Ակամա հրթիռակոծում

Hraparak-ը գրում է.

Ուկրաինայի և Ռուսաստանի իշխանությունները համակարծիք են, որ Դոնեցկի մարզի Ելենովկա ավանի քննչական մեկուսարանի շինություններից մեկի ավերվելու պատճառը պետք է հետաքննվի միջազգային փորձագետների կողմից: Այն ավերվել էր հուլիսի 29-ի կեսգիշերին՝ ըստ ռուսական կողմի՝ ամերիկյան HIMARS հրթիռային համակարգով, իսկ ըստ ուկրաինացիների՝ ռուսների կողմից: Ամերիկյան ֆինասավորմամբ լրատվական կայքի վարկածով էլ՝ շենքը պայթեցվել է ներսից (անհայտ լրատվամիջոցներին հղում անելով): Մեկուսարանին հասցված հարվածի հետևանքով այնտեղ պահվող 193 ուկրաինացի ռազմագերիներից զոհվել է առնվազն 53-ը, ծանր վնասվածքներ ստացել 73-ը: Ռուսաստանը ՄԱԿ-ի գլխավոր քարտուղար Անտոնիո Գուտերեշին հայտնել է Ելենովկայում քննչական մեկուսարանի գնդակոծման համար Կիևի պատասխանատվության մասին և սպասում է կատարվածի գնահատականին, հայտարարել է այդ կառույցի ՌԴ մշտական ներկայացուցչի առաջին տեղակալ Դ. Պոլյանսկին։ Պոլյանսկին ընդգծել է, որ ՄԱԿ-ը չպետք է խուսափի Կիևի ռեժիմի այս հանցագործությունը դատապարտելուց։ Իսկ ուկրաինական զինված ուժերի (ՈՒԶՈՒ) հրամանատարության համաձայն, «այդ կերպ ռուս օկուպանտները հետապնդում են իրենց հանցավոր նպատակները՝ մեղադրել Ուկրաինային «պատերազմական հանցագործություններ» կատարելու մեջ, ինչպես նաև թաքցնել գերիների խոշտանգումները և մահապատիժները, որոնք նրանք այնտեղ իրականացրել են օկուպացիոն վարչակազմի հրամանով»։ Միաժամանակ ասվել է, որ «թշնամին շարունակում է տեղեկատվական պատերազմ վարելու իր քարոզչական մեթոդները՝ Ուկրաինայի զինված ուժերին մեղադրելու քաղաքացիական ենթակառուցվածքների և բնակչության գնդակոծման մեջ՝ դրանով իսկ թաքցնելով սեփական նենգ գործողությունները։ Ուստի Ուկրաինայի զինված ուժերի կողմից քաղաքացիական ենթակառուցվածքների և բնակչության ենթադրյալ գնդակոծման մասին նման հայտարարությունները բացահայտ սուտ են և սադրանք…»:

Փաստորեն, եթե առաջնորդվենք ուկրաինական վարկածով, ապա Ուկրաինայի հարավի՝ ռուսական կողմի ենթակայության տակ անցած Խերսոն քաղաքի մերձակայքի քաղաքացիական ենթակառուցվածք համարվող, Դնեպրի վրա կառուցված Անտոնովյան կամրջի ավերումը հրթիռակոծման միջոցով կատարվել է ռուսական կողմից: Որպեսզի իրենք իրենց համար ստեղծեն լուրջ լոգիստիկ խնդիրներ և ուկրաինացիներին մեղադրեն քաղաքացիական ենթակառուցվածքներն ավերելու մեջ: Էլ չեմ խոսում Դոնեց քաղաքի անընդհատ հրթիռակոծումների մասին: Աստեղ է ասված՝ չգիտես խնդաս թե լաս: Իսկ եթե գործում է «պատերազմում ինչպես պատերազմում» տարբերակը, ապա այդ դեպքում բարոյականության դասեր չեն տալիս: Ինչ մնում է Ելենովկայի քննչական մեկուսարանն ավերելուն, փաստորեն, թշնամի լինելով ուկրաինացիներին՝ ռուսական կողմը թշնամի է նաև ինքն իրեն: Եթե այդպես չլիներ, ապա, ըստ ամերիկյան հարկատուների հաշվին պահվող լրատվամիջոցի ենթադրյալ տեղեկատվության, ներսից չէր ոչնչացնի «Ազով» անվանումով ուկրաինական ազգայնական զորաջոկատի գերի ընկած մարտիկների մի մասին, որոնք հարցաքննվում էին իրենց կողմից: Եվ կարող էին հետաքրքիր և կարևոր տեղեկատվությամբ կիսվել ռուսների հետ: Ի դեպ, Պենտագոնի ներկայացուցիչը հայտարարել է, որ եթե Կիևն է հարված հասցրել բանտին, ապա դա կատարել է ակամա: «Եթե դա հարված էր ուկրաինական կողմից, ապա ես ձեզ վստահեցնում եմ՝ նրանք չէին ցանկանում դա անել» (աղբյուրը՝ ՌԻԱ Նովոստի): Ոնց որ տվյալ դեպքի համար ուկրաինական տարածքի անընդհատ սկանավորումն արևմտյան արբանյակային միջոցներով որևէ արդյունք չի տվել: Մոտավորապես նման բան է խոստովանել Սպիտակ տան աշխատակիցներից Ջոն Քիրբին՝ ասելով, որ Միացյալ Նահանգները հետախուզական բավարար տվյալներ չունի այս միջադեպի վերաբերյալ։ Փաստորեն, պատերազմի ժամանակ հնարվոր է նաև ակամա հրթիռակոծում՝ չէին ուզում, բայց այդպես ստացվեց: Ինչպես ասվում է՝ իջե՛ք, տեղ հասանք: Միաժամանակ արձանագրենք, որ Պենտագոնում ավելի ադեկվատ են և չեն ենթադրում, թե ռուսներն են ավերել մեկուսարանը: Ի դեպ, Դոնեցկի դատարանի կողմից մահապատժի դատապարտված բրիտանացի վարձկան Էյդեն Ասլինը ռուսական լրատվական կայքերին հայտնել էր, որ ՈՒԶՈՒ-ն հրետակոծել է այն ազատազրկման այն շինությունը, որտեղ պահվում է ինքը։

Ռուսատյացները, բնականաբար, չեն հավատա, բայց բազմաթիվ գերիներ ներկայացրել են ռազմաճակատի ուկրաինական կողմում տիրող իրավիճակը, ինչը դրական համարել չես կարող: Այնուամենայնիվ, Արևմուտքում դեռևս առկա են մտածելու կարողությունը պահպանած անձինք, ովքեր հասկանում են, որ ռուսական կողմը բացարձակ կարիք չուներ վերացնելու իր ձեռքում եղած գերիներին: Դրանցից մեկը Ռուսաստանում Ֆրանսիայի նախկին դեսպան Սիլվի Բերմանն է, ով ասել է, որ ռուսները պատճառ չունեին հարվածելու Ելենովկայի կալանավայրին, որտեղ պահվում էին ուկրաինացի ռազմագերիները: Նրա կարծիքով, քննչական մեկուսարանում պահվող բանտարկյալները սպասում էին դատավարության, որի արդյունքում նրանք կարող էին դատապարտվել մահապատժի, ինչը նշանակում է, որ «նման եղանակով նրանց սպանելու կարիք չկար»։ Բերմանի դիրքորոշումը պաշտպանել է ֆրանսիացի պաշտոնաթող գնդապետ Միշել Գոյան, ով նույնպես կասկածի տակ է դրել ռուսամետ ուժերի կողմից կալանավայրը գնդակոծելու Կիևի վարկածի իսկությունը: Վերլուծելով միջադեպը՝ նա նշել է, որ իմաստ չի տեսնում Ռուսաստանի և նրա դաշնակիցների համար՝ «ռմբակոծել իրենց վերահսկողության տակ գտնվող բանտը», հաշվի առնելով, որ դատավարություն էր նախապատրաստվում ուկրաինացի գերիների նկատմամբ։ Ավելացնեմ, որ պաշտոնաթող գնդապետն այնքան միամիտ է, որ չի ընկալում՝ երբ Արևմուտքին անհրաժեշտ է, ապա մարդկային տրամաբանության տեսակետից անիմաստ երևույթները ևս կարող են հիմնավորման դեր կատարել. կարևորը դրանց վստահելն է: Հ.Գ.

Ընթերցողն անշուշտ նկատում է, որ ուկրաինական թեմաների վերաբերյալ հիմնականում օգտվում եմ ռուսական աղբյուրներից: Սակայն դա իմ մեղքը չէ, որովհետև ռուսերենով արևմտյան լրատվամիջոցներում պրոպանգանդիստական բնույթի նյութերից բացի այլ տեղեկատվություն փնտրելն ուղղակի իմաստ չունի: Դա նույնն է, ինչ 44-օրյա պատերազմում մատուցվում էր մեզ մեր իշխանության կողմից՝ միայն թե հակառակ ուղղվածությամբ: 

Անվճար Էլ. էներգիան արդեն հասանելի է բոլորին, անցե՛ք այս հղումով և համոզվեք ինքներդ՝ https://4q5w.short.gy/Solaron