցությունը, բայց նա կտրականապես հրաժարվել է: Արդյունքում Գեգեչկորիի «թագազերծման» քսիֆի տակ ստորագրել են միայն Կոստիլն ու Սուլխանը:

Ուշագրավ է, որ ազդեցիկ շատ գողեր, անկախ Շլյապա կրտսերի նկատմամբ ունեցած վերաբերմունքից, այդ քայլին բացասաբար են վերաբերվել: Մասնավորապես, Կոստիլն ու Սուլխանն ակնհայտորեն հույս են ունեցել ստանալու Բադրիի աջակցությունը, բայց չեն ստացել: Հակառակը, Բադրին դատապարտել է այդ երկուսի արարքը: Կոգուաշվիլին նշել է, որ անազատության մեջ գտնվող «օրենքով գողերը» պետք է պայքարեն «համակարգի» դեմ: Իսկ Շլյապան, ով էլ լինի, այդպես է վարվել: Ուստի նրա «թագազերծումը» եղել է բացառապես հօգուտ «համակարգի»: Նրա հետ բոլոր հարցերը պետք է լուծել ազատ արձակվելուց հետո:

Այն բանից հետո, երբ Գեգեչկորին մնացել է առանց տիտղոսի, նրա կյանքին լուրջ վտանգ է սպառնում: Այսուհետ նա շարքային բանտարկյալ է, ում հարցերը կարող են հեշտությամբ լուծել:

Գեգեչկորիի կլանի մարդիկ ակտիվորեն փորձում են գտնել ազգությամբ չեչեն մի հեղինակության կամ «օրենքով գողի», ով կկարողանա վերահսկել իրավիճակը: Քրեական աշխարհի մակարդակով որոշվել է թեման փակված համարել: Սակայն հայտնի է, որ մի խումբ չեչեններ, այդ թվում՝ բարձրաստիճան պաշտոնյաներ, Տուվայի բանտում տեղի ունեցած միջադեպը ներել չեն ցանկացել:

  Շարունակությունը` «Փաստ» օրաթերթի այսօրվա համարում